అరుణాచల్ ప్రదేశ్ లో భారత్ తో చైనా ‘లడాయి’

ఈ వార్తలు వెలుగులోకి రావడానికి కారణం అసఫిలా సమీపంలోని తక్సింగ్, మాజా, గలేము, పోట్రాంగ్ సరస్సు, తామా చుచు, గాలెన్ సిన్యిక్, శ్రీచు లోయ ప్రాంతాల్లో చైనా కార్యకలాపాలు జరుగుతున్నాయన్న ఆరోపణలే. ఈ ప్రాంతాల్లో పీఎల్‌ఏ నియంత్రణ పెరిగిందని కూడా కొన్ని నివేదికలు పేర్కొన్నాయి.

ఈ అంశాన్ని మొదట స్థానిక గిరిజన సంస్థ నాహ్ వెల్ఫేర్ సొసైటీ ప్రస్తావించింది. స్థానికులు సంప్రదాయంగా పశువుల మేత, అటవీ ఉత్పత్తుల కోసం వినియోగించే భూముల్లో చైనా రహదారులు, వంతెనలు, సైనిక శిబిరాలు నిర్మించిందని ఆ సంస్థ ఆరోపించింది.

అయితే, చైనా తాజాగా భారత భూభాగాన్ని ఆక్రమించిందన్న ఆరోపణలను భారత సైన్యం, అరుణాచల్ ప్రదేశ్ హోంమంత్రి మామా నటుంగ్ ఖండించినట్లు సమాచారం. అలాంటి వార్తలు పుకార్లేనని వారు స్పష్టం చేసినట్లు నివేదికలు చెబుతున్నాయి.

ఇంతకుముందు కూడా పీఎల్‌ఏ 60 కిలోమీటర్ల మేర భారత భూభాగంలోకి చొచ్చుకువచ్చిందంటూ వైరల్ అయిన కొన్ని వీడియోలు పాతవేనని, వాటికి తాజా ఘటనలతో సంబంధం లేదని ప్రెస్ ఇన్ఫర్మేషన్ బ్యూరో (PIB) ఫ్యాక్ట్ చెక్ యూనిట్ వెల్లడించింది.

అయితే తాజాగా వెలుగులోకి వచ్చిన ఫోటోలు, వీడియోలను స్థానికులు, ప్రజాప్రతినిధులు అధికారిక ప్రకటనలకు భిన్నమైన ఆధారాలుగా చూపుతున్నట్లు సమాచారం.

ఈ నేపథ్యంలో కామ్లే జిల్లాకు చెందిన స్థానిక నాయకుడు అజయ్ మూర్టెం ముఖ్యమంత్రికి బహిరంగ లేఖ రాశారు. ఆరోపణలు వచ్చిన ప్రాంతాల్లో క్షేత్రస్థాయిలో పరిశీలన చేపట్టాలని, కేంద్ర హోం మంత్రిత్వ శాఖ, భారత సైన్యం, ఐటీబీపీతో సమన్వయం చేసి వాస్తవాలను నిర్ధారించాలని ఆయన కోరారు. అలాగే ప్రజల్లో నెలకొన్న అనుమానాలను నివృత్తి చేసేలా ప్రభుత్వం అధికారిక ప్రకటన విడుదల చేయాలని విజ్ఞప్తి చేశారు.

సరిహద్దు ప్రాంతాల్లో నిఘాను మరింత బలోపేతం చేయడంతో పాటు స్థానికుల్లో విశ్వాసాన్ని పెంపొందించే చర్యలు తీసుకోవాలని కూడా ఆయన సూచించారు. ఈ లేఖ ప్రతులను రాష్ట్ర, కేంద్ర హోం మంత్రులకు పంపినట్లు సమాచారం.