వెంకటేశా.. నెయ్యిపై ఇంకెన్ని కమిటీలు వేయిస్తావయ్యా స్వామీ!

తిరుమల లడ్డూ ప్రసాదం అంటే కోట్లాది మంది భక్తుల హృదయం, నమ్మకం, భక్తి. కానీ గత రెండేళ్లుగా ఈ పవిత్ర ప్రసాదం చుట్టూ జరుగుతున్న వివాదం, ఆరోపణలు, విచారణలు, కమిటీలు చూస్తుంటే సామాన్య భక్తుడి నోట మాట వినపడుతున్న మాట.. “స్వామీ! అసలు నిజం ఎప్పుడు బయటపడుతుంది?” అని. ఆరోపణలు.. విచారణలు.. కమిటీల మీద కమిటీలు.. ఈ వ్యవహారం ఒక అంతుచిక్కని మిస్టరీలో మారిపోయింది.

సంచలన ఆరోపణ (సెప్టెంబర్ 2024): ముఖ్యమంత్రి చంద్రబాబు నాయుడు వైసీపీ పాలనలో (2019-2024) తిరుమల లడ్డూ నెయ్యిలో గొడ్డు కొవ్వు (beef tallow), పంది కొవ్వు కలిసిందని బహిరంగంగా ఆరోపించారు. ఇది హిందూ భావాలను దెబ్బతీసిందని పెద్ద ఎత్తున ప్రచారం జరిగింది.

SIT దర్యాప్తు – ఊహించని మలుపు (జనవరి 2026): సుప్రీంకోర్టు ఆదేశాల మేరకు సీబీఐ నేతృత్వంలోని SIT బృందం విచారించింది. జంతు కొవ్వు (గొడ్డు/పంది) లేదు అని తేల్చింది. అయితే, పామాయిల్, పామ్ కెర్నల్ ఆయిల్, పామ్ స్టియరిన్ వంటి వెజిటబుల్ ఆయిల్స్ కలిపి సింథటిక్/ఫేక్ నెయ్యి సరఫరా అయిందని నిర్ధారించింది.

సుమారు 68 లక్షల కేజీలు, ₹250 కోట్ల విలువైన అక్రమం జరిగినట్లు ఛార్జ్‌షీట్ దాఖలైంది. టెండర్ నిబంధనలు సడలించడం, నాణ్యత పరీక్షలు లోపించడం వంటి పరిపాలనా వైఫల్యాలు బయటపడ్డాయి.

రిటైర్డ్ IAS అధికారి దినేష్ కుమార్ నేతృత్వంలో ఏర్పాటైన ఈ కమిషన్ గత హయాంలోని టీటీడీ అధికారులు (ఛైర్మన్లు, పాలకమండలి) టెండర్ ప్రక్రియలో లోపాలు చేశారని, కల్తీకి దారి తీశారని నివేదిక ఇచ్చింది.

ఏకసభ్య కమిషన్ నివేదిక అమలు చేయడానికి ప్రభుత్వం తాజాగా త్రిసభ్య కమిటీని ఏర్పాటు చేసింది.

ఛైర్మన్: ప్రభుత్వ ప్రధాన కార్యదర్శి

సభ్యులు: డీజీపీ, న్యాయశాఖ కార్యదర్శి

ఈ కమిటీ ఏకసభ్య నివేదికను అధ్యయనం చేసి, సిఫార్సుల అమలు ప్రణాళిక రూపొందించి, బాధ్యులపై న్యాయపరమైన, డిసిప్లినరీ చర్యలు సూచించి, వారం రోజుల్లో ప్రభుత్వానికి నివేదిక సమర్పించాలి.

విశ్లేషకులు ఎస్. రాము దీన్ని “మెలికలతో కూడిన రాజకీయ-పరిపాలనా వ్యూహం”గా అభివర్ణించారు. నెయ్యి వివాదంతో కాలక్షేపం చేస్తూ ప్రజా సమస్యలను పక్కదోవ పట్టిస్తున్నారని సీపీఐ, సీపీఎం, వైసీపీ నేతలు ఈశ్వరయ్య, వై.శ్రీనివాసరావు, పేర్ని నానీ బాహాటంగానే ఆరోపించారు.

గొడ్డు కొవ్వు ఆరోపణ హిందువుల భావోద్వేగాలను రెచ్చగొట్టింది. SIT నివేదికతో ఆ ఆరోపణ బలహీనపడటంతో, ఇప్పుడు “అధికారుల లోపం, వైసీపీ హయాం”పై దృష్టి మళ్లించి ఎదురుదెబ్బ ఇవ్వడం జరుగుతోందని వైసీపీ నాయకుడు, మాజీ మంత్రి జోగి రమేశ్ ఆరోపించారు.

ఒక కమిటీ నివేదిక వచ్చిన వెంటనే మరొక కమిటీని నీయమించడమేమిటని ఆయన ప్రశ్నించారు.

త్రిసభ్య కమిటీ పూర్తిగా ప్రభుత్వ ఉన్నతాధికారులతో నిండి ఉండటం వల్ల నివేదిక ప్రభుత్వానికి అనుకూలంగా రావడం సులభం. వైసీపీ “రాజకీయ కుట్ర” ఆరోపణలను ఎదుర్కోవడానికి ఇది రక్షణగా మారుతుంది.

నెయ్యిలో గొడ్డు కొవ్వు అని మొదలైన రచ్చ, పామాయిల్ దగ్గరకు వచ్చి, ఇప్పుడు కమిటీల నివేదికల అధ్యయనం వరకు చేరుకుంది. నిజమైన పరిష్కారం కమిటీలతో రాదు, కాదు అనేది తేలిపోతోంది. టీటీడీలో పారదర్శక టెండర్ వ్యవస్థ, కఠిన నాణ్యత నియంత్రణ, శాశ్వత ఆపరేషనల్ మార్పులు రావాలి. అప్పుడు మాత్రమే లడ్డూ ప్రసాదం పవిత్రతపై ఎలాంటి అనుమానం లేకుండా ఉంటుంది.