జాతీయ జెండా మార్చ్‌కు పోలీసుల ఆంక్షలు.. కన్నాట్ ప్లేస్‌లో ఏం జరిగింది?
సీజేపీ ప్రతిపాదించిన ‘లెహ్రా దో తిరంగా’ మార్చ్‌కు ఢిల్లీలో అడ్డంకులు ఎదురయ్యాయి. పార్క్ మూసివేత, పోలీసుల నిషేధాజ్ఞలతో ఉద్రిక్తత నెలకొంది.
ఢిల్లీలో కాక్రోచ్ జనతా పార్టీ ప్రతిపాదించిన జాతీయ జెండా మార్చ్‌కు పోలీసులు అడ్డంకులు సృష్టించారు. కన్నాట్ ప్లేస్‌లోని సెంట్రల్ పార్క్‌లో మార్చ్ నిర్వహించాలన్న సీజేపీ పిలుపు నేపథ్యంలో పోలీసులు నిషేధాజ్ఞలు జారీ చేయగా, పార్కును రెండు రోజుల పాటు మూసివేస్తున్నట్లు ఎన్‌డీఎంసీ ప్రకటించింది. సీజేపీ వ్యవస్థాపకుడు అభిజీత్ దీప్కే అక్టోబర్ 16న సాయంత్రం 5 గంటలకు ‘లెహ్రా దో తిరంగా’ పేరుతో మార్చ్ నిర్వహించాలని పిలుపునిచ్చారు. జాతీయ జెండాలు చేతబట్టి ఈ కార్యక్రమంలో పాల్గొనాలని ప్రజలను కోరారు.
ప్రధాన ఎన్నికల కమిషనర్ జ్ఞానేశ్ కుమార్‌కు వ్యతిరేకంగా జరుగుతున్న నిరసనల నేపథ్యంలో ఢిల్లీ పోలీసులు, సీజేపీ మధ్య ఇప్పటికే ఉద్రిక్తత నెలకొంది. అక్టోబర్ 13న జంతర్ మంతర్‌లోకి ప్రవేశించిన ఘటనలో సీజేపీ నేతలు సౌరవ్ దాస్, అశుతోష్ రాంకాను న్యాయస్థానం జ్యుడీషియల్ కస్టడీకి పంపిన తర్వాత ఈ మార్చ్‌కు పిలుపునిచ్చారు. అయితే, శుక్ర, శనివారాల్లో సెంట్రల్ పార్క్ మూసివేస్తున్నట్లు న్యూఢిల్లీ మున్సిపల్ కౌన్సిల్ ప్రకటించింది. పార్కును మూసివేయడానికి పరిపాలనా కారణాలే ఉన్నాయని వెల్లడించింది. మరోవైపు, కన్నాట్ ప్లేస్ నిరసనలకు అనుమతించిన ప్రాంతం కాదని ఢిల్లీ పోలీసులు స్పష్టం చేశారు. మార్చ్‌కు దూరంగా ఉండాలని ప్రజలకు పోలీసులు సూచించారు. అయితే, తగిన ప్రదేశంలో పరిమిత సంఖ్యలో ప్రజలు జాతీయ జెండాను ప్రదర్శించేందుకు, జాతీయ గీతం ఆలపించేందుకు అవకాశం కల్పిస్తామని తెలిపారు.
పార్కు మూసివేతపై అభిజీత్ దీప్కే తీవ్రంగా స్పందించారు. “మేము వంద ప్రదేశాలను ప్రకటిస్తే, ప్రధాని మోదీ ఆ వంద ప్రదేశాలనూ మూసివేస్తారా?” అని ప్రశ్నించారు. జాతీయ జెండాను ఎగురవేయడంలో పోలీసులకు అభ్యంతరం ఎందుకని నిలదీశారు. మరోవైపు, పండుగల సమయంలో వ్యాపార కార్యకలాపాలకు ఆటంకం కలగకుండా చూడాలని, కన్నాట్ ప్లేస్, పరిసర ప్రాంతాల్లోని వ్యాపార, మార్కెట్ సంఘాలు పోలీసులను కోరినట్లు అధికారులు తెలిపారు. అల్లర్లు, చట్టవిరుద్ధ సమావేశాల నుంచి తమ సంస్థలకు రక్షణ కల్పించాలని వారు విజ్ఞప్తి చేసినట్లు పేర్కొన్నారు. దీంతో, జాతీయ జెండా మార్చ్ నిర్వహణపై సీజేపీ పిలుపు, పోలీసుల ఆంక్షల మధ్య ఢిల్లీలో మరోసారి ఉద్రిక్త పరిస్థితులు నెలకొన్నాయి.
