బెంగాల్‌లో అవినీతిపై బీజేపీ కఠిన హెచ్చరిక..

ఆదివారం రాత్రి మాట్లాడుతూ, దోపిడీదారులు, అవినీతిపరులు లేదా చట్టవిరుద్ధ కార్యకలాపాలకు పాల్పడే వ్యక్తులతో ఎలాంటి సంబంధాలు పెట్టుకోవద్దని ఆయన సూచించారు. గత ప్రభుత్వంపై ప్రజల్లో తీవ్ర అసంతృప్తికి కారణమైన పద్ధతులను మళ్లీ అనుసరించరాదని, ప్రజలు మార్పు కోసమే బీజేపీకి అధికారం అప్పగించారని గుర్తు చేశారు.

గత టీఎంసీ ప్రభుత్వ హయాంలో అవినీతి, దోపిడీలకు పాల్పడిన కొందరు ఇప్పుడు బీజేపీ నాయకులు, కార్యకర్తలకు చేరువయ్యేందుకు ప్రయత్నిస్తున్నారని, అలాంటి ప్రభావాలకు ఎట్టి పరిస్థితుల్లోనూ లోనుకాకూడదని దిలీప్ ఘోష్ హెచ్చరించారు. కొంతమంది కార్యకర్తలకు ఈ ఒత్తిడిని ఎదుర్కోవడం కష్టంగా మారుతోందని పేర్కొంటూ, అందరూ అప్రమత్తంగా ఉండాలని సూచించారు.

కొత్తగా ఎన్నికైన కొందరు ఎమ్మెల్యేలు రాజకీయ పలుకుబడిని దుర్వినియోగం చేయకుండా జాగ్రత్తపడాలని కూడా ఆయన పరోక్షంగా హెచ్చరించారు. ప్రజలు ఇచ్చిన తీర్పును గౌరవిస్తూ, అధికారాన్ని ప్రజాసేవకే ఉపయోగించాలని అన్నారు.

పార్టీ నాయకుల వ్యవహారశైలిపై నిరంతరం నిఘా కొనసాగుతోందని, పార్టీ సిద్ధాంతాలకు విరుద్ధంగా వ్యవహరించినా లేదా అవినీతిపరులతో సంబంధాలు కొనసాగించినా ఎవరినీ ఉపేక్షించబోమని దిలీప్ ఘోష్ స్పష్టం చేశారు. ఆరు నెలల్లో సమీక్ష నిర్వహించి అవసరమైతే కఠిన చర్యలు తీసుకుంటామని తెలిపారు.

ఇదిలా ఉండగా, ఒక రోజు ముందు నిర్వహించిన 'ఉద్యమి సమాగమ్' కార్యక్రమంలో రాష్ట్ర బీజేపీ అధ్యక్షుడు సమీక్ భట్టాచార్య కూడా పార్టీలో కొన్ని అవకతవకలు వెలుగుచూశాయని అంగీకరించారు. వాటికి బాధ్యులైన వారిపై సంస్థాగత చర్యలు తీసుకుంటామని వెల్లడించారు.

సిండికేట్ వ్యవస్థ ద్వారా సులభంగా డబ్బు సంపాదించే సంస్కృతికి ప్రజలు అలవాటుపడ్డారని పేర్కొంటూ, రాజకీయ ప్రయోజనాల కోసం విద్య, వైద్యం, వ్యాపార రంగాల్లో జోక్యం చేసుకునే ప్రయత్నాలను బీజేపీ కార్యకర్తలు అడ్డుకోవాలని పిలుపునిచ్చారు.

బిల్డర్లను బెదిరించి డబ్బు వసూలు చేయడం, మాజీ టీఎంసీ నేతలను పార్టీలో చేర్చుకోవడానికి డబ్బు తీసుకున్నారనే ఆరోపణల నేపథ్యంలో రాష్ట్రవ్యాప్తంగా వంద మందికిపైగా నాయకులను సస్పెండ్ చేసినట్లు వెల్లడించారు.

అలాగే, రాజకీయ ప్రత్యర్థులపై గుడ్లు విసరడం ద్వారా అవమానించే "ఎగ్ థెరపీ" రాజకీయాలపై కూడా భట్టాచార్య హెచ్చరించారు. ఇటువంటి చర్యలు ప్రజాస్వామ్యానికి మంచివి కావని, అవి ఎప్పుడైనా తిరిగి తమకే ప్రతికూలంగా మారే అవకాశం ఉందని వ్యాఖ్యానించారు.

బెంగాల్‌లో పెట్టుబడులను ఆకర్షించాలంటే వ్యాపారాలను రాజకీయ జోక్యానికి దూరంగా ఉంచాల్సిన అవసరం ఉందని ఆయన పేర్కొన్నారు. రాష్ట్రంలో భయరహిత పెట్టుబడి వాతావరణాన్ని నెలకొల్పేందుకు ప్రభుత్వం కట్టుబడి ఉందని, దోపిడీ నెట్‌వర్క్‌లను తిరిగి ప్రోత్సహించే లేదా వ్యాపారాలకు ఆటంకం కలిగించే వారిపై కఠిన చర్యలు తీసుకుంటామని స్పష్టం చేశారు.