సింహాద్రి అప్పన్నా.. నీ నిజ దర్శనం అపురూపమన్నా!

ఉత్తరాంధ్ర ఆరాధ్య దైవం, కలియుగ ప్రత్యక్ష దైవం శ్రీ వరాహ లక్ష్మీనృసింహస్వామి వారి చందనోత్సవం సోమవారం అత్యంత వైభవంగా ప్రారంభమైంది. ఏడాదికి ఒకసారి మాత్రమే లభించే స్వామివారి నిజరూప దర్శనాన్ని చేసుకునేందుకు భక్తులు లక్షలాదిగా తరలివచ్చారు. "గోవిందా.. నృసింహా.." అన్న నామస్మరణతో సింహగిరి క్షేత్రం మారుమోగుతోంది.

రాష్ట్ర ప్రభుత్వం తరఫున హోం మంత్రి వంగలపూడి అనిత స్వామివారికి పట్టువస్త్రాలు సమర్పించారు. రాష్ట్రం సుభిక్షంగా ఉండాలని ఆమె ఈ సందర్భంగా ప్రార్థించారు.

తిరుమల తిరుపతి దేవస్థానం (టీటీడీ) తరఫున అధికారులు స్వామివారికి పట్టువస్త్రాలను సమర్పించి, ప్రత్యేక పూజలు నిర్వహించారు.

ప్రముఖుల రాక...

మంత్రులు కొండపల్లి శ్రీనివాస్, కొల్లు రవీంద్ర సహా పలువురు ప్రజాప్రతినిధులు స్వామివారిని దర్శించుకుని అప్పన్న ఆశీస్సులు పొందారు.

అంతరాలయం, ఉపాలయాలు, ధ్వజస్తంభం, కల్యాణ మండపాన్ని టన్నుల కొద్దీ దేశీ, విదేశీ పుష్పాలతో అత్యంత సుందరంగా అలంకరించారు. ఆలయ ప్రాంగణమంతా రంగురంగుల విద్యుద్దీపాలతో దేదీప్యమానంగా వెలిగిపోతోంది.

భక్తుల సౌకర్యార్థం...

ఎండ తీవ్రతను దృష్టిలో ఉంచుకుని భక్తుల కోసం చలువ పందిళ్లు, మంచినీరు, మజ్జిగ పంపిణీ నిరంతరాయంగా కొనసాగుతోంది. క్యూలైన్లలో భక్తులకు ఇబ్బంది కలగకుండా ఎక్కడికక్కడ సూచిక బోర్డులను ఏర్పాటు చేశారు.

వైశాఖ శుద్ధ తదియ (అక్షయ తృతీయ) నాడు మాత్రమే అప్పన్న స్వామివారి శరీరానికి ఉన్న చందనాన్ని తొలగిస్తారు.

ఏడాది పొడవునా చందన లేపనంతో ‘లింగాకారం’లో దర్శనమిచ్చే స్వామివారు, ఈ ఒక్కరోజే తన అసలు రూపమైన వరాహ-నరసింహ రూపంలో భక్తులకు సాక్షాత్కరిస్తారు. రాత్రి వేళ మళ్లీ కొత్త చందనంతో స్వామివారికి లేపనం చేయడంతో ఈ ఉత్సవం ముగుస్తుంది.

లక్షలాది మంది భక్తులు తరలివస్తున్న నేపథ్యంలో ఎటువంటి అవాంఛనీయ సంఘటనలు జరగకుండా భారీ పోలీస్ బందోబస్తు మధ్య వేడుకలు ప్రశాంతంగా సాగుతున్నాయి. సింహగిరి మెట్ల మార్గం నుంచి ఘాట్ రోడ్డు వరకు భక్తుల కోలాహలం కనిపిస్తోంది.