ఒడిశాలో ‘అర్నాబ్’ ప్రభావంతో భారీ వర్షాలు, వరదలు

తుఫాను తొలుత ఆంధ్రప్రదేశ్ వైపు కదులుతుందని అంచనా వేసినా, అనూహ్యంగా దిశ మార్చుకోవడంతో ఒడిశాపై తీవ్ర ప్రభావం పడింది. ముఖ్యంగా గంజాం, గజపతి, కంధమాల్ జిల్లాల్లో భారీ వర్షాలు కురిశాయి. దీంతో నదులు ఉప్పొంగి ప్రవహించడంతో పాటు కొండచరియలు విరిగిపడ్డాయి. కంధమాల్ జిల్లాలో జరిగిన ఇలాంటి ఘటనలో దంపతులు, వారి తొమ్మిది నెలల కుమారుడు మృత్యువాత పడ్డారు. బాధిత కుటుంబానికి ప్రభుత్వం నాలుగు లక్షల రూపాయల చొప్పున పరిహారం ప్రకటించింది.

వరద పరిస్థితిని పరిశీలించిన ముఖ్యమంత్రి మోహన్ చరణ్ మాఝీ ప్రభావిత ప్రాంతాల్లో ఏరియల్ సర్వే నిర్వహించారు. తుఫాను దిశ మారిన వెంటనే కేంద్రం నుంచి సహాయం కోరినట్లు వెల్లడించారు. బాధితులకు తక్షణ సాయం అందించేందుకు నౌకాదళం, కోస్ట్‌గార్డ్‌కు చెందిన నాలుగు హెలికాప్టర్లను వినియోగిస్తున్నారు. గంజాం జిల్లాలో 21 ప్రాంతాలను గుర్తించి హెలికాప్టర్ల ద్వారా ఆహార పొట్లాలను పంపిణీ చేశారు.

మరోవైపు ఎన్డీఆర్ఎఫ్, ఒడిశా డిజాస్టర్ ర్యాపిడ్ యాక్షన్ ఫోర్స్ బృందాలు రంగంలోకి దిగాయి. పడవల సాయంతో వరదల్లో చిక్కుకున్న వారికి ఆహారం అందిస్తున్నాయి. రాష్ట్రవ్యాప్తంగా 313 సహాయక బృందాలను ఏర్పాటు చేయగా, వీటిలో వందకు పైగా బృందాలు గంజాం, గజపతి జిల్లాల్లో పనిచేస్తున్నాయి. ఇప్పటివరకు 23 వేల మందికి పైగా బాధితులను సహాయక శిబిరాలకు తరలించారు.

వరదల కారణంగా గంజాం జిల్లాలో సుమారు 50 వేల మంది, గజపతిలో 30 వేల మంది, కంధమాల్‌లో 12 వేల మంది ప్రభావితమయ్యారు. పరిస్థితి తీవ్రతను దృష్టిలో పెట్టుకుని గంజాం జిల్లాలో సహాయక, పునరావాస కార్యక్రమాల కోసం ప్రభుత్వం అదనంగా 20 కోట్ల రూపాయలు కేటాయించింది. నవంబర్ 2న కేంద్ర బృందం రాష్ట్రంలో పర్యటించి నష్టాన్ని అంచనా వేయనుంది.

గంజాం జిల్లాలో రుషికుల్య నది ఉద్ధృతంగా ప్రవహించడంతో అనేక గ్రామాలు నీటమునిగాయి. వంతెనలు దెబ్బతినడంతో పాటు రహదారులు కొట్టుకుపోయాయి. సోరడా, ఆస్కా, భంజానగర్, పురుషోత్తంపూర్ ప్రాంతాల్లో పరిస్థితి మరింత తీవ్రంగా ఉంది. బాధితులకు అవసరమైన సాయం అందించేందుకు 30 మంది సీనియర్ ఒడిశా అడ్మినిస్ట్రేటివ్ సర్వీస్ అధికారులను ప్రభుత్వం ప్రత్యేకంగా నియమించింది.

ఇదిలా ఉంటే, వాతావరణ శాఖ ముందుగానే హెచ్చరించినా ప్రభుత్వం సరైన ముందస్తు చర్యలు తీసుకోలేదని బీజేడీ, కాంగ్రెస్, వామపక్ష పార్టీలు విమర్శించాయి. అయితే ప్రస్తుతం బాధితులకు ఆహారం, తాగునీరు, వైద్య సదుపాయాలు అందించడమే తమ ప్రధాన లక్ష్యమని ముఖ్యమంత్రి తెలిపారు. దెబ్బతిన్న రహదారులు, వంతెనలను పునరుద్ధరించడంతో పాటు విద్యుత్ సరఫరాను తిరిగి ప్రారంభించాలని అధికారులను ఆదేశించారు.

మరోవైపు బహుదా నదిలో వరద ఉద్ధృతి తగ్గడంతో జాతీయ రహదారి-16పై రాకపోకలు పునఃప్రారంభమయ్యాయి. రైలు సర్వీసులు కూడా తిరిగి ప్రారంభమైనప్పటికీ, కొన్ని మార్గాల్లో నీరు నిలిచిపోవడం, రద్దీ కారణంగా పలు రైళ్లను రద్దు చేశారు లేదా మధ్యలోనే నిలిపివేశారు. మొత్తంగా తుఫాను ప్రభావిత ప్రాంతాల్లో సహాయక, పునరావాస చర్యలు కొనసాగుతున్నాయి. పరిస్థితి సాధారణ స్థితికి చేరుకునే వరకు బాధితులకు అవసరమైన సహాయం అందించడంపై ప్రభుత్వం దృష్టి సారించింది.