విజయ్ ప్రభుత్వంపై పాత్రికేయ సంఘాల ఆగ్రహం

బుధవారం (జూలై 15) చెన్నైలోని ఓ పోలీస్ స్టేషన్‌లో పోలీసులు విజయన్‌ను అదుపులోకి తీసుకుని గంటల తరబడి విచారించారు. ఈ కేసులో ప్రధాన నిందితుడైన ఒక యూట్యూబర్‌తో అతనికి వాట్సాప్ చాట్ జరిగింది. అయితే ఇది కేవలం వృత్తిపరమైన సంభాషణే అయినప్పటికీ పోలీసులు మాత్రం వాటినేవీ పట్టించుకోకుండా గంటల తరబడి రకరకాల ప్రశ్నలతో వేధించారు.

జూలై 1న, ఉతంగరై అసెంబ్లీ నియోజకవర్గం టీవీకే ఎమ్మెల్యే ఎన్. ఎలయరాజా దాఖలు చేసిన ఫిర్యాదు మేరకు, తిరునవక్కరసు అనే యూట్యూబర్‌తో సహా ముగ్గురిని పోలీసులు అరెస్టు చేశారు. ఈ యూట్యూబర్ మరో ముగ్గురు వ్యక్తులు టీవీకే ప్రభుత్వానికి వ్యతిరేకంగా ఓటు వేయమని తనను బలవంతం చేశారని ఎలయరాజా ఆరోపిస్తూ పోలీసులకు ఫిర్యాదు చేశారు.

ఆ ఎమ్మెల్యేకు రూ. 35 కోట్ల లంచం ఆఫర్ చేశారని ఫిర్యాదులో పేర్కొన్నారు. ఆయన ఆ ఆఫర్‌ను తిరస్కరించడంతో, ఎమ్మెల్యేకు, ఆయన కుటుంబ సభ్యులకు బెదిరింపులు వచ్చినట్లు తెలిసింది.

నటుడు-ముఖ్యమంత్రి జోసెఫ్ విజయ్ నేతృత్వంలోని ఎన్నికైన ప్రభుత్వాన్ని అస్థిరపరిచేందుకు, దాదాపు 15 మంది టీవీకే ఎమ్మెల్యేలను అక్రమ లంచాల ద్వారా ప్రలోభపెట్టేందుకు జరిగిన కుట్రను పోలీసుల విచారణలో వెలికితీసినట్లు సమాచారం. దీని తర్వాత మరిన్ని అరెస్టులు జరిగాయి. ఈ కేసులో ఇప్పటి వరకూ 80 మందికి పైగా సాక్షులను విచారించారు. వీరిలో తమిళనాడులో అత్యంత ప్రజాదరణ పొందిన, విశ్వసనీయమైన న్యూస్ ఛానల్, 'ది ఫెడరల్' సోదర సంస్థ అయిన 'పుతియ తలైమురై'లో సీనియర్ యాంకర్ అయిన విజయన్ కూడా ఉన్నారు.

విచారణ సమయంలో, పోలీసులు తిరునవక్కరసు వాట్సాప్ సంభాషణలను పరిశీలించగా, అందులో విజయన్‌తో జరిగిన సంభాషణలు కనిపించాయి. దీంతో జూలై 15న సమన్లు ​​జారీ చేశారు. అదే రోజు ఆ జర్నలిస్టు విచారణాధికారి ఎదుట హాజరయ్యారు.

సాయంత్రం ఆలస్యంగా అతడిని స్టేషన్‌కు పిలిపించి, గంట తర్వాత రాత్రి 10.30 గంటల ప్రాంతంలో విడుదల చేశారు. ఆ తర్వాత కొన్ని నిమిషాలకే తిరిగి పిలిపించారు. మరుసటి రోజు తెల్లవారుజామున 2 గంటల వరకు అతడిని ప్రశ్నించి, సెల్ ఫోన్‌ను స్వాధీనం చేసుకున్న తర్వాత వదిలిపెట్టారు.

గురువారం (జూలై 16) ఉదయం 11 గంటలకు విజయన్‌ను మళ్లీ స్టేషన్‌కు పిలిపించారు. ఆ, రోజంతా వేచి ఉండేలా చేశారు. సాయంత్రం 6 గంటలకు మరోసారి విచారించారు. దర్యాప్తుకు పూర్తిగా సహకరిస్తానని ఆయన హామీ ఇవ్వడంతో గంటలోపే అతడిని విడుదల చేశారు. అతని మొబైల్ ఫోన్‌ను సవివరమైన డిజిటల్ ఫోరెన్సిక్ విశ్లేషణ కోసం పంపారు.

ఈ కేసులో మొదట సాక్షిగా విజయన్ కు పోలీసులు సమన్లు జారీ చేశారు. ఈ విషయాన్ని ఆయన సంస్థకు తెలియజేసి, తన కార్యక్రమాలను రద్దు చేసుకుని జూలై 15నే పోలీసుల ఎదుట విచారణకు హజరయ్యారు. అయితే పోలీసులు విడుదల చేసిన ప్రకటనలో మాత్రం ఆయనను టార్గెట్ చేసే విధంగా ప్రయత్నాలు జరిగాయి.

కుట్ర సమయంలో అతను చాలాసార్లు నిందితులతో సంప్రదింపులు జరిపాడని, అనేక అభ్యంతరకర పదాలు వాడినట్లు పోలీసులు పేర్కొన్నారు. ఇది జర్నలిస్ట్ పరువుకు నష్టం కలిగించే విధంగా ఉందని, ఆయనకు అసలు ఎలాంటి నేరచరిత్ర లేదని, వివిధ మీడియాలో సంస్థలలో పనిచేసిన అపారమైన అనుభవం ఉందని పాత్రికేయులు చెబుతున్నారు. ఆయన అనేక టెలివిజన్ చర్చలు నిర్వహించేవాడని, అందులో క్రమం తప్పకుండా పాల్గొనేవాడని రాష్ట్రమంతా తెలుసు.

జర్నలిస్టులు తమ షోలకు వచ్చే అతిథులతో ఎలాగైతే సాధారణ వృత్తిపరమైన సంబంధాన్ని కొనసాగిస్తారో, అలాగే ఆయన విజయన్‌తో కూడా కొనసాగించారు. తిరునావుక్కరసు అప్పుడప్పుడు వాట్సాప్ ద్వారా విజయన్‌తో తన అభిప్రాయాలను, ఎన్నికల అంచనాలను పంచుకునేవారు.

ఒకసారి, టీవీకే నేతృత్వంలోని ప్రభుత్వాన్ని కూల్చేందుకు ప్రయత్నాలు జరుగుతున్నాయని ఆయన సూచించారు. విజయన్ వివరాలు అడిగి, వెంటనే ఆ రోజు తన కార్యాలయంలో జరిగిన సంపాదకీయ సమావేశంలో ఆ సమాచారాన్ని, చాట్‌ను పంచుకున్నారు. "ఏదో జరుగుతున్నట్లుంది," అని ఆయన తన సహోద్యోగులతో అన్నారు.

అయితే, మే నెలలో ప్రభుత్వం ఏర్పడినప్పటి నుంచే టీవీకే నేతృత్వంలోని ప్రభుత్వ స్థిరత్వంపై వదంతులు విస్తృతంగా వ్యాపిస్తున్నందున, ఎవరూ దానిని సీరియస్‌గా తీసుకోలేదు. తిరునావుక్కరసును అరెస్టు చేసినప్పుడు, ఛానల్ దానిని మునుపటి సందేశంతో ముడిపెట్టలేదు.

పోలీసులు విజయన్‌ను సాక్షిగా పిలిచినప్పుడు మాత్రమే ఈ విషయం వెలుగులోకి వచ్చింది. ఆయన వెంటనే తన కార్యాలయానికి సమాచారం అందించగా, దర్యాప్తునకు ఇది అవసరమని భావించి పూర్తి సహకారం అందించాలని కార్యాలయం నిర్ణయించింది. ఇంతకుముందు చెప్పినట్లుగా, ఆ జర్నలిస్ట్ తన షెడ్యూల్ చేసిన షోను రద్దు చేసుకుని పోలీస్ స్టేషన్‌కు వెళ్లారు.

సుదీర్ఘ విచారణ వార్త త్వరలోనే వ్యాపించడంతో, రాజకీయ నాయకులు, పాత్రికేయ సంఘాల నుంచి తీవ్ర ప్రతిస్పందనలు వచ్చాయి, చివరికి అది అతని విడుదలకు దారితీసింది. "నేరపూరిత కుట్ర సమయంలో అభ్యంతరకరమైన ఎలక్ట్రానిక్ సమాచార మార్పిడి చేసుకున్నారు.

నిరంతరం సంప్రదింపులలో ఉన్నారు" అనే పదబంధాన్ని ఉపయోగించినందుకు పోలీసుల పత్రికా ప్రకటనను సమాస్ తీవ్రంగా విమర్శించారు. ఆ భాష పాత్రికేయుడి పరువుకు నష్టం కలిగించేదిగా, అతని ప్రతిష్టకు హాని కలిగించేదిగా ఉందని ఆయన అన్నారు.

ప్రభుత్వాన్ని కూలదోయడంపై చర్చలు అప్పటికే బహిరంగంగా జరుగుతున్నప్పుడు, సాధారణ పాత్రికేయ సంప్రదింపులను కుట్రగా చిత్రీకరించడం వ్యక్తిత్వ హననానికి, పత్రికా స్వేచ్ఛపై దాడికి పాల్పడటమేనని, ఒక సాక్షిని నేరస్థుడిలా చూడటం ప్రజాస్వామ్య విలువలను దెబ్బతీస్తుందని ఆయన వాదించారు.

పాత్రికేయులు, సమాచార వనరుల మధ్య జరిగే సాధారణ వృత్తిపరమైన సంభాషణలను, పార్టీలకతీతంగా ఇప్పటికే బహిరంగంగా చర్చించిన రాజకీయ పరిణామాల గురించి సమాచారాన్ని పంచుకోవడంతో సహా కుట్రలో భాగస్వామ్యంగా చిత్రీకరించకూడదని పాత్రికేయ సంఘాలు పేర్కొన్నాయి. పత్రికా స్వేచ్ఛ, సాక్షి పట్ల వ్యవహరించిన తీరు, పాత్రికేయులలో స్వీయ సెన్సార్‌షిప్‌కు దారితీయవచ్చనే అంశాలపై వారు ఆందోళన వ్యక్తం చేశారు.

విజయన్ ను ప్రశ్నించడం, ప్రశ్నలతో వేధించడంపై తమిళనాడు ప్రతిపక్షాలు టీవీకే ప్రభుత్వంపై విమర్శలు గుప్పించాయి. డీఎంకే ఎంపీ కనిమొళి, నామ్ తమిళర్ కచ్చికి చెందిన సీమాన్, తమిళగ వాళ్వూరిమై కచ్చికి చెందిన టి. వేల్మురుగన్, అమ్మ మక్కల్ మున్నేట్ర కజగంకు చెందిన దినకరన్ ఈ చర్యను మీడియాను భయపెట్టేదిగా, ప్రజాస్వామ్య స్వేచ్ఛపై దాడి చేసేదిగా అభివర్ణించారు.

టీవీకే నేతృత్వంలోని కూటమిలో సభ్యుడైన 'విడుదలై చిరుతైగళ్ కచ్చి'కి చెందిన తోల్. తిరుమావళవన్, జర్నలిస్టును ప్రశ్నించడం మానసిక వేధింపులకు పాల్పడటమేనని చెబుతూ పోలీసుల చర్యను తీవ్రంగా ఖండించారు. పాత్రికేయులను బెదిరించడం ప్రజాస్వామ్యానికి మంచిది కాదని, మీడియా సిబ్బందిని భయపెట్టడాన్ని తక్షణమే ఆపాలని ఆయన కోరారు.

ద్రవిడర్ కజగంకు చెందిన కె. వీరమణి కూడా ఈ ఘటనను ఖండించారు. జర్నలిస్టు ఫోన్‌ను వెంటనే తిరిగి ఇవ్వాలని, జర్నలిస్టులను బెదిరించడం ప్రజాస్వామ్య పాలనకు అనుగుణంగా లేదని ఆయన పిలుపునిచ్చారు. దర్యాప్తు కొనసాగుతోందని, కమ్యూనికేషన్లకు సంబంధించిన వాస్తవాలను నిర్ధారించుకోవడానికి విజయన్‌ను ప్రశ్నించినట్లు పోలీసులు తెలిపారు. అవసరమైనప్పుడు ఆయన తప్పనిసరిగా హాజరుకావాలి.