జనసేన కమిటీలపై పవన్ కల్యాణ్ ఆగ్రహం

ఆంధ్రప్రదేశ్ స్థానిక సంస్థల ఎన్నికల సమయం దగ్గరపడుతున్న వేళ, జనసేన పార్టీ అంతర్గత సమీక్షల్లో ఆసక్తికర పరిణామాలు చోటుచేసుకుంటున్నాయి. మున్సిపల్, పంచాయతీ ఎన్నికల సన్నద్ధత కోసం ఏర్పాటు చేసిన ప్రచార, సమన్వయ కమిటీల పనితీరుపై పార్టీ అధినేత, డిప్యూటీ సీఎం పవన్ కల్యాణ్ తీవ్ర అసంతృప్తి వ్యక్తం చేయడం ఇప్పుడు రాజకీయ వర్గాల్లో హాట్ టాపిక్‌గా మారింది. అసెంబ్లీ ఎన్నికల సమయంలో నాయకులు, కార్యకర్తల్లో కనిపించిన ఉత్సాహం.. కూటమి అధికారంలోకి వచ్చాక క్షేత్రస్థాయిలో ఎందుకు కరువైందని ఆయన బహిరంగంగానే ప్రశ్నించారు. ముఖ్యంగా తన సొంత నియోజకవర్గమైన పిఠాపురంలో ఏర్పాటు చేసిన ఐదుగురు సభ్యుల కమిటీ ప్రజా సమస్యలను పట్టించుకోవడంలో విఫలమైందని మందలించడం, అక్కడ తానే స్వయంగా క్యాంప్ ఆఫీస్ ఏర్పాటు చేయాలని నిర్ణయించడం రాష్ట్రవ్యాప్త కేడర్‌లో చర్చకు దారితీసింది.