పశ్చిమ బెంగాల్లోని దక్షిణ 24 పరగణాల జిల్లాలో ఎన్నికల అవకతవకలు జరిగాయని నివేదికలు రావడంతో ఎన్నికల సంఘం రీపోలింగ్కు ఆదేశించింది. రెండు అసెంబ్లీ నియోజకవర్గాల్లోని 15 బూత్లలో శనివారం (మే 2) పోలింగ్ కొనసాగుతోందని అధికారులు తెలిపారు.
మగ్రాహత్ పశ్చిమ్ అసెంబ్లీ నియోజకవర్గంలోని 11 పోలింగ్ కేంద్రాలలో డైమండ్ హార్బర్లోని నాలుగు కేంద్రాలలో పునఃపోలింగ్కు ఆదేశించారు. ఉదయం 7 గంటలకు పోలింగ్ ప్రారంభమై సాయంత్రం 6 గంటల వరకు కొనసాగుతుందని అధికారులు తెలిపారు.
"మొదటి గంటలో పోలింగ్ ప్రశాంతంగా జరిగింది. ఎలాంటి హింసాత్మక సంఘటనలు జరగలేదు. రెండు నియోజకవర్గాల్లో తగినంత సంఖ్యలో కేంద్ర బలగాలను మోహరించాము.
వెబ్కాస్టింగ్ కూడా కొనసాగుతోంది. మేము పోలింగ్ ప్రక్రియను పర్యవేక్షిస్తున్నాము" అని ఈసీ అధికారి పీటీఐకి తెలిపారు. ఈ రెండు అసెంబ్లీ నియోజకవర్గాల్లో ఏప్రిల్ 29న జరిగిన రాష్ట్ర ఎన్నికల రెండవ దశలో పోలింగ్ జరిగింది.
రీపోలింగ్ కు ఆదేశం..
రెండు నియోజకవర్గాల రిటర్నింగ్ అధికారులు, పరిశీలకుల నుంచి అందిన నివేదికలు "అత్యవసర పరిస్థితుల" ఆధారంగా రీపోలింగ్ కు ఆదేశం జారీ చేసినట్లు ఎన్నికల సంఘం అధికారి తెలిపారు.
మగ్రాహత్ పశ్చిమ్లో, టీఎంసీకి చెందిన మహమ్మద్ సమీమ్ అహ్మద్ మొల్లా, బీజేపీ అభ్యర్థి గౌర్సుందర్ ఘోష్తో తలపడుతున్నారు. కాంగ్రెస్కు చెందిన అబ్దుల్ మజీద్ హల్దర్, ఐఎస్ఎఫ్ అభ్యర్థి అబ్దుల్ అజీజ్ అల్ హసన్ కూడా బరిలో ఉన్నారు. డైమండ్ హార్బర్ స్థానంలో టీఎంసీ అభ్యర్థి పన్నా లాల్ హల్దర్, బీజేపీకి చెందిన దీపక్ కుమార్ హల్దర్తో పోటీ పడుతున్నారు.
కాంగ్రెస్కు చెందిన గౌతమ్ భట్టాచార్య, సీపీఐ(ఎం)కి చెందిన సమర్ నైయా తదితరులు ఇతర అభ్యర్థులుగా ఉన్నారు. టీఎంసీ జాతీయ ప్రధాన కార్యదర్శి అభిషేక్ బెనర్జీ ప్రాతినిధ్యం వహిస్తున్న డైమండ్ హార్బర్ లోక్సభ నియోజకవర్గంలోని రెండు అసెంబ్లీ స్థానాల్లోని కొన్ని పోలింగ్ కేంద్రాల్లో విపరీతమైన ఎన్నికల అవకతవకలు జరిగాయని బీజేపీ ఆరోపించింది.
ఈ ఆరోపణలను క్షేత్రస్థాయిలో వాస్తవ నిర్ధారణ చేసేందుకు ఈసీ తన ప్రత్యేక పరిశీలకుడు సుబ్రతా గుప్తాను నియమించింది. ఇక్కడి నుంచి వచ్చిన నివేదికల ప్రకారం ఈసీ రీపోలింగ్ కు ఆదేశించింది.
పశ్చిమ బెంగాల్ అసెంబ్లీ ఎన్నికలు అపూర్వమైన భద్రతా ఏర్పాట్ల మధ్య ఏప్రిల్ 23, ఏప్రిల్ 29 తేదీలలో రెండు దశల్లో జరిగాయి. మే 4న ఓట్ల లెక్కింపు జరుగుతుంది.
