పళని ఆలయ భూమి అక్రమ రిజిస్ట్రేషన్ కేసు.. సీబీసీఐడీ దూకుడు

తమిళనాడులో సంచలనం సృష్టించిన పళని ఆలయ భూ కుంభకోణం కేసులో దర్యాప్తు వేగం పెరిగింది. రూ.100 కోట్ల విలువైన 1.4 ఎకరాల ఆలయ భూమిని అక్రమంగా రిజిస్టర్ చేసి ఆక్రమించేందుకు కుట్ర పన్నిన కేసులో సీబీసీఐడీ నలుగురు కీలక నిందితులను అరెస్ట్ చేసింది. ఈ కేసులో మరికొందరికి కూడా త్వరలో సమన్లు జారీ అయ్యే అవకాశం ఉందని సమాచారం.

అరెస్టయిన వారిలో న్యాయవాది అన్వర్దీన్, ప్రైవేట్ ట్రస్ట్ నిర్వాహకుడు మురుగదాస్, అలాగే భూమి కొనుగోలు చేసినట్లు ఆరోపణలు ఎదుర్కొంటున్న వెల్లతురై సేతుపతి ఉన్నారు. వీరిపై మోసం, నకిలీ పత్రాల తయారీ, నేరపూరిత కుట్ర తదితర సెక్షన్ల కింద కేసులు నమోదు చేశారు.

భూ వివాదం ఎలా మొదలైంది?

ఈ భూమిని 1888లో బాలసముద్రానికి చెందిన కుప్పుస్వామి మణియక్కర్ 1.40 ఎకరాల స్థలాన్ని అరుల్మిగు దండాయుధపాణి స్వామి మఠానికి దానంగా ఇచ్చారు. దానపత్రం ప్రకారం ఈ భూమిని అమ్మడం, బదిలీ చేయడం లేదా వాణిజ్య ప్రయోజనాలకు వినియోగించడం నిషేధం. అయినప్పటికీ, వారసత్వ వివరాల్లో ఉన్న గందరగోళాన్ని ఆసరాగా చేసుకుని కొందరు ఈ భూమిని అక్రమంగా విక్రయించేందుకు ప్రయత్నించినట్లు ఆరోపణలు ఉన్నాయి.

కోర్టులు రద్దు చేసినా మరోసారి రిజిస్ట్రేషన్..

గతంలో ఈ భూమి విక్రయాన్ని మద్రాస్ హైకోర్టు, సుప్రీంకోర్టు రద్దు చేశాయి. అనంతరం హెచ్‌ఆర్&సీఈ శాఖ భూమిని తిరిగి స్వాధీనం చేసుకుని భక్తుల కోసం ఉచిత పార్కింగ్‌గా మార్చింది. అయినప్పటికీ, శాఖ పలుమార్లు హెచ్చరికలు జారీ చేసినా, 2026 మార్చిలో మరోసారి అమ్మకపు దస్తావేజు నమోదు కావడం వివాదానికి దారితీసింది.

మోసం ఎలా బయటపడింది?

ఆలయ ఆస్తుల తనిఖీ సందర్భంగా అక్రమ రిజిస్ట్రేషన్ వెలుగులోకి వచ్చింది. హెచ్‌ఆర్&సీఈ ఫిర్యాదు మేరకు పోలీసులు కేసు నమోదు చేశారు. సంబంధిత సబ్-రిజిస్ట్రార్‌తో పాటు జిల్లా రిజిస్ట్రార్‌ను కూడా సస్పెండ్ చేశారు. అనంతరం మద్రాస్ హైకోర్టు మదురై బెంచ్ ఆ రిజిస్ట్రేషన్‌ను చెల్లదని ప్రకటించింది.

సీబీసీఐడీ దర్యాప్తు..

జూలై 15న రాష్ట్ర డీజీపీ ఈ కేసును సీబీసీఐడీకి అప్పగించారు. అధికారులు పలుచోట్ల సోదాలు నిర్వహించి కీలక పత్రాలను స్వాధీనం చేసుకున్నారు. ప్రభుత్వ అధికారులు లేదా ఇతర ప్రభావశీలుల పాత్ర ఉందా అనే కోణంలో కూడా దర్యాప్తు కొనసాగుతోంది.

రాజకీయంగా వేడెక్కిన వివాదం..

ఈ కేసుపై ఏఐఏడీఎంకే సీబీఐ విచారణ కోరుతోంది. సీబీసీఐడీ విచారణపై కూడా అనుమానాలు వ్యక్తం చేస్తోంది. మరోవైపు హిందూ మున్నాని, విశ్వ హిందూ పరిషత్ వంటి సంస్థలు భారీ నిరసనలు చేపట్టాయి. ప్రభుత్వం మాత్రం హోదాతో సంబంధం లేకుండా తప్పు చేసిన ప్రతి ఒక్కరిపై కఠిన చర్యలు తీసుకుంటామని స్పష్టం చేసింది. ప్రస్తుతం ఈ కేసులో మరిన్ని అరెస్టులు జరిగే అవకాశం ఉన్నట్లు తెలుస్తోంది.