విశాఖలో తీవ్ర నీటి సంక్ష్ఃోభం
వచ్చే ఏడాదికైనా తాగు నీటిని అందిస్తారా
విశాఖపట్నంలో ప్రస్తుతం తాగునీటి సంక్షోభం తీవ్రరూపం దాల్చింది. నగరంలోని ప్రధాన జలాశయాలు అడుగంటిపోవడం, భూగర్భ జలమట్టాలు పడిపోవడంతో నగరవాసులు చుక్క నీటి కోసం అల్లాడిపోతున్నారు. ఎటు చూసినా ఖాళీ కొండీలు, నీటి కోసం ప్రజల ఆవేదనతో విశాఖ తీరం దాహం, దాహం అంటూ హాహాకారాలు చేస్తోంది. ఇటువంటి అత్యవసర పరిస్థితుల్లో ఈ ఏడాది సమస్యను గట్టెక్కించే తక్షణ చర్యలు చేపట్టకుండా, వచ్చే ఏడాది అంటే 2027 నాటికి నగరానికి నీటి సమస్యే లేకుండా చేస్తామని ముఖ్యమంత్రి చంద్రబాబు నాయుడు ప్రకటించడం తీవ్ర విమర్శలకు దారితీసింది. ప్రస్తుత కష్టాలను పట్టించుకోకుండా భవిష్యత్తు వాగ్దానాలు చేయడంపై స్థానికులతో పాటు ప్రతిపక్షాలు మండిపడుతున్నాయి.
ప్రస్తుతం నగరంలోని పలు ప్రాంతాల్లో ప్రజలు రోడ్లపైకి వచ్చి నీటి సమస్యపై పెద్ద ఎత్తున నిరసనలు తెలుపుతున్నారు. కనీసం మున్సిపల్ ట్యాంకర్ల ద్వారా అయినా సక్రమంగా నీటిని సరఫరా చేసి తమ దాహం తీర్చాలని మహిళలు, స్థానికులు డిమాండ్ చేస్తున్నారు. ప్రైవేట్ ట్యాంకర్ల దోపిడీ భారంగా మారిన తరుణంలో, ప్రభుత్వ ఉచిత ట్యాంకర్ల యాజమాన్యం కూడా లోపభూయిష్టంగా మారిందని ఆవేదన వ్యక్తం చేస్తున్నారు. ఈ ఏడాది గండం దాటడమే గగనంగా మారిన వేళ, చంద్రబాబు వ్యాఖ్యలు కేవలం రాజకీయ కాలయాపన కోసమేనని విపక్షాలు విమర్శిస్తుండటంతో ఈ అంశం కాస్తా తీవ్ర రాజకీయ చర్చకు దారి తీసింది.
మరోవైపు, ఈ ఏడాది పరిష్కారం కాని నీటి సమస్య కేవలం ఒకే ఒక్క ఏడాదిలో, అంటే వచ్చే ఏడాదికల్లా ఎలా సమసిపోతుందనే సాంకేతిక ప్రశ్నలు తలెత్తుతున్నాయి. ప్రభుత్వం చెబుతున్న దాని ప్రకారం వచ్చే ఏడాది నాటికి పోలవరం ఎడమ ప్రధాన కాలువ (Polavaram Left Main Canal) ద్వారా గోదావరి జలాలను విశాఖకు తరలించి శాశ్వత పరిష్కారం చూపిస్తామని అంటోంది. అందుకోసం చేపట్టిన 10.5 కిలోమీటర్ల పైప్‌లైన్ పనులలో దాదాపు 9 కిలోమీటర్ల మేర పనులు పూర్తయ్యాయని అధికారులు పేర్కొంటున్నప్పటికీ, మిగిలిన పనులు నిర్దేశిత గడువులోగా పూర్తవుతాయా లేదా అనే అనుమానాలు వ్యక్తమవుతున్నాయి.
2027 నాటికి నీటి లభ్యతను భారీగా పెంచే లక్ష్యంతో ప్రతిపాదించిన ఇతర ప్రాజెక్టులు, మౌలిక వసతుల పటిష్ఠీకరణ పనులు ఇంకా ప్రాథమిక లేదా మధ్యంతర దశల్లోనే ఉన్నాయి. నిధుల కొరత, భూసేకరణ, సాంకేతిక సవాళ్లతో కూడిన ఈ భారీ ప్రాజెక్టులను కేవలం ఏడాది కాలంలోనే పూర్తి చేయడం ప్రాక్టికల్‌గా సాధ్యమేనా అని నిపుణులు సైతం పెదవి విరుస్తున్నారు. ఈ నేపథ్యంలో, వచ్చే ఏడాది ప్రాజెక్టుల భవితవ్యం ఎలా ఉన్నా, ప్రస్తుతానికి మాత్రం ఈ ఏడాది నీటి కష్టాల నుంచి విశాఖ నగరానికి తక్షణ ఉపశమనం లభించే సూచనలు కనిపించడం లేదన్నది క్షేత్రస్థాయి వాస్తవం.
Next Story