టీవీకే నేతలే డ్రగ్స్ రాకెట్లలో దొరుకుతున్నారు: పళని స్వామి

నాగపట్టణం జిల్లాలోని తీర ప్రాంతంలో అక్టోబర్ 16, 17 తేదీల్లో డైరెక్టరేట్ ఆఫ్ రెవెన్యూ ఇంటెలిజెన్స్‌ (డీఆర్‌ఐ) అధికారులు నిర్వహించిన తనిఖీల్లో 137 కిలోల క్రిస్టల్ మెథాంఫెటమైన్‌ను స్వాధీనం చేసుకున్నారు. సముద్ర మార్గంలో ఈ మాదకద్రవ్యాలను శ్రీలంకకు తరలించేందుకు ప్రయత్నించినట్లు అధికారులు అనుమానిస్తున్నారు. స్వాధీనం చేసుకున్న డ్రగ్స్ విలువ రూ.100 కోట్లకు పైగా ఉంటుందని అంచనా వేయగా.. వాటి విలువ సుమారు రూ.400 కోట్లు అని పళనిస్వామి పేర్కొన్నారు.

ఈ కేసులో టీవీకే నుంచి బహిష్కరణకు గురైన నాగపట్టణం జిల్లా నేత, న్యాయవాది ఎన్. బూపాలన్‌ను ప్రధాన నిందితుడిగా గుర్తించారు. ఆయనతో పాటు మరో ముగ్గురిని అరెస్టు చేసి, న్యాయస్థానం ఆదేశాలతో జ్యుడీషియల్ కస్టడీకి తరలించారు.

అక్టోబర్ 18న కేంద్ర ఆర్థిక మంత్రిత్వ శాఖ విడుదల చేసిన ప్రకటనలో ఈ స్వాధీనం తమిళనాడు తీర ప్రాంతంలో జరిగిన అతిపెద్ద డ్రగ్స్ పట్టివేతల్లో ఒకటిగా పేర్కొన్న విషయాన్ని పళనిస్వామి ప్రస్తావించారు. రాష్ట్రంలో డ్రగ్స్ నెట్‌వర్క్ విస్తరిస్తోందని ఆరోపిస్తూ, ఈ వ్యవహారంపై ప్రభుత్వం సమాధానం చెప్పాలని డిమాండ్ చేశారు.

ఇటీవల విజయ్ డ్రగ్స్ వ్యతిరేక ప్రచార కార్యక్రమంలో పాల్గొని, యువత మాదకద్రవ్యాలకు దూరంగా ఉండాలని, క్రీడలపై దృష్టి పెట్టాలని పిలుపునిచ్చారు. ఈ నేపథ్యంలో పళనిస్వామి ఆయన వైఖరిని ప్రశ్నించారు. డ్రగ్స్‌ను అరికట్టడంలో రాష్ట్ర పోలీసుల కంటే కేంద్ర దర్యాప్తు సంస్థ డీఆర్‌ఐ కీలక పాత్ర పోషించిందని పేర్కొంటూ, రాష్ట్ర నిఘా వ్యవస్థ పనితీరుపైనా విమర్శలు చేశారు.

మరోవైపు, ఈ కేసుపై వార్తలు ప్రసారం చేస్తున్న మీడియా సంస్థలను టీవీకే నాగపట్టణం పట్టణ కార్యదర్శి పౌల్‌రాజ్ బెదిరిస్తున్నారని పళనిస్వామి ఆరోపించారు. ఈ అంశంపై ముఖ్యమంత్రి స్పందించి, ప్రజలకు వివరణ ఇవ్వాలని కోరారు.

డ్రగ్స్‌ కేసు ప్రస్తుతం దర్యాప్తులో ఉండటంతో.. నిందితులపై వచ్చిన ఆరోపణలకు సంబంధించిన పూర్తి వివరాలు విచారణలో తేలాల్సి ఉంది. ఈ వ్యవహారం రాజకీయంగా ఎలాంటి పరిణామాలకు దారితీస్తుందో చూడాలి.