తెనాలిలో న్యూడ్ కాల్స్..అనంతలో న్యూడ్ వీడియోస్..వీఆర్ కు సీఐలు
ఈ కేటుగాళ్ల నెట్వర్క్ ఇప్పుడు సామాన్యుడి నుంచి అధికారుల వరకు అందరినీ కలవరపెడుతోంది.
సాంకేతికత శాపంగా మారుతోంది. స్మార్ట్ఫోన్ చేతిలో ఉంటే చాలు అమాయకులను మాయాజాలంలోకి దించి, ఏకాంత క్షణాలను రికార్డ్ చేసి లక్షలాది రూపాయలు కొల్లగొడుతున్న నయా దందా రెండు తెలుగు రాష్ట్రాల్లో ప్రకంపనలు సృష్టిస్తోంది. ఆంధ్రప్రదేశ్లో ఆన్లైన్ దందాలు ముదురుతున్న తరుణంలో.. అటు తెనాలిలో న్యూడ్ వీడియో కాల్స్ రాకెట్ గుట్టురట్టు కాగా, ఇటు అనంతపురంలో పోలీసుల అండతో సాగుతున్న హనీట్రాప్ సామ్రాజ్యం కుప్పకూలింది. ఈ చీకటి దందాలకు బాసటగా నిలిచిన పోలీసు అధికారులపై ఉన్నతాధికారులు కొరడా ఝళిపించడం రాష్ట్రవ్యాప్తంగా సంచలనం రేపుతోంది. అప్రమత్తంగా ఉండకపోతే అందమే ఎరగా అడ్రస్ లేకుండా చేసే ఈ కేటుగాళ్ల నెట్వర్క్ ఇప్పుడు సామాన్యుడి నుంచి అధికారుల వరకు అందరినీ కలవరపెడుతోంది.
తెనాలిలో స్వీటీ-క్యూటీ ముఠా..100 మంది మహిళలతో నయా రొంపి
తెనాలిలోని చెంచుపేట కేంద్రంగా సాగుతున్న భారీ ఆన్లైన్ న్యూడ్ వీడియో కాల్స్ దందాను పోలీసులు ఛేదించడంతో విస్తుపోయే నిజాలు వెలుగులోకి వచ్చాయి. ఈ ముఠా అక్రమ వ్యవహారాలు స్వీటీ .. క్యూటీ అనే పేర్లతో అంతర్జాతీయ పోర్టల్స్ వేదికగా సాగుతున్నాయి. సుమారు 45 నుంచి 60 ఏళ్ల వయసున్న ముగ్గురు మహిళలు ఒక ఇల్లు అద్దెకు తీసుకుని, ఇతర మహిళలను లోబర్చుకుని ఈ చీకటి వ్యాపారాన్ని నడిపిస్తున్నారు. సులువుగా డబ్బు సంపాదించవచ్చనే ఆశ చూపి సుమారు 80 నుంచి 100 మంది మహిళలను, యువతులను ఈ రొంపిలోకి దించినట్లు సమాచారం. వీడియో కాల్లో దుస్తులు లేకుండా కనిపిస్తే ఒక్కో కాల్కు రూ. 500 నుంచి రూ. 1,000 వరకు ఇస్తామంటూ ఎర వేసి వారిని ఈ దందాలో పావులుగా వాడుకుంటున్నారు.
అంతర్జాతీయ పోర్టల్స్.. మాస్క్ల వెనుక మాయాజాలం
ఈ ముఠా ఆపరేషన్ తీరు అత్యంత పకడ్బందీగా సాగుతోంది. స్ట్రిప్చాట్ వంటి అంతర్జాతీయ పోర్టల్స్లో లాగిన్ అయి ప్రపంచవ్యాప్తంగా ఎక్కడి నుంచైనా లాగిన్ అయ్యేలా వీరు దందాను విస్తరించారు. ముందుగా మాస్క్ ధరించి బాధితులతో చాటింగ్ ప్రారంభించి, నగదు చెల్లింపు పూర్తయ్యాక న్యూడ్ కాల్స్ నిర్వహిస్తుంటారని పోలీసులు గుర్తించారు. ఈ ముగ్గురు మహిళా నిర్వాహకులకు సరైన సాంకేతిక పరిజ్ఞానం లేకపోవడంతో, ఒక యువకుడు ఈ వ్యవహారంలో కీలక పాత్ర పోషిస్తున్నట్లు తెలుస్తోంది. ఆన్లైన్ ట్రాన్సాక్షన్స్ చూసుకోవడం, లాగిన్ వివరాలు సెట్ చేయడం, న్యూడ్ కాల్స్కు ఒప్పుకున్న మహిళలను కారులో సీక్రెట్గా అద్దె ఇళ్లకు చేరవేయడం వంటి పనులన్నీ సదరు యువకుడే చక్కబెడుతున్నట్లు పోలీసుల విచారణలో వెల్లడైంది.
