అర్ధరాత్రి బార్ల ఫోటోలు అవసరం లేదు

మొబైల్ యాప్‌లో ఫోటోలు అప్‌లోడ్ చేయడానికి ప్రత్యామ్నాయంగా డిజిటల్ పద్ధతులను అందుబాటులోకి తెచ్చారు. ఇకపై బార్ల వద్ద ఉన్న సీసీ టీవీ (CCTV) కెమెరాల ఫుటేజీని ఆన్‌లైన్ లేదా ఫిజికల్ ద్వారా పరిశీలించి, నిర్దేశిత సమయానికి బార్ మూసివేతను నిర్ధారించుకోవచ్చని అధికారులు సూచించారు. అంతేకాకుండా, బార్ ప్రతినిధికి నేరుగా వీడియో కాల్ చేసి కూడా బార్ మూసేశారో లేదో చూసి ధృవీకరించుకునే సదుపాయాన్ని కల్పించారు. దీనివల్ల పర్యవేక్షణలో పారదర్శకత దెబ్బతినకుండానే సిబ్బందికి పనిభారం తగ్గుతుందని ప్రభుత్వం భావిస్తోంది.

నిజానికి, అర్ధరాత్రి 12 గంటల సమయంలో విధులకు వెళ్లడం సిబ్బందికి ప్రాణసంకటంగా మారింది. ఇటీవల విశాఖ జిల్లా సీతమ్మధార స్టేషన్‌కు చెందిన హెడ్ కానిస్టేబుల్ ఎల్. సింహాచలం నాయుడు ఇదే పని మీద వెళ్లి వస్తూ రోడ్డు ప్రమాదంలో మరణించిన విషాద ఘటన ఈ మార్పులకు ప్రధాన కారణమైంది. ఈ ఘటనతో అప్రమత్తమైన ప్రభుత్వం, డిజిటల్ పద్ధతుల్లో పర్యవేక్షణకు ప్రాధాన్యత ఇస్తూ ఎక్సైజ్ ఐ యాప్ నిబంధనల్లో మార్పులు చేసింది. ఈ నిర్ణయం పట్ల ఎక్సైజ్ సిబ్బంది హర్షం వ్యక్తం చేస్తూ, ప్రాణాలకు తెగించి అర్ధరాత్రి ప్రయాణాలు చేయాల్సిన అవసరం తప్పిందని సంతోషం వ్యక్తం చేస్తున్నారు.