ఢిల్లీ డీసీపీ రాజీనామా చేశారంటూ వైరల్ వీడియో..

కాంగ్రెస్ నాయకుడు భాయ్ జగ్‌తాప్ షేర్ చేసిన ఈ వీడియో జులై 31న విస్తృతంగా వైరల్ కావడంతో, బీజేపీ సోషల్ మీడియా నాయకుడు నిఖిల్ భంబ్రే ఫిర్యాదు చేశారు. వీడియోలో డీసీపీ సుమిత్ ఝాను పోలిన ఏఐ సృష్టించిన గొంతుతో, విద్యార్థులపై తప్పుడు కేసులు పెట్టాలని తనపై ఒత్తిడి తెచ్చారని, అలాంటి వ్యవస్థలో పనిచేయలేనని చెబుతూ వెంటనే రాజీనామా చేస్తున్నట్లు చూపించారు. అలాగే విద్యార్థులు ఉగ్రవాదులు కాదని, వారికి అండగా నిలుస్తానని పేర్కొన్నట్లు వీడియోలో కనిపించింది.

"నేను సర్వీసుకు రాజీనామా చేస్తున్నాను" అనే శీర్షికతో ఈ వీడియో సోషల్ మీడియాలో విస్తృతంగా షేర్ అయింది. జులై 20న జంతర్ మంతర్ వద్ద జరిగిన విద్యార్థుల నిరసన సందర్భంగా పార్లమెంట్ వైపు దూసుకెళ్లేందుకు ప్రయత్నించిన ఆందోళనకారులను పోలీసులు, రాపిడ్ యాక్షన్ ఫోర్స్ లాఠీచార్జ్, టియర్ గ్యాస్‌తో చెదరగొట్టిన ఘటన అనంతరం ఈ వీడియో ప్రచారంలోకి వచ్చింది.

అయితే ఢిల్లీ పోలీసులు వెంటనే ఈ వీడియోపై ఫ్యాక్ట్‌చెక్ నిర్వహించి, ఇది పూర్తిగా ఏఐతో రూపొందించిన నకిలీ వీడియో అని స్పష్టం చేశారు. సమన్వయంతో జరుగుతున్న తప్పుడు సమాచార ప్రచారంలో భాగంగా దీనిని రూపొందించారని పేర్కొంటూ, ప్రజలు ఈ వీడియోను షేర్ చేయవద్దని విజ్ఞప్తి చేశారు.

పోలీసులు వివరించిన ప్రకారం, జులై 23న విడుదల చేసిన అసలు వీడియోలో డీసీపీ సుమిత్ ఝా విదేశీ తప్పుడు సమాచార ప్రచారంపై మాత్రమే మాట్లాడారు. పాకిస్తాన్‌కు చెందిన 400కుపైగా సోషల్ మీడియా ఖాతాలను గుర్తించి బ్లాక్ చేసిన విషయాన్ని ఆయన వెల్లడించారు. అయితే ఆ వీడియోలో ఎక్కడా రాజీనామా గురించి గానీ, విద్యార్థి నిరసనలపై ప్రభుత్వం ఒత్తిడి తెచ్చిందనే వ్యాఖ్యలు గానీ లేవని అధికారులు తెలిపారు.

స్వతంత్ర ఫ్యాక్ట్‌చెకర్లు కూడా ఈ వీడియోను పరిశీలించి, ఆడియోకు పెదాల కదలికలు సరిపోకపోవడంతో ఇది మార్ఫింగ్ చేసిన డీప్‌ఫేక్ అని నిర్ధారించారు. ప్రజలను తప్పుదోవ పట్టించే ఉద్దేశంతో ఈ వీడియోను ప్రచారం చేశారని పేర్కొంటూ, గుర్తుతెలియని వ్యక్తులపై భారతీయ న్యాయ సంహిత సెక్షన్ 353తో పాటు సమాచార సాంకేతిక చట్టంలోని సెక్షన్ 66డీ కింద మహారాష్ట్ర సైబర్ పోలీసులు కేసు నమోదు చేసి దర్యాప్తు ప్రారంభించారు.