రోడ్లపైకి వస్తున్న జగన్, ఎప్పట్నుంచంటే..

వైఎస్సార్‌సీపీ అధినేత, మాజీ ముఖ్యమంత్రి వైఎస్ జగన్మోహన్ రెడ్డి తన భవిష్యత్తు రాజకీయ కార్యాచరణపై కీలక ప్రకటన చేశారు. ఈరోజు (బుధవారం, జనవరి 21, 2026) తాడేపల్లిలో ఏలూరు నియోజకవర్గ కార్యకర్తలతో జరిగిన భేటీలో ఆయన ఈ మాట చెప్పారు.

జగన్ తన తదుపరి పాదయాత్రకు ముహూర్తం ఖరారు చేశారు. మరో ఏడాదిన్నర తర్వాత పాదయాత్ర ప్రారంభమవుతుంది. దాదాపు ఏడాదిన్నర పాటు నిరంతరంగా ప్రజల్లోనే ఉంటానని ఆయన ప్రకటించారు. కూటమి ప్రభుత్వ వైఫల్యాలను ఎండగట్టడం, ప్రజలకు అండగా ఉండటం.

ప్రస్తుత చంద్రబాబు నాయుడు ప్రభుత్వంపై జగన్ తీవ్రస్థాయిలో ధ్వజమెత్తారు. రాష్ట్రంలో రెడ్ బుక్ పాలన నడుస్తోందని, ప్రశ్నించే వారిపై అక్రమ కేసులు పెట్టి వేధిస్తున్నారని మండిపడ్డారు. విద్య, వైద్యం, వ్యవసాయ రంగాలను ప్రభుత్వం గాలికి వదిలేసిందని విమర్శించారు. ఫీజు రీయింబర్స్‌మెంట్, వసతి దీవెన బకాయిలు పెండింగ్‌లో ఉన్నాయని, ఆరోగ్యశ్రీ సేవలు మందగించాయని ఆరోపించారు.

మెడికల్ కాలేజీల 'ప్రైవేట్' స్కామ్

ప్రభుత్వ మెడికల్ కాలేజీలను ప్రైవేటీకరించే ప్రయత్నాలను జగన్ తప్పుబట్టారు. "కాలేజీ ప్రభుత్వానిది, సిబ్బందికి జీతాలు ఇచ్చేది ప్రభుత్వం.. కానీ లాభాలు మాత్రం ప్రైవేటు వ్యక్తులకా?" అని ప్రశ్నించారు. తాము అధికారంలోకి రాగానే ఈ స్కామ్‌లపై కఠిన చర్యలు తీసుకుంటామని హెచ్చరించారు.

ఇకపై ప్రతి వారం ఒక్కో నియోజకవర్గ కార్యకర్తలతో నేరుగా భేటీ అవుతానని జగన్ తెలిపారు. "జగన్ ఉన్నప్పుడే బాగుండేది" అని ప్రజలు చర్చించుకుంటున్నారని, కేడర్ అంతా ధైర్యంగా ప్రజల్లో ఉండి పోరాడాలని పిలుపునిచ్చారు. ప్రభుత్వంపై వస్తున్న వ్యతిరేకతను అనుకూలంగా మార్చుకోవడానికి జగన్ తన 'పాదయాత్ర' అస్త్రాన్ని సిద్ధం చేసుకుంటున్నారు. 2027 మధ్యలో ఈ యాత్ర ప్రారంభమయ్యే అవకాశం ఉంది.