‘త్యాగాలు చేయండి’ అన్న మోదీపై రాహుల్ ఫైర్..
ఇంధన సంక్షోభం, మార్కెట్ పతనంపై కేంద్రంపై విపక్షాల దాడి
పశ్చిమాసియాలో ఉద్రిక్తతలు, పెరుగుతోన్న ముడి చమురు ధరలు, మార్కెట్ పతనం నేపథ్యంలో ప్రజలకు పొదుపు చర్యలు పాటించాలని ప్రధాని మోదీ ఇచ్చిన పిలుపుపై ప్రతిపక్షాలు తీవ్ర విమర్శలు గుప్పించాయి. కాంగ్రెస్ నేత రాహుల్ గాంధీ ప్రధానిని “కంప్రమైజ్ అయిన ప్రధాని”గా అభివర్ణించగా, సమాజ్వాదీ పార్టీ అధినేత అఖిలేష్ యాదవ్ కేంద్ర ఆర్థిక విధానాలను ప్రశ్నించారు.
హైదరాబాద్లో జరిగిన సభలో ప్రధాని మోదీ మాట్లాడుతూ.. పశ్చిమ ఆసియా సంక్షోభం కారణంగా, దేశ ఆర్థిక వ్యవస్థపై ఒత్తిడి పెరిగే అవకాశం ఉందని చెప్పారు. విదేశీ మారకద్రవ్యాన్ని ఆదా చేసుకోవడానికి ప్రజలు పెట్రోల్, డీజిల్ వినియోగాన్ని తగ్గించాలని, బంగారం కొనుగోళ్లు, విదేశీ ప్రయాణాలను వాయిదా వేసుకోవాలని, వీలైనంత వరకు ప్రజా రవాణా ఉపయోగించాలని సూచించారు. అవసరమైతే కోవిడ్ కాలంలో అమలైన వర్క్ ఫ్రమ్ హోమ్ విధానాలను కూడా తిరిగి పాటించాలని పిలుపునిచ్చారు.
ఈ వ్యాఖ్యలపై స్పందించిన రాహుల్ గాంధీ, ప్రభుత్వం తన వైఫల్యాలను ప్రజలపై మోపుతోందని ఆరోపించారు. “బంగారం కొనవద్దు, విదేశాలకు వెళ్లవద్దు, పెట్రోల్ తక్కువ వాడండి, వంట నూనె తగ్గించండి, ఇంటి నుంచే పని చేయండి అని ప్రజలకు చెబుతున్నారు. ఇవి సలహాలు కావు, ప్రభుత్వ వైఫల్యానికి నిదర్శనం” అని ఆయన ఎక్స్లో పోస్ట్ చేశారు.
‘ప్రభుత్వ వైఫల్యానికి నిదర్శనం..’
దశాబ్దానికి పైగా అధికారంలో ఉన్న ప్రభుత్వం ఇప్పుడు ప్రజలకే భారాన్ని మోపుతోందని ఆయన విమర్శించారు. “తమ బాధ్యత నుంచి తప్పించుకోవడానికి ప్రభుత్వం ప్రజలపైనే బాధ్యతను నెడుతోంది. దేశాన్ని నడిపే సామర్థ్యం ఈ ప్రభుత్వానికి లేకపోయింది” అని రాహుల్ అన్నారు.
ప్రజల కష్టాలకు కేంద్ర ప్రభుత్వ విధానాలే కారణం..
అఖిలేష్ యాదవ్ కూడా కేంద్రంపై తీవ్రస్థాయిలో విమర్శలు చేశారు. ఎన్నికలు ముగిసిన వెంటనే ప్రభుత్వానికి సంక్షోభం గుర్తుకు వచ్చిందని వ్యాఖ్యానించారు. “దేశానికి అసలు సంక్షోభం బీజేపీయే” అని ఆయన అన్నారు.
భారతదేశం ఐదు ట్రిలియన్ డాలర్ల ఆర్థిక వ్యవస్థ అవుతుందని చెబుతూ, మరోవైపు ప్రజలను ఖర్చులు తగ్గించమని అడగడం ఎలా సరైందని? అఖిలేష్ ప్రశ్నించారు. “ఇన్ని ఆంక్షలు పెడుతూ ఆర్థిక వ్యవస్థ ఎలా ఎదుగుతుంది?” అని ఆయన నిలదీశారు.
అంతేకాకుండా రూపాయి విలువ క్షీణతపై కూడా ఆయన ఆందోళన వ్యక్తం చేశారు. “డాలర్ ధర పెరుగుతుండగా రూపాయి విలువ పడిపోతోంది. ప్రభుత్వ వ్యాఖ్యలు పెట్టుబడిదారుల్లో భయాందోళనలు పెంచుతున్నాయి” అని అన్నారు.
ఇక మార్కెట్లలో కూడా తీవ్ర ఒత్తిడి కనిపించింది. ముడి చమురు ధరలు పెరగడం, పశ్చిమ ఆసియా ఉద్రిక్తతలు మరింత పెరగడంతో దేశీయ స్టాక్ మార్కెట్లు భారీగా క్షీణించాయి. ప్రారంభ ట్రేడింగ్లో బీఎస్ఈ సెన్సెక్స్ 800 పాయింట్లకుపైగా పడిపోగా, నిఫ్టీ 230 పాయింట్లకు పైగా నష్టపోయింది.
అమెరికా-ఇరాన్ మధ్య ఉద్రిక్తతలు పెరుగుతుండటంతో బ్రెంట్ క్రూడ్ ధర బ్యారెల్కు 105 డాలర్లకు చేరింది. దీంతో భారత ఆర్థిక వ్యవస్థపై మరింత ఒత్తిడి పెరుగుతుందనే ఆందోళనలు వ్యక్తమవుతున్నాయి.
మార్కెట్ విశ్లేషకుల ప్రకారం, చమురు ధరల పెరుగుదల కారణంగా భారత కరెంట్ అకౌంట్ లోటు పెరిగే ప్రమాదం ఉంది. విదేశీ పెట్టుబడిదారులు కూడా అమ్మకాల వైపు మొగ్గుచూపడంతో మార్కెట్లపై అదనపు ఒత్తిడి పడుతోంది.
మొత్తంగా, పశ్చిమ ఆసియా సంక్షోభం ప్రభావం దేశ ఆర్థిక వ్యవస్థపై స్పష్టంగా కనిపిస్తుండగా, కేంద్రం తీసుకుంటున్న చర్యలు ఇప్పుడు రాజకీయ విమర్శలకు దారి తీస్తున్నాయి.
