ఫుడ్ పాయిజన్ కాదు.. ఆత్మహత్య చేసుకున్నారు?

గ్రేటర్ నోయిడాలోని రబుపురా పోలీస్ స్టేషన్ పరిధిలో నాగ్లా శ్రీపదం గ్రామంలో శనివారం ఉదయం మహేశ్, ఆయన భార్య లలిత, వారి ముగ్గురు మైనర్ పిల్లలు ఇంట్లో విగతజీవులుగా కనిపించారు. మృతుల్లో ఒక కుమార్తె, ఇద్దరు కుమారులు ఉన్నారు.

విష ప్రయోగం అనుమానాలు

మొదట కుటుంబ సభ్యులు అంతకుముందు రాత్రి టీ, నూడుల్స్ తిన్న తర్వాత ఫుడ్ పాయిజనింగ్‌కు గురై ఉండవచ్చని అనుమానించారు. అయితే, పోస్టుమార్టం నివేదికలో వారి శరీరాల్లో విషపదార్థాల ఆనవాళ్లు కనిపించినట్లు సమాచారం. దీంతో వైద్యులు ఐదుగురి మృతదేహాల నుంచి అంతర్గత అవయవాల నమూనాలను సేకరించి, పరీక్షల కోసం ప్రయోగశాలకు పంపించారు.

వాయిస్ నోట్‌లో కుటుంబ వివాదం ప్రస్తావన

మహేశ్ మరణానికి ముందు తన మొబైల్ ఫోన్‌లో ఓ వాయిస్ నోట్ రికార్డు చేసినట్లు ఇండియా టుడే నివేదించింది. అందులో తన కుటుంబం ఎదుర్కొంటున్న పరిస్థితులకు తన ఇద్దరు సోదరీమణులు, బావ కారణమని మహేశ్ ఆరోపించినట్లు సమాచారం.

ఈ నేపథ్యంలో ఓ బంధువు ఇచ్చిన ఫిర్యాదు ఆధారంగా పోలీసులు ముగ్గురిపై కేసు నమోదు చేశారు. మహేశ్, ఆయన కుటుంబ సభ్యులను నిందితులు వేధిస్తున్నారనే ఆరోపణలు ఫిర్యాదులో ఉన్నట్లు పోలీసులు తెలిపారు. ఈ కేసులో వారి పాత్రపై విచారణ కొనసాగుతోందని రబుపురా ఎస్‌హెచ్‌ఓ సుజీత్ ఉపాధ్యాయ వెల్లడించారు.

ఆస్తి వివాదమే కారణమా?

మహేశ్ కుటుంబం చాలాకాలంగా ఆస్తి వివాదాన్ని ఎదుర్కొంటున్నట్లు పోలీసుల ప్రాథమిక విచారణలో వెల్లడైంది. ఈ వివాదం కుటుంబ సభ్యుల మరణాలకు దారితీసి ఉండవచ్చని అధికారులు అనుమానిస్తున్నారు. మరోవైపు, వాయిస్ నోట్‌లోని అంశాలు, ఆస్తి వివాదం, మరణాలకు దారితీసిన పరిస్థితులను పోలీసులు క్షుణ్ణంగా పరిశీలిస్తున్నారు. ఫోరెన్సిక్ పరీక్షల నివేదికలు, దర్యాప్తులో వెలుగుచూసే వివరాల ఆధారంగా ఈ ఘటన వెనుక ఉన్న కారణాలు స్పష్టమయ్యే అవకాశం ఉంది