టిప్పర్ కింద నలిగి నుజ్జైన నలుగురు కూలీలు

పోలీసులు, స్థానికులు తెలిపిన వివరాల ప్రకారం.. కాకినాడ జిల్లాకు చెందిన కొందరు కూలీలు రోజువారీ ఉపాధి పనుల్లో భాగంగా ఉదయం కొవ్వూరు బ్రిడ్జి పరిసర ప్రాంతానికి చేరుకున్నారు. వీరంతా కలిసి రోడ్డు దాటుతున్న తరుణంలో, అతివేగంగా దూసుకొచ్చిన ఒక టిప్పర్ లారీ వారిపైకి దూసుకెళ్లింది. ప్రమాదం ఎంత తీవ్రంగా జరిగిందంటే.. టిప్పర్ కింద పడి నలుగురు కూలీలు ఘటనా స్థలంలోనే ప్రాణాలు కోల్పోయారు. రోడ్డుపై రక్తసిక్తంగా పడి ఉన్న మృతదేహాలను చూసి స్థానికులు కన్నీరుమున్నీరయ్యారు.

ఈ ప్రమాదంలో మరణించిన వారిని వాసంశెట్టి సత్యవతి (60), పాలిక కృష్ణవేణి (35), చిట్టెమ్మ (45), చెల్లూరి అన్నవరం (45)గా పోలీసులు గుర్తించారు. పొట్టకూటి కోసం పనికి వెళ్లిన భార్య, తల్లి, చెల్లి ఇక లేరనే వార్త తెలుసుకున్న మృతుల కుటుంబ సభ్యులు ఘటనా స్థలానికి చేరుకుని శవాల దిబ్బగా మారిన తమ వారిని చూసి గుండెలవిసేలా రోదిస్తున్నారు.

ఈ భీకర ప్రమాదంలో మట్టపర్తి అరుణ కుమారి, పాలిక నాగమణి అనే మరో ఇద్దరు మహిళా కూలీలకు తీవ్ర గాయాలయ్యాయి. ప్రమాదం జరిగిన వెంటనే అప్రమత్తమైన స్థానికులు 108 వాహనం ద్వారా వారిని అత్యవసర చికిత్స నిమిత్తం కాకినాడ ప్రభుత్వ సర్వజన ఆసుపత్రికి (GGH) తరలించారు. ప్రస్తుతం వారి పరిస్థితి విషమంగా ఉన్నట్లు సమాచారం.

ఘటనపై సమాచారం అందుకున్న వెంటనే కాకినాడ పోలీసులు అక్కడికి చేరుకుని ట్రాఫిక్‌ను క్రమబద్ధీకరించారు. మృతదేహాలను పోస్టుమార్టం నిమిత్తం తరలించి, ప్రమాదానికి కారణమైన టిప్పర్ డ్రైవర్ నిర్లక్ష్యంపై కేసు నమోదు చేసి దర్యాప్తు ప్రారంభించారు. అతివేగమే ఈ ప్రమాదానికి ప్రధాన కారణమని ప్రాథమికంగా నిర్ధారించారు.