చంద్రబాబు ’ఓటు‘ సూత్రాలు

రాజకీయ నాయకుల లంచాల సొమ్ముపై ముఖ్యమంత్రి చంద్రబాబు నాయుడు చేసిన వ్యాఖ్యలు ఏపీ రాజకీయాల్లో తీవ్ర దుమారం రేపుతున్నాయి. మహిళల ఉచిత బస్సు ప్రయాణ పథకం స్త్రీ శక్తి విజయవంతంగా ఏడాది పూర్తి చేసుకున్న సందర్భంగా, ఆగస్టు 15న అమరావతి పరేడ్ గ్రౌండ్స్ నుండి ఉండవల్లిలోని తన క్యాంప్ కార్యాలయం వరకు ఆయన మహిళలతో కలిసి ఆర్టీసీ పల్లె వెలుగు బస్సులో ప్రయాణించారు. ఈ సందర్భంగా ఓటు విలువ, రాజకీయాల్లో డబ్బు పంపిణీపై సీఎం చేసిన వ్యాఖ్యలు చర్చనీయాంశంగా మారాయి. ఎన్నికల్లో ఓటుకు రూ. 2 వేలు ఇస్తే, గెలిచాక దానికి బదులుగా ప్రజల నుండి రూ. 2 లక్షలు సంపాదించుకుంటారని, వారు దోచుకునే దానిలో ప్రజలకు కేవలం చిల్లర మాత్రమే విదిలిస్తున్నారని చంద్రబాబు పేర్కొన్నారు. అయితే ఈ వ్యాఖ్యలు ఇప్పుడు ఆయనకే రివర్స్ అవుతూ, సోషల్ మీడియాలో సరికొత్త చర్చకు దారితీశాయి.