సోషల్ మీడియా ఇన్ ఫ్లూయెన్సర్ చుక్కలు చూపించిన ఆకతాయిలు
స్వీట్ బాక్స్ పంపాలని అడ్రస్ చెబితే.. వందల కోట్ల విలువైన వస్తువులు క్యాష్ ఆన్ డెలీవరి, ఇల్లు వదిలి పారిపోయిన వీరమణి
దీపావళికి స్వీట్లు పంపిస్తారని ఆశించిన ఓ సోషల్ మీడియా ఇన్‌ఫ్లుయెన్సర్‌కు ఊహించని తలనొప్పి ఎదురైంది. తన ఇంటి చిరునామాను సోషల్ మీడియాలో పంచుకోవడమే ఆయనకు శాపంగా మారింది. గుర్తుతెలియని వ్యక్తులు ఆయన పేరుతో వరుసగా క్యాష్ ఆన్ డెలివరీ ఆర్డర్లు పెట్టడంతో.. ఖరీదైన వస్తువులు ఇంటి ముందు క్యూ కట్టాయి. చివరకు ఆ వేధింపులు భరించలేక ఆయన ఇల్లు విడిచి వెళ్లాల్సి వచ్చింది.
తమిళనాడులోని మదురైకి చెందిన వీరమణి స్థానిక యాసలో హాస్యభరితమైన వీడియోలు చేస్తూ సోషల్ మీడియాలో గుర్తింపు పొందారు. దీపావళి సందర్భంగా తనకు ఎవరైనా స్వీట్ల బాక్స్ పంపిస్తారనే ఉద్దేశంతో ఆయన తన ఇంటి చిరునామాను ఆన్‌లైన్‌లో షేర్ చేశారు. అయితే, కొందరు దీనిని ఆసరాగా తీసుకుని ఆయన పేరుతో ఇష్టానుసారంగా ఆర్డర్లు పెట్టడం ప్రారంభించారు.
అమెజాన్, ఫ్లిప్‌కార్ట్ ద్వారా వాషింగ్ మెషీన్లు, ఫ్రిజ్‌లు, స్మార్ట్‌ఫోన్లు, టీవీలు వంటి ఖరీదైన వస్తువులు ఆయన ఇంటికి చేరాయి. వీటిలో ఒక టీవీ ధర రూ.1.69 లక్షలుగా ఉంది. తాను ఎలాంటి ఆర్డర్లు ఇవ్వకపోవడంతో వీరమణి వాటిని స్వీకరించేందుకు నిరాకరించారు. డెలివరీ కోసం అడిగిన ఓటీపీలను కూడా ఇవ్వలేదు.
మరోవైపు, స్విగ్గీ, జొమాటో నుంచి కూడా ఆహార పదార్థాల డెలివరీలు రావడం మొదలైంది. దీంతో ఇంటికి వచ్చే డెలివరీల సంఖ్య పెరిగిపోయి ఆయనకు తీవ్ర ఇబ్బందులు ఎదురయ్యాయి. కొందరు భారీ యంత్రాలు, జేసీబీ ఎక్స్‌కవేటర్లు, రూ.70 కోట్ల విలువైన సైనిక ట్యాంకులు కూడా ఆర్డర్ చేసినట్లు స్క్రీన్‌షాట్లను సోషల్ మీడియాలో పెట్టారు. అయితే, ఈ ఆర్డర్లన్నీ వాస్తవంగా నమోదయ్యాయా లేదా అన్నది స్పష్టత లేదు.
ఈ పరిణామాలతో విసిగిపోయిన వీరమణి తన ఇంటి నుంచి వీడియో విడుదల చేసి, ఇలాంటి ప్రాంక్స్‌తో తనను ఇబ్బంది పెట్టవద్దని ఫాలోవర్లను కోరారు. స్వీట్ల బాక్స్ కోసం చిరునామా పంచుకుంటే ఇలాంటి పరిస్థితి ఎదురవుతుందని ఊహించలేదని, తన ఇబ్బందిని అర్థం చేసుకుని ఆర్డర్లు ఆపాలని విజ్ఞప్తి చేశారు.
అయితే, ఆయన విజ్ఞప్తి చేసినప్పటికీ డెలివరీలు కొనసాగినట్లు సమాచారం. పగలు, రాత్రి అనే తేడా లేకుండా డెలివరీ సిబ్బంది ఇంటికి వస్తుండటంతో వీరమణి చివరకు అక్కడి నుంచి వెళ్లిపోయారు. ఆయన ఇంటిని సందర్శించిన మీడియా ప్రతినిధులు, ఇతర ఇన్‌ఫ్లుయెన్సర్లకు తాళం వేసి ఉన్న ఇల్లు కనిపించింది.
తాను ప్రయాణంలో ఉన్నానని, ఇక తన చిరునామాను ఎవరూ కనుగొనలేరని వీరమణి తన తాజా వీడియోల్లో పేర్కొన్నారు. ప్రస్తుతం ఆయన ఎక్కడ ఉన్నారనే విషయం తెలియరాలేదు. ఆయన పబ్లిక్ ఫోన్ నంబర్‌కు వచ్చే కాల్స్‌ను కూడా బ్లాక్ చేసినట్లు సమాచారం.
సరదాగా మొదలైన ఈ వ్యవహారం చివరకు ఒక వ్యక్తి తన నివాసాన్ని విడిచిపెట్టే పరిస్థితికి చేరింది. సోషల్ మీడియాలో వ్యక్తిగత చిరునామాలను పంచుకోవడం, వాటిని ఇతరులు దుర్వినియోగం చేయడం వల్ల ఎలాంటి సమస్యలు ఎదురవుతాయో ఈ ఘటన స్పష్టం చేస్తోంది.
