స్థానిక ఎన్నికలు..ఎమ్మెల్యేలకు అగ్నిపరీక్ష

2024 అసెంబ్లీ ఎన్నికల్లో కూటమి గాలి వల్ల కొందరు ఎమ్మెల్యేలు భారీ మెజారిటీలతో సులువుగా గెలిచి ఉండవచ్చని పార్టీ అధిష్ఠానం భావిస్తోంది. అయితే, క్షేత్రస్థాయిలో సదరు ఎమ్మెల్యేలకు ఉన్న సొంత బలం ఎంత, ప్రజల్లో వారికి ఉన్న ఆదరణ ఎంత అనేది తెలుసుకోవడానికి చంద్రబాబు ఈ స్థానిక పోరును ఒక బెంచ్‌మార్క్‌గా వాడుకుంటున్నారు. నియోజకవర్గాల్లో రిలాక్స్ మోడ్‌లోకి వెళ్లిన లీడర్లను ఉరుకులు పరుగులు పెట్టించడానికి, నిరంతరం ప్రజలతో మమేకమయ్యేలా చేయడానికి అధిష్ఠానం వ్యూహాత్మకంగా ఈ సరికొత్త ఒత్తిడి తంత్రాన్ని తెరపైకి తెచ్చిందని రాజకీయ విశ్లేషకులు అభిప్రాయపడుతున్నారు. పంచాయతీ ఎన్నికల్లో గెలుపే ఎమ్మెల్యే టికెట్‌కు ప్రామాణికంగా మారడం ద్వారా ఎమ్మెల్యేలపై పార్టీ పట్టును మరింత పెంచుకునే వ్యూహం ఇందులో భాగమని వారు భావిస్తున్నారు.

సాధారణంగా ప్రభుత్వం అధికారంలోకి వచ్చిన కొన్నాళ్లకు సహజంగానే కొంత ప్రభుత్వ వ్యతిరేకత వచ్చే అవకాశం ఉంటుంది. దానికి ముందస్తుగానే చెక్ పెట్టడం, అలాగే పార్టీని నమ్ముకున్న ద్వితీయ శ్రేణి నాయకత్వాన్ని, క్షేత్రస్థాయి క్యాడర్‌ను కాపాడుకోవడం ఈ నిర్ణయం వెనుక ఉన్న మరో ముఖ్య ఉద్దేశం అని టీడీపీ సీనియర్ నేతలు చెబుతున్నారు. ఎమ్మెల్యేలు క్షేత్రస్థాయిలో శ్రమించి తమ అనుచరులను సర్పంచ్‌లుగా, వార్డు మెంబర్లుగా గెలిపించుకుంటేనే రాబోయే రోజుల్లో పార్టీ పునాదులు బలంగా ఉంటాయి. అలా చేయని పక్షంలో భవిష్యత్తులో టికెట్లు మార్చడానికి, అభ్యర్థుల పనితీరును అంచనా వేయడానికి అధిష్ఠానానికి ఇదొక బలమైన రిపోర్ట్ కార్డ్ లాగా ఉపయోగపడనుందనే వారు భావిస్తున్నారు.

మరోవైపు ఈ నిర్ణయంపై టీడీపీ అంతర్గత వర్గాల్లో పెద్ద చర్చే నడుస్తోంది. పంచాయతీ ఎన్నికలు చాలావరకు పార్టీ గుర్తులపై జరగవని, అక్కడ స్థానిక గ్రూపు రాజకీయాలు, కుటుంబాలు, వ్యక్తిగత వివాదాలు ఎక్కువగా ప్రభావం చూపిస్తాయని కొందరు నేతలు వాదిస్తున్నారు. అలాంటి చోట్ల వచ్చే ఓటమికి ఎమ్మెల్యేలను బాధ్యులను చేయడం ఎంతవరకు సమంజసం అని కొందరు అంతర్గతంగా మథనపడుతున్నారు. ఏది ఏమైనా, చంద్రబాబు తీసుకున్న ఈ కఠినమైన నిర్ణయం నియోజకవర్గాల్లో ఎమ్మెల్యేలపై ఒత్తిడిని పెంచి పార్టీని మరింత బలోపేతం చేస్తుందా? లేక నేతల్లో అసంతృప్తికి దారితీస్తుందా? అనేది రాబోయే రోజుల్లో తేలనుంది.