పవన్ కల్యాణ్‌లో కనిపిస్తోన్న కొత్త యాంగిల్

అయితే, 2024 ఎన్నికల్లో అఖండ విజయం సాధించి, డిప్యూటీ సీఎం బాధ్యతలు చేపట్టాక జనసేనాని శైలిలో, ఆయన స్వరంలో ఊహించని మార్పు కనిపిస్తోంది. ఇటీవల పార్టీ శ్రేణులను ఉద్దేశించి ఆయన చేసిన వ్యాఖ్యలు దీనికి స్పష్టమైన నిదర్శనం. గత 12 ఏళ్లుగా తాను వ్యక్తిగతంగా, ఆర్థికంగా, రాజకీయంగా ఎన్నో అవమానాలను భరించి, నలిగి నలిగి ఈ స్థాయికి వచ్చానని, ఈ సుదీర్ఘ ప్రయాణంలో తాను రాటుదేలానని పవన్ గుర్తుచేశారు. తాను ఒక మాట మాట్లాడుతున్నా లేదా ఒక నిర్ణయం తీసుకుంటున్నా దాని వెనుక ఎంతో కష్టం, లోతైన ఆలోచన ఉంటాయని, కాబట్టి నాయకులు తమ సొంత అజెండాలను పక్కనబెట్టి, తాను చెప్పిన నిర్ణయానికి పూర్తిగా కట్టుబడి ఫాలో అయిపోవాలని కఠినమైన ఆదేశాలు జారీ చేయడం పార్టీలో సరికొత్త చర్చకు దారితీసింది.

ఈ హఠాత్ మార్పు వెనుక బలమైన కారణాలు ఉన్నాయనే టాక్ రాజకీయ వర్గాలలో వినిపిస్తోంది. ముఖ్యంగా డిప్యూటీ సీఎం అయిన తర్వాత తిరుమల లడ్డూ వివాదం, టీటీడీ వ్యవహారాలు, సనాతన ధర్మ పరిరక్షణ బోర్డు ఏర్పాటు, తీవ్రమైన మతపరమైన అంశాలపై పవన్ కల్యాణ్ తీసుకుంటున్న వరుస నిర్ణయాలు పూర్తిగా ఏకపక్షంగా సాగుతున్నాయనే విమర్శలు ఉన్నాయి. గతంలో వలె పార్టీలోని కోర్ కమిటీతో కానీ, సీనియర్ నేతలతో కానీ ఎలాంటి ముందస్తు చర్చలు జరపకుండానే ఆయన నేరుగా పబ్లిక్ ప్లాట్‌ఫారమ్‌లపై హిందూత్వ లైన్ తీసుకుంటున్నారని, ఈ సున్నితమైన అంశాల వల్ల పార్టీ లౌకిక (Secular) ఇమేజ్‌ దెబ్బతింటుందేమోనని జనసేనలోని కొందరు కీలక నాయకులలో అంతర్గతంగా తీవ్ర అసంతృప్తి నెలకొన్నట్లు తెలుస్తోంది.

పార్టీలోని ఈ అంతర్గత భేదాభిప్రాయాలను, అసమ్మతి స్వరాలను ముందే పసిగట్టడం వల్లే పవన్ కల్యాణ్ నేను చెప్పిందే వినండి అనే కఠిన వైఖరిని ప్రదర్శిస్తున్నారనే విశ్లేషణలు వస్తున్నాయి. తన మతపరమైన, సిద్ధాంతపరమైన నిర్ణయాలపై పార్టీలో ఎవరు కూడా ఎదురుప్రశ్న వేయకుండా ఉండేందుకే.. తన 12 ఏళ్ల కష్టాన్ని, అనుభవాన్ని ఒక రక్షణ కవచంగా చూపిస్తూ క్యాడర్‌కు లైన్ దాటవద్దనే స్పష్టమైన సంకేతాలు ఇచ్చారు. గతంలో చర్చల ద్వారా నడిచిన జనసేన, ఇప్పుడు పూర్తిస్థాయిలో పవన్ కల్యాణ్ ఏకఛత్రాధిపత్యం, ఆయన వ్యక్తిగత భావజాలం చుట్టూనే నడవబోతోందనే సంకేతాలు ఈ తాజా పరిణామాల ద్వారా వ్యక్తమవుతున్నాయి.