మళ్లీ వేడెక్కిన మెస్సీ ఈవెంట్ గందరగోళం కేసు

పశ్చిమ బెంగాల్‌లో గత సంవత్సరం సాల్ట్ లేక్ స్టేడియంలో జరిగిన లియోనెల్ మెస్సీ కార్యక్రమంలో చోటుచేసుకున్న గందరగోళం కేసులో దర్యాప్తు మళ్లీ వేగం అందుకుంది. ఈ కేసులో రాష్ట్ర మాజీ క్రీడా మంత్రి, టీఎంసీ నాయకుడు అరూప్ బిస్వాస్‌కు పోలీసులు సమన్లు జారీ చేశారు. జూన్ 8న దర్యాప్తు అధికారుల ఎదుట హాజరుకావాలని బిధాన్నగర్ పోలీసులు ఆదేశించారు. ఆరోగ్య సమస్యల కారణంగా గతంలో సమన్లకు హాజరు కాలేనని ఆయన తెలిపిన నేపథ్యంలో, తాజా సమన్లు జారీ చేసినట్లు అధికారులు వెల్లడించారు.

టికెట్ వివాదం నుంచి రాజకీయ దుమారం వరకు..

డిసెంబర్ 2025లో సాల్ట్ లేక్ స్టేడియంలో జరిగిన ఈ కార్యక్రమంలో భారీ రద్దీ, భద్రతా లోపాలు, నిర్వహణ లోపాల కారణంగా గందరగోళం నెలకొంది. సరైన అనుమతి లేకుండా పెద్ద సంఖ్యలో అభిమానులు స్టేడియంలోకి ప్రవేశించడంతో పరిస్థితి అదుపుతప్పిందని నివేదికలు చెబుతున్నాయి. అధిక ధరల టిక్కెట్లు కొనుగోలు చేసిన అనేక మంది ప్రేక్షకులు మెస్సీని సరిగా చూడలేకపోయామని ఫిర్యాదు చేశారు. గందరగోళం పెరగడంతో మెస్సీ త్వరగా వేదికను వీడినట్లు సమాచారం.

ఈ ఘటనపై ఈవెంట్ నిర్వాహకుడు శతాద్రు దత్తా ఇచ్చిన ఫిర్యాదు ఆధారంగా పోలీసులు కేసు నమోదు చేశారు. టిక్కెట్ల బ్లాక్‌మార్కెటింగ్, మోసం, దోపిడీ, నేరపూరిత బెదిరింపులు వంటి ఆరోపణలు కూడా కేసులో ఉన్నాయి. ఈ ఘటనపై అప్పట్లోనే రాజకీయ వివాదం చెలరేగి, అప్పటి క్రీడా మంత్రి అరూప్ బిస్వాస్‌పై నిర్వహణ లోపాల ఆరోపణలు వచ్చాయి.

తరువాత పోలీసులు శతాద్రు దత్తాను అరెస్టు చేయగా, ఆయన 37 రోజులు కస్టడీలో ఉండి బెయిల్‌పై విడుదలయ్యారు. అనంతరం ఆయన ఈ కార్యక్రమ వైఫల్యానికి అప్పటి అధికారులే బాధ్యులని ఆరోపించారు. ఇప్పుడు మాజీ మంత్రి అరూప్ బిస్వాస్‌ను విచారణకు పిలవడంతో ఈ కేసు మరోసారి రాజకీయంగా కూడా ప్రాధాన్యం సంతరించుకుంది.