మీ ఆయన పోలీసైతే బస్సు డ్రైవర్‌ను చెప్పుతో కొడతావా! ఇదేం ఘోరం?

"ఎంతోకాల మీ ఆయన పోలీసైతే మాత్రం బస్ డ్రైవర్‌ను చెప్పుతో కొడతావా తల్లీ! ఇదేం ఘోరం?" అంటూ సామాన్య జనం ఇప్పుడు ముక్కున వేలేసుకుంటున్నారు. విధి నిర్వహణలో ఉన్న ఆర్టీసీ సిబ్బందిపై ఒక మహిళా ప్రయాణికురాలు అమానుషంగా ప్రవర్తించిన తీరు స్థానికంగా కలకలం రేపుతోంది. ఇలాగైతే బస్సులు నడపలేమంటూ ఆర్టీసీ సిబ్బంది వాపోతున్నారు.

అసలేం జరిగింది?

అవనిగడ్డ డిపో మేనేజర్ హనుమంతరావు తెలిపిన వివరాల ప్రకారం.. శుక్రవారం కృష్ణా జిల్లా మోపిదేవిలోని పులిగడ్డ నాలుగు రోడ్ల సెంటర్‌లో విజయవాడ కరకట్ట బస్సు కోసం ప్రయాణికులు వేచి ఉన్నారు. అయితే ఆ స్టాప్‌లో బస్సు ఆగకపోవడంతో ఒక మహిళ తీవ్ర ఆగ్రహానికి గురయ్యారు.

బస్సు ఆగగానే డ్రైవర్ దగ్గరకు వెళ్లిన సదరు ఆ మహిళ.. రెండు చోట్ల చేయి ఎత్తినా ఎందుకు ఆపలేదని నిలదీశారు. ఈ క్రమంలో డ్రైవర్ కూడా గట్టిగానే పరుష పదజాలంతో బదులివ్వడంతో ఆమె సహనం కోల్పోయింది. తన కాలి చెప్పు తీసి డ్రైవర్‌ను ఎడాపెడా కొట్టింది.

అంతటితో ఆమె కోపం చల్లారలేదు. వెంటనే చల్లపల్లి బస్టాండ్ వద్దకు తన బంధువును ఫోన్ చేసి పిలిపించారు. బస్సు అక్కడికి చేరుకోగానే, ఆ బంధువు కూడా డ్రైవర్‌పై మరోసారి చెప్పుతో దాడి చేశారు.

ప్రజా రవాణా వ్యవస్థలో కీలకమైన డ్రైవర్‌పై ఇలా నడిరోడ్డుపై దాడి చేయడం చర్చనీయాంశంగా మారింది. దాడి చేసిన మహిళ ఒక పోలీస్ కానిస్టేబుల్ భార్య కావడంతో, ఈ వ్యవహారం పోలీస్ స్టేషన్ వరకు వెళ్లినా రాజీచేసి పంపించారు. దీంతో ఇప్పటివరకు ఎలాంటి కేసు నమోదు కాలేదని తెలుస్తోంది. చట్టాన్ని రక్షించాల్సిన వారి కుటుంబ సభ్యులే ఇలా నిబంధనలు అతిక్రమించి దాడులకు దిగడంపై ఆర్టీసీ కార్మికులు, స్థానికులు విస్మయం వ్యక్తం చేస్తున్నారు.