గూగుల్-అదానీ డేటా సెంటర్‌పై రాయితీల వర్షమా?

గూగుల్ డేటా సెంటర్ల నిర్వహణకు రోజుకు సగటున 2.7 నుంచి 4.1 మిలియన్ గ్యాలన్ల నీరు అవసరమవుతుందని శర్మ పేర్కొన్నారు. విశాఖలో ఇప్పటికే నీటి కొరత ఉందని, భవిష్యత్తులో పోలవరం నీరు వచ్చినా ప్రజల అవసరాలకు ఇబ్బంది కలగవచ్చని ఆయన హెచ్చరించారు. ప్రజలకు అందాల్సిన నీటిని 10% రాయితీతో గూగుల్ కంపెనీకి ఇస్తామని ప్రభుత్వం హామీ ఇవ్వడం బాధాకరమన్నారు. గూగుల్ తన 100% నీటి అవసరాలను సొంతంగా డీశాలినేషన్ ప్లాంట్ల (సముద్రపు నీటిని శుద్ధి చేసే ప్రక్రియ) ద్వారానే తీర్చుకోవాలని ప్రభుత్వం కచ్చితమైన ఆదేశాలు ఇవ్వాలి అని ఆయన డిమాండ్ చేశారు.

తరులవాడ, ముడసర్లోవ, రాంబిల్లి ప్రాంతాల్లో సుమారు 600 ఎకరాల భూమిని 25% రాయితీతో గూగుల్ కు కట్టబెట్టడాన్ని శర్మ తప్పుబట్టారు. రిజిస్ట్రేషన్ విలువల ప్రకారం ఈ భూముల ధర 2,300 కోట్ల రూపాయల పైనే ఉంటుందని, ప్రభుత్వ నిబంధనల (BSO 24) ప్రకారం ఏడాదికి కనీసంరూ. 230 కోట్ల రూపాయల లీజ్ రెంట్ వసూలు చేయాలని సూచించారు. రైతుల నుంచి బలవంతంగా సేకరించిన భూములకు 2013 భూసేకరణ చట్టం ప్రకారం నష్టపరిహారం చెల్లించాలని, మధ్యవర్తుల ప్రమేయం లేకుండా నిర్వాసితులకు న్యాయం చేయాలని కోరారు.

అంచనాల ప్రకారం.. స్టాంప్ డ్యూటీ మినహాయింపు, GST రీయింబర్స్‌మెంట్, విద్యుత్ చార్జీల్లో రాయితీ వంటివి కలిపితే మొత్తం రాయితీలు 22,000 కోట్ల రూపాయలు దాటుతున్నాయని శర్మ లెక్కగట్టారు. లక్షల కోట్ల లాభాలు గడించే గూగుల్ వంటి కంపెనీలకు ఇన్ని వేల కోట్ల ప్రజాధనాన్ని దానం చేయడం కంటే, ఆ నిధులను ఉత్తరాంధ్రలోని సాగునీటి ప్రాజెక్టులకు ఖర్చు చేస్తే ఈ ప్రాంతం సస్యశ్యామలం అవుతుంది అని ఆయన సూచించారు.

రాష్ట్రంలో అమలులో ఉన్న స్థానిక అభ్యర్థుల ఉపాధి చట్టం-2019 ప్రకారం గూగుల్ డేటా సెంటర్‌లో కనీసం 75% ఉద్యోగాలు స్థానిక యువతకే ఇవ్వాలని శర్మ డిమాండ్ చేశారు. కేవలం ఉద్యోగాలు ఇవ్వడమే కాకుండా, స్థానికులకు అవసరమైన శిక్షణ సౌకర్యాలను గూగుల్ కంపెనీయే స్వయంగా కల్పించేలా ప్రభుత్వం రాతపూర్వక హామీ తీసుకోవాలని ముఖ్యమంత్రికి విన్నవించారు.

గూగుల్ అమెరికా భద్రతా దళాలతో కలిసి పనిచేస్తుందని, అమెరికాలోని 'CLOUD' చట్టం ప్రకారం అక్కడి డేటా విదేశీ శక్తులకు అందుబాటులో ఉండే ప్రమాదం ఉందని శర్మ హెచ్చరించారు. అలాగే, గూగుల్ ను డీమ్డ్ డిస్కామ్ గా గుర్తించడం వల్ల ప్రభుత్వ రంగ సంస్థలైన APEPDCL , APTRANSCOలు భారీగా ఆదాయాన్ని కోల్పోతాయని, ఇది వెనుకబడిన ప్రాంతాల అభివృద్ధికి ఆటంకమని ఆందోళన వ్యక్తం చేశారు. పనులు ప్రారంభించే ముందే ఈ అంశాలపై స్పష్టత ఇచ్చి విశాఖ ప్రజల ప్రయోజనాలను కాపాడాలని ఈఏఎస్ శర్మ తన లేఖలో ప్రభుత్వాన్ని కోరారు.