కేరళం మాజీ సీఎం విజయన్ అవినీతి లీలలు
కూతురు, అల్లుడికి ప్రభుత్వ సొమ్ము ధారాదత్తం, హైకోర్టు ఆదేశాలతో కేసు నమోదు
కేరళ రాజకీయాల్లో సంచలనం రేపుతున్న సీఎంఆర్‌ఎల్‌–ఎక్సాలోజిక్‌ కేసులో కీలక పరిణామం చోటుచేసుకుంది. మాజీ ముఖ్యమంత్రి పినరయి విజయన్, ఆయన కుమార్తె వీణా, అల్లుడు పీఏ మహమ్మద్‌ రియాస్‌పై రాష్ట్ర విజిలెన్స్‌ రెండు వేర్వేరు ఎఫ్‌ఐఆర్‌లు నమోదు చేసింది. కోర్టు ఆదేశాల మేరకు ఈ చర్య తీసుకుంది.
వీణా నిర్వహిస్తున్న ఎక్సాలోజిక్‌ సొల్యూషన్స్‌ సంస్థకు కోచిన్‌ మినరల్స్‌ అండ్‌ రూటైల్‌ లిమిటెడ్‌ (సీఎంఆర్‌ఎల్‌) నుంచి జరిగిన చెల్లింపులే ఈ కేసుకు కేంద్రంగా ఉన్నాయి. 2017 నుంచి 2019 మధ్య సాఫ్ట్‌వేర్‌, మేనేజ్‌మెంట్‌, కన్సల్టెన్సీ సేవల పేరుతో ఈ చెల్లింపులు జరిగినట్లు ఆరోపణలు ఉన్నాయి. అయితే, అందుకు తగిన సేవలు అందించకుండానే డబ్బులు చెల్లించారన్నది ప్రధాన అభియోగం.
2023లో ఆదాయపు పన్ను శాఖ తనిఖీలతో ఈ వ్యవహారం వెలుగులోకి వచ్చింది. అనంతరం ఎన్‌ఫోర్స్‌మెంట్‌ డైరెక్టరేట్‌ (ఈడీ), సీరియస్‌ ఫ్రాడ్‌ ఇన్వెస్టిగేషన్‌ ఆఫీస్‌ కూడా దర్యాప్తు చేపట్టాయి. ఈడీ సేకరించిన సమాచారం ఆధారంగా కేసులు నమోదు చేయాలని కోరుతూ కార్యకర్త కేఎం షాజహాన్‌ హైకోర్టును ఆశ్రయించారు. ఈడీ కూడా తన వాదనలు వినిపించింది.
మొదట ఈ వ్యవహారంపై క్రైమ్‌ బ్రాంచ్‌ ప్రత్యేక బృందంతో ప్రాథమిక విచారణ జరపాలని రాష్ట్ర ప్రభుత్వం నిర్ణయించింది. అయితే, ఈడీ సమర్పించిన పత్రాలు, సాక్షుల వాంగ్మూలాలు, ఆర్థిక లావాదేవీల వివరాలు ఎఫ్‌ఐఆర్‌ నమోదుకు సరిపోతాయని హైకోర్టు అభిప్రాయపడింది. దీంతో ప్రాథమిక విచారణకు బదులుగా కేసులు నమోదు చేసి దర్యాప్తు కొనసాగించాలని అక్టోబర్‌ 9న ఆదేశించింది.
ఈ ఆదేశాల మేరకు అక్టోబర్‌ 12న విజిలెన్స్‌ రెండు కేసులు నమోదు చేసింది. వీణాను రెండు కేసుల్లోనూ నిందితురాలిగా చేర్చారు. విజయన్, రియాస్‌పై వచ్చిన ఆరోపణలకు సంబంధించి కూడా దర్యాప్తు జరగనుంది.
మరోవైపు, ఈ ఆరోపణలను పినరయి విజయన్ కుటుంబం, సీపీఎం ఖండించాయి. కేంద్ర దర్యాప్తు సంస్థల చర్యలు రాజకీయ ప్రేరేపితమని పార్టీ ఆరోపిస్తోంది.
తాజాగా ఎఫ్‌ఐఆర్‌లు నమోదవడంతో ఈ వ్యవహారం తదుపరి దర్యాప్తు దశకు చేరింది. ఆరోపణలపై దర్యాప్తులో వెలుగుచూసే అంశాలు, సేకరించే ఆధారాల ఆధారంగా కేసులో తదుపరి పరిణామాలు ఉండనున్నాయి.