అనంతలో హనీట్రాప్.. 2 కోట్ల వసూళ్లు.. లేడీ డాన్ రంగమ్మ అరెస్ట్
అనంతపురం జిల్లాలో అమాయక బాధితులే లక్ష్యంగా సాగుతున్న నయా హనీట్రాప్ ముఠా గుట్టును జిల్లా ఎస్పీ జగదీష్ రట్టు చేశారు. ఈ దందాలో ప్రధాన సూత్రధారిగా వ్యవహరిస్తున్న లేడీ డాన్ రంగమ్మను పోలీసులు అరెస్ట్ చేసి రిమాండ్కు తరలించారు. సమాజంలో గౌరవప్రదమైన హోదాలో ఉన్న వ్యక్తులనే లక్ష్యంగా చేసుకుని సాగుతున్న ఈ ముఠా అరాచకాలు విస్మయానికి గురిచేస్తున్నాయి. వీరి వసూళ్ల పర్వం ఇప్పటివరకు ఏకంగా రూ. 2 కోట్ల మార్కును దాటినట్లు పోలీసుల విచారణలో వెల్లడైంది. రంగమ్మతో పాటు మరో 10 మంది ముఠా సభ్యులను అదుపులోకి తీసుకున్న పోలీసులు, ఈ నెట్వర్క్ వెనుక ఉన్న అసలు రంగును బయటపెట్టారు.
కవ్వించి..కాటేస్తారు..సామాజిక హోదానే వారి పెట్టుబడి
ఈ ముఠా బాధితులను బుట్టలో వేసుకునే తీరు అత్యంత పకడ్బందీగా ఉంటుంది. మొదట సామాజిక హోదా, ఆర్థిక స్థితిగతులు ఉన్న వ్యక్తులను టార్గెట్ చేస్తారు. అనంతరం అందమైన మహిళలను రంగంలోకి దింపి, ఫోన్ కాల్స్ , చాటింగ్లతో పరిచయం పెంచి నమ్మకం కలిగిస్తారు. ఆపై ఏదో ఒక వంకతో వారిని ఒంటరిగా ఉన్న చోటుకో లేదా ఇంటికో పిలిపిస్తారు. ఏకాంతంగా ఉన్న సమయంలో ముఠా సభ్యులు హఠాత్తుగా రంగప్రవేశం చేసి, బాధితుడిని వివస్త్రను చేసి ఫొటోలు, వీడియోలు రికార్డ్ చేస్తారు. అక్కడితో ఆగకుండా నీ వీడియోలు సోషల్ మీడియాలో పెడతాం.. నీ పరువు తీస్తాం అంటూ అసలైన బ్లాక్ మెయిలింగ్ మొదలుపెడతారు. బాధితుడి స్తోమతను బట్టి రూ. 5 లక్షల నుంచి రూ. 25 లక్షల వరకు వసూలు చేస్తూ బాధితుల జీవితాలతో చెలగాటమాడుతున్నారు.
వీఆర్ కు సీఐలు..పోలీసులపై ఎస్పీ కొరడా
ఈ చీకటి దందాల్లో పోలీసుల ప్రమేయం ఉండటం శాఖా పరంగా పెను సంచలనం రేపుతోంది. హనీట్రాప్ ముఠాతో సత్సంబంధాలు ఉన్నట్లు తేలడంతో రాప్తాడు సీఐ శ్రీహర్షను, అలాగే బాధితుల ఫిర్యాదులపై నిర్లక్ష్యం వహించిన అనంతపురం త్రీటౌన్ సీఐ రాజేంద్రనాథ్ యాదవ్ను వీఆర్ (VR)కు పంపుతూ డీఐజీ షిమోషీ ఉత్తర్వులు జారీ చేశారు. మరో 10 మంది పోలీసులు కూడా ఈ ముఠా సభ్యులకు సహకరించారనే ఆరోపణలు వస్తుండటంతో వారిపై కూడా విచారణ కొనసాగుతోంది. త్వరలోనే మరికొంతమంది పోలీసులపై సస్పెన్షన్ వేటు పడే అవకాశం ఉందని ఉన్నతాధికారులు స్పష్టం చేస్తున్నారు. ఖాకీ అధికారుల ప్రమేయం వెలుగులోకి రావడంతో ఈ మొత్తం వ్యవహారం ఇప్పుడు శాఖా పరంగా పెద్ద చర్చకు దారితీసింది.
మరో 10 మంది సస్పెన్షన్?
కేవలం సీఐలకే పరిమితం కాకుండా, ఈ చీకటి దందా వెనుక మరికొంతమంది పోలీసుల హస్తం ఉన్నట్లు విచారణలో వెల్లడవుతోంది. రంగమ్మ ముఠాతో నేరుగా టచ్లో ఉంటూ, బాధితులను భయభ్రాంతులకు గురిచేసి వసూళ్లకు సహకరించారనే ఆరోపణలపై సుమారు 10 మంది పోలీసు సిబ్బందిపై విచారణ కొనసాగుతోంది. వీరిలో కానిస్టేబుళ్ల నుంచి ఎస్సై స్థాయి అధికారుల వరకు ఉన్నట్లు సమాచారం. ఎస్పీ జగదీష్ కొరడా ఝళిపించడంతో, ఈ అక్రమాలకు పాల్పడిన వారందరిపై త్వరలోనే సస్పెన్షన్ వేటు పడే అవకాశం ఉందని పోలీసు వర్గాలు స్పష్టం చేస్తున్నాయి. నిందితులను రక్షించే ప్రయత్నం చేసే ఏ ఒక్కరినీ వదిలిపెట్టబోమని, కఠిన చర్యలు తీసుకుంటామని ఉన్నతాధికారులు హెచ్చరించారు.
రంగమ్మ ముఠా అరెస్ట్: కత్తులు, కట్టల కొద్దీ నగదు స్వాధీనం!
అనంతపురంలో కలకలం రేపిన హనీట్రాప్ కేసులో పోలీసులు కీలక పురోగతి సాధించారు. ఉదయ్ భాస్కర్ అనే వ్యక్తి ధైర్యంగా ముందుకు వచ్చి ఇచ్చిన ఫిర్యాదుతో ఈ ముఠా అరాచకాలు ఒక్కొక్కటిగా వెలుగులోకి వచ్చాయి. ఈ కేసులో ప్రధాన సూత్రధారి రంగమ్మ నాయుడు అలియాస్ చిన్ని నాయుడమ్మతో పాటు ఆమెకు సహకరించిన దబ్బర రాజేష్, జయలక్ష్మి, మల్లేశ్వరి, అనంత కుమారిలను పోలీసులు అరెస్ట్ చేశారు. వీరి స్థావరంపై దాడి చేసిన సమయంలో నిందితుల వద్ద నుంచి రూ. 13 లక్షల నగదు, రెండు కత్తులు మరియు బాధితుల నుంచి బలవంతంగా సంతకాలు చేయించుకున్న ప్రామిసరీ నోట్లను స్వాధీనం చేసుకోవడం ఈ ముఠా ఎంతటి ప్రమాదకరమైనదో అర్థం చేస్తోంది.
రాజకీయ సంబంధాలపై క్లారిటీ..డీఎస్పీ కీలక వ్యాఖ్యలు
ఈ కేసుకు సంబంధించి డీఎస్పీ శ్రీనివాసులు వెల్లడించిన వివరాలు విస్మయానికి గురిచేస్తున్నాయి. మల్లేశ్వరి, రంగమ్మ నాయుడు పథకం ప్రకారం బాగా డబ్బున్న వారిని, అమాయకులను ఎంచుకుని వల వేసేవారని ఆయన పేర్కొన్నారు. నిందితులు రాజకీయ నేతలతో దిగిన ఫొటోల గురించి ప్రస్తావిస్తూ.. కొందరు నాయకులతో ఫొటోలు ఉన్నంత మాత్రాన ఈ ముఠాకు రాజకీయ పార్టీలతో సంబంధం ఉందని అపోహ పడొద్దు. వారిని ఎవరూ వెనకేసుకు రావాల్సిన అవసరం లేదు అని స్పష్టం చేశారు. అయితే, పరువు పోతుందనే భయంతో బాధితులు ఫిర్యాదు చేయడానికి ముందుకు రాకపోవడం ఈ ముఠాకు కలిసొచ్చిందని, బాధితులు ఎవరైనా ఫిర్యాదు చేస్తే వారి పేర్లను గోప్యంగా ఉంచుతామని పోలీసులు భరోసా ఇస్తున్నారు.
అప్రమత్తతే అజేయమైన ఆయుధం
రాష్ట్రంలో వరుసగా వెలుగులోకి వస్తున్న ఈ అందమైన అరాచకాలు సామాజిక నైతికతను ప్రశ్నించడమే కాకుండా, సామాన్యులను విస్మయానికి గురిచేస్తున్నాయి. పోలీసులు ఉచ్చు బిగిస్తున్నా, కేటుగాళ్లు పాత నేరాలకే సరికొత్త డిజిటల్ రంగులు పులుముతూ వేట సాగిస్తూనే ఉన్నారు. అందమైన మాటలు, ఆన్లైన్ ప్రలోభాల వెనుక దాగి ఉన్న ఈ మృత్యుపాశాలను గుర్తించకపోతే ఎవరైనా సరే బాధితులుగా మారక తప్పదు. రెచ్చిపోతున్న ఈ ముఠాలకు చెక్ పెట్టాలంటే.. పోలీసుల కఠిన చర్యలతో పాటు ప్రజల్లో అప్రమత్తత కూడా అత్యంత అవసరం. ఆన్లైన్ ప్రపంచంలో అపరిచిత వ్యక్తులతో మీరు పంచుకునే ప్రతి క్షణం.. రేపు మీ పరువును బజారున పెట్టే ఆయుధంగా మారవచ్చు. అందుకే, ఈ మాయాజాలంలో చిక్కుకోకుండా ఉండటమే మంచిది.
Next Story