ఢిల్లీ- ముంబై హైవేపై ఘోర ప్రమాదం

మధ్యప్రదేశ్‌లోని బేతుల్ జిల్లాకు చెందిన వారు రాజస్థాన్‌లోని ఖాటు శ్యామ్ ఆలయాన్ని దర్శించుకునేందుకు వెళ్తుండగా ఈ ప్రమాదం జరిగింది. శుక్రవారం రాత్రి భోపాల్ నుంచి బయలుదేరిన వీరు నాలుగు రోజుల పర్యటనలో భాగంగా ఆలయానికి వెళ్తున్నట్లు పోలీసులు తెలిపారు.

ఎక్స్‌ప్రెస్‌వేపై ప్రయాణిస్తున్న సమయంలో వాహనం అదుపుతప్పి సుమారు 15 అడుగుల లోతున్న డ్రైనేజీలో పడిపోయింది. సమాచారం అందుకున్న పోలీసులు, అత్యవసర సహాయక సిబ్బంది వెంటనే ఘటనాస్థలానికి చేరుకుని సహాయక చర్యలు చేపట్టారు. డ్రైనేజీలో బురద, నీరు పేరుకుపోవడంతో సహాయక చర్యలకు ఆటంకం ఏర్పడింది. దీంతో క్రేన్ల సహాయంతో దెబ్బతిన్న వాహనాన్ని బయటకు తీసేందుకు ప్రయత్నించారు.

గాయపడిన వారిని కోటాలోని న్యూ మెడికల్ కాలేజీ ఆసుపత్రి, ఎంబీఎస్ ఆసుపత్రులకు తరలించి చికిత్స అందిస్తున్నారు. ప్రమాదానికి గల కారణాలపై పోలీసులు దర్యాప్తు చేస్తున్నారు.