జై ఎన్టీఆర్ స్థానంలో జై నమో.. టీడీపీ స్వరం ఎందుకు మారింది?

అసలు టీడీపీ సిద్ధాంతంలో వచ్చిన ఈ సడన్ చేంజ్ వెనుక ఉన్న రాజకీయ వ్యూహమేంటి? ఎన్టీఆర్ ఆశయాలు, చంద్రబాబు మానస పుత్రిక 'జన్మభూమి' పక్కకు వెళ్లడానికి కారణాలేంటి?"

అసలు ప్రాంతీయ స్వభావం కలిగిన తెలుగుదేశం పార్టీలో ఈ పొలిటికల్ షిఫ్ట్ ఎందుకొచ్చింది? ప్రధాని మోదీని పొగిడే క్రమంలో ఎన్టీఆర్ నినాదాన్ని, జన్మభూమి భావజాలాన్ని పక్కన పెట్టేశారా? పవన్ కల్యాణ్ పట్టిన జాతీయత-సనాతన ధర్మం దారిలోకి టీడీపీ ఎందుకు వెళ్లింది? దీని వెనుక ఉన్న అసలు రాజకీయ వ్యూహమేంటి?

1982లో 'తెలుగువారి ఆత్మగౌరవం' అనే ఒకే ఒక్క నినాదంతో వచ్చి, నాటి కాంగ్రెస్ సామ్రాజ్యాన్ని కుప్పకూల్చిన చరిత్ర ఎన్టీఆర్ ది. ఎన్టీఆర్ తదనంతరం బాధ్యతలు చేపట్టిన చంద్రబాబు నాయుడు, ప్రజలను పాలనలో భాగస్వాములను చేస్తూ 'జన్మభూమి' నినాదాన్ని ప్రతి ఇంటా ప్రతిధ్వనించేలా చేశారు. కానీ, 2024 పొత్తుల తదనంతరం అధికారంలోకి వచ్చాక పరిస్థితులు తలకిందులయ్యాయి.

ఇప్పుడు ఏ పసుపు జెండా సభ చూసినా... ప్రాంతీయ గుర్తింపుల కంటే జాతీయ సంకేతాలకే ప్రాధాన్యం పెరుగుతోంది.

ఎన్టీఆర్ నామం పక్కకు: దశాబ్దాలుగా క్యాడర్‌ను ఉర్రూతలూగించిన 'జై ఎన్టీఆర్' స్థానంలో నేడు 'జై నమో' నినాదాలు వినిపిస్తున్నాయి.

జన్మభూమి అటకెక్కడం: చంద్రబాబు మానస పుత్రికగా గుర్తింపు పొందిన 'జన్మభూమి' అనే ప్రస్తావనను పక్కనపెట్టి, కేంద్ర ప్రభుత్వ పథకాలు, జాతీయ ప్రాజెక్టులకే ఎక్కువ ప్రచారం కల్పిస్తున్నారు.

ఈ అంశంపై కాదు, కానీ భోగాపురం విమానాశ్రయం ప్రారంభం అరువాత సీపీఐ జాతీయ కార్యదర్శి కే. రామకృష్ణ విడుదల చేసిన వీడలో తీవ్రంగా తప్పుబట్టారు ముఖ్యమంత్రి నారా చంద్రబాబు, డిప్యూటీ సీఎం పవన్ కల్యాణ్ తెలుగు ఆత్మగౌరవాన్ని తాకట్టకు పెడుతున్నారని రామకృష్ణ ఘాటుగా వ్యాఖ్యనించారు.

ఈ మార్పుకు ప్రధాన కారణం – ప్రధాని నరేంద్ర మోదీ పట్ల చంద్రబాబు అనుసరిస్తున్న తీరు!

అమరావతి నిర్మాణం, పోలవరం పూర్తి చేయడం, రాష్ట్రానికి భారీగా నిధులు రాబట్టడం వంటి అంశాల కోసం కేంద్రంతో సఖ్యత అత్యవసరంగా మారింది. ఈ ఆర్థిక, రాజకీయ అవసరాల కోసమే సీఎం చంద్రబాబు బహిరంగ సభల్లో ప్రధాని మోదీ పనితీరును, క్రమశిక్షణను ఆకాశానికెత్తుతున్నారు. ఈ క్రమంలో ప్రాంతీయ పార్టీ అయిన టీడీపీ, కేంద్రంతో సత్సంబంధాల పేరుతో తన సొంత నినాదాలను పక్కనపెట్టి, బీజేపీకి అనుకూలమైన 'భారత్ మాతాకీ జై', 'వందేమాతరం' నినాదాలను భుజాన వేసుకుంది. స్థానిక ఆత్మగౌరవం కంటే 'జాతీయ సమగ్రత, కేంద్ర సహాయం' ముఖ్యమనే భావనను ప్రజల్లోకి తీసుకెళ్లే ప్రయత్నం చేస్తున్నారు.ఇలా చేయడం సిగ్గు చేటని సీపీఐ నేత రామకృష్ణ అభ్యంతరం వ్యక్తం చేశారు.

ఈ సమీకరణంలో అత్యంత కీలక పాత్ర వహించింది ఉపముఖ్యమంత్రి పవన్ కల్యాణ్, ఆయన నాయకత్వంలోని 'జనసేన'! ఒకప్పుడు వామపక్ష భావజాలం, చేగువేరా మార్గంలో నడిచిన పవన్, 2024 ఎన్నికల విజయం తర్వాత 'సనాతన ధర్మం', 'జాతీయత'లను తన ప్రధాన అజెండాగా మార్చుకున్నారు.

తిరుమల లడ్డూ ప్రసాదం వివాదం నుంచి దక్షిణాదిలో 'సనాతన ధర్మ పరిరక్షణ బోర్డు' స్థాపన వరకు పవన్ పట్టిన హార్డ్-హిందూత్వ లైన్... పొత్తులో ఉన్న టీడీపీని కూడా ఆ వైపుగా ఆలోచించేలా చేసింది. పవన్ ద్వారా జాతీయత, సనాతన ధర్మం వైపు మళ్లిన ఓటు బ్యాంకును కాపాడుకోవాలంటే, టీడీపీ కూడా అదే 'హిందూత్వ బాట' పట్టక తప్పలేదు. దీంతో కాంగ్రెస్‌కు ప్రత్యామ్నాయంగా సెక్యులర్ ఇమేజ్ ఉన్న టీడీపీ, ఇప్పుడు జనసేన మార్గంలో జాతీయ భావజాలాన్ని, సనాతన లైన్‌ను అనుసరించాల్సిన పరిస్థితి ఏర్పడింది.

నాలుగు దశాబ్దాలుగా సీపీఐ, సీపీఎం వంటి వామపక్షాలతో కలిసి పనిచేస్తూ లౌకికవాదాన్ని వినిపించిన పార్టీ... ఇప్పుడు 'జై నమో', 'భారత్ మాతాకీ జై' అనడంపై వామపక్షాలు తీవ్ర అభ్యంతరం వ్యక్తం చేస్తున్నాయి. 'స్వప్రయోజనాలు, నిధుల కోసం టీడీపీ తన సిద్ధాంతాలను బీజేపీ పాదాల చెంత ఉంచుతోంది' అని తీవ్రంగా విమర్శిస్తున్నాయి.

ప్రధాని నరేంద్ర మోదీని స్థాయికి మించిన పొగడ్తలతో తెలుగుజాతి ఆత్మగౌరవాన్ని దెబ్బతీస్తున్నారని సీపీఐ నేత రామకృష్ణ వ్యాఖ్యానించారు.

లాభం: కేంద్రం నుంచి రావాల్సిన నిధులు, ప్రాజెక్టులను వేగవంతం చేసుకోవడం మరియు పొత్తు బలంతో ఐదేళ్ల పాలనను నిలబెట్టుకోవడం.

నష్టం: ప్రాంతీయ భావజాలంతో పుట్టిన పార్టీ... ఎన్టీఆర్ పేరును, జన్మభూమి నినాదాన్ని పక్కనపెట్టి జాతీయత, హిందూత్వ వైపు వెళ్తే... కాలక్రమంలో తన సొంత 'ప్రాంతీయ ఉనికి'ని కోల్పోయి, బీజేపీ-జనసేనల నీడలో కలిసిపోయే ప్రమాదం ఉందనేది విశ్లేషకుల హెచ్చరిక!

ఏది ఏమైనా... ఎన్టీఆర్ బొమ్మను, జన్మభూమి నినాదాన్ని పక్కనపెట్టి, మోదీ భజనతో పాటు 'భారత్ మాతాకీ జై' అంటూ ముందుకు సాగుతున్న చంద్రబాబు రాజకీయ ఎత్తుగడ ఏపీ రాజకీయంలో ఒక కొత్త రంగు పూసింది. మరి ఈ జాతీయవాద, సనాతన ధర్మ మార్గం టీడీపీకి భవిష్యత్తులో మైలేజ్ ఇస్తుందో లేక సొంత ప్రాంతీయ మూలాలనే దెబ్బతీస్తుందో అనేది వేచి చూడాలి!