న్యాయవ్యవస్థ అవినీతి పాఠంపై NCERT క్షమాపణ..

8వ తరగతి సాంఘిక శాస్త్ర పాఠ్యపుస్తకంలో న్యాయవ్యవస్థపై వచ్చిన వివాదాస్పద అధ్యాయం విషయంలో నేషనల్ కౌన్సిల్ ఆఫ్ ఎడ్యుకేషనల్ రీసర్చ్ అండ్ ట్రైయినింగ్ (NCERT) బేషరతుగా క్షమాపణలు తెలిపింది.

ధిక్కార కేసు విచారణకు ఒక రోజు ముందు NCERT ఈ ప్రకటన విడుదల చేసింది. అలాగే సంబంధిత పాఠ్యపుస్తకాన్ని పూర్తిగా ఉపసంహరించుకున్నట్లు తెలిపింది.

వివాదానికి కారణం..

ఇటీవల NCERT 8వ తరగతి సాంఘిక శాస్త్రం కోసం “Exploring Society: India and Beyond” అనే పాఠ్యపుస్తకాన్ని ప్రచురించింది. ఇందులో “మన సమాజంలో న్యాయవ్యవస్థ పాత్ర” అనే అధ్యాయం వివాదాస్పదంగా మారింది. ఆ అధ్యాయంలోని కొన్ని అంశాలు న్యాయవ్యవస్థపై ప్రతికూల భావన కలిగించేలా ఉన్నాయని ఆరోపణలు రావడంతో విషయం సుప్రీంకోర్టు దృష్టికి వెళ్లింది.

కోర్టు తీవ్ర అభ్యంతరం..

ఫిబ్రవరి 26న సుప్రీంకోర్టు NCERT డైరెక్టర్‌తో పాటు కేంద్ర పాఠశాల విద్యాశాఖ కార్యదర్శికి షోకాజ్ నