రాహుల్ గాంధీతో సిద్ధరామయ్య భేటీలో అంతరార్థం ఏంటీ?
x
రాహుల్ గాంధీతో సిద్దరామయ్య, యతీంద్ర సిద్ధరామయ్య

రాహుల్ గాంధీతో సిద్ధరామయ్య భేటీలో అంతరార్థం ఏంటీ?

స్టింగ్ ఆపరేషన్ వివాదంపై అధిష్టానికి ఫిర్యాదు


కర్ణాటక కాంగ్రెస్‌లో స్టింగ్ ఆపరేషన్ వ్యవహారం రోజురోజుకూ కొత్త మలుపులు తిరుగుతోంది. ఈ కేసులో అసలు సూత్రధారి ఎవరు? తెరవెనుక ఉండి ఈ ఆపరేషన్‌ను నడిపించింది ఎవరు? అనే ప్రశ్నలు ఇప్పుడు రాజకీయంగా ప్రాధాన్యం సంతరించుకున్నాయి. ఈ నేపథ్యంలో మాజీ ముఖ్యమంత్రి సిద్ధరామయ్య నేరుగా కాంగ్రెస్ అధిష్ఠానంతో చర్చలు జరపగా.. సీనియర్ నేత బీకే హరిప్రసాద్ కూడా సమగ్ర దర్యాప్తు జరపాలని డిమాండ్ చేయడం పార్టీలో చర్చనీయాంశంగా మారింది.

సిద్ధరామయ్యను ఇబ్బందుల్లోకి నెట్టేలా రూపొందించినట్లు ఆరోపణలు ఎదుర్కొంటున్న ఈ స్టింగ్ ఆపరేషన్‌పై బెంగళూరు పోలీసులు దర్యాప్తు చేస్తున్నారు. ఈ వ్యవహారంలో ఉపయోగించిన మొబైల్ ఫోన్‌ను కేంద్ర మంత్రి హెచ్‌డీ కుమారస్వామి ఢిల్లీలోని తన నివాసంలో అప్పగించినట్లు పోలీస్ కమిషనర్ సీమంత్ కుమార్ సింగ్ వెల్లడించారు. దీంతో దర్యాప్తులో కుమారస్వామి పాత్రపై ఆసక్తి నెలకొంది.

అయితే, ఈ కేసులో కేవలం కుమారస్వామి పాత్రను పరిశీలిస్తే సరిపోదని కాంగ్రెస్ నేతలు భావిస్తున్నారు. అసలు ఈ ఆపరేషన్‌కు ప్రణాళిక రూపొందించింది ఎవరు? దాని వెనుక ఎవరున్నారు? అన్న అంశాలను కూడా వెలికితీయాలని కోరుతున్నారు.

ఈ క్రమంలో నవంబర్ 2న సిద్ధరామయ్య తన కుమారుడు యతీంద్రతో కలిసి ఢిల్లీలో కాంగ్రెస్ ప్రధాన కార్యదర్శి కేసీ వేణుగోపాల్‌ను కలిశారు. సుమారు అరగంట పాటు జరిగిన ఈ సమావేశంలో స్టింగ్ ఆపరేషన్ దర్యాప్తు తీరుపై తన ఆందోళనలను వివరించినట్లు సమాచారం. ఈ వ్యవహారం వెనుక సొంత పార్టీకి చెందిన కొందరు నేతల ప్రమేయం ఉండొచ్చన్న అనుమానాలను కూడా ఆయన అధిష్ఠానం దృష్టికి తీసుకెళ్లినట్లు తెలుస్తోంది. అయితే, ఈ అంశంపై బహిరంగంగా వ్యాఖ్యలు చేయకుండా ఉండాలని వేణుగోపాల్ సూచించినట్లు పార్టీ వర్గాలు చెబుతున్నాయి.

అనంతరం రాహుల్ గాంధీతోనూ సిద్ధరామయ్య ప్రత్యేకంగా సమావేశమయ్యారు. దాదాపు 40 నుంచి 45 నిమిషాల పాటు సాగిన ఈ భేటీలో స్టింగ్ ఆపరేషన్ పరిణామాలతో పాటు రాష్ట్రంలోని రాజకీయ పరిస్థితులపై చర్చించినట్లు సమాచారం. అయితే సమావేశం వివరాలపై సిద్ధరామయ్య పెద్దగా స్పందించలేదు.

మరోవైపు కాంగ్రెస్ సీనియర్ నేత బీకే హరిప్రసాద్ ఈ కేసులో అసలు కుట్రదారులను గుర్తించాలని పట్టుబడుతున్నారు. కేవలం కుమారస్వామి చుట్టూనే దర్యాప్తును పరిమితం చేయకుండా, స్టింగ్ ఆపరేషన్ రూపకల్పన నుంచి అమలు వరకు ఎవరెవరి పాత్ర ఉందో తేల్చాలని కోరుతున్నారు.

ఇదే సమయంలో కుమారస్వామి కూడా రాష్ట్ర ప్రభుత్వంపై ఎదురుదాడి చేస్తున్నారు. స్టింగ్ ఆపరేషన్ జరిగిన సమయంలో క్రిపా అల్వాతో పాటు మరో వ్యక్తి కూడా ఉన్నారని, ఆ వ్యక్తిని ఇప్పటివరకు ఎందుకు గుర్తించలేదని ప్రశ్నించారు. అసలు నిందితులను కాపాడేందుకు పోలీసులు ప్రయత్నిస్తున్నారని ఆరోపించారు. 2011లో జరిగినట్లు చెబుతున్న ఘటనకు సంబంధించిన వీడియోను 2023లో రికార్డు చేయడంలో ఉన్న ఉద్దేశం ఏమిటని కూడా ఆయన ప్రశ్నించారు. ఈ వ్యవహారంలో క్రిపా అల్వా, ఓ ప్రైవేట్ టీవీ ఛానల్ అధిపతి పాత్రపైనా అనుమానాలు వ్యక్తం చేశారు.

మరోవైపు రాష్ట్ర హోంమంత్రి ప్రియాంక్ ఖర్గే కేంద్ర దర్యాప్తు సంస్థలను ప్రస్తావిస్తూ బీజేపీపై విమర్శలు చేశారు. కాంగ్రెస్ ప్రభుత్వాన్ని అస్థిరపరిచేందుకు, పార్టీ నేతలను ఈ కేసులో ఇరికించేందుకు ప్రయత్నాలు జరుగుతున్నాయని ఆరోపించారు.

ఇక బీజేపీ మాత్రం ఈ వ్యవహారంలో జాగ్రత్తగా వ్యవహరిస్తోంది. ఎన్డీఏ భాగస్వామిగా ఉన్న కుమారస్వామికి కొందరు నేతలు మద్దతు తెలిపినప్పటికీ, స్టింగ్ ఆపరేషన్ వెనుక బీజేపీ ఉందన్న ఆరోపణలపై పార్టీ నుంచి స్పష్టమైన స్పందన రాలేదు.

దీంతో ఈ వివాదం కర్ణాటకలో అధికార కాంగ్రెస్, ప్రతిపక్షాల మధ్య రాజకీయ ఆరోపణలకే పరిమితం కాకుండా.. అధికార పార్టీలోని అంతర్గత పరిణామాలను కూడా తెరపైకి తెస్తోంది. పోలీసుల దర్యాప్తులో అసలు సూత్రధారి ఎవరో తేలుతుందా? ఈ వ్యవహారం కాంగ్రెస్‌లో ఎలాంటి పరిణామాలకు దారితీస్తుందో చూడాలి


Read More
Next Story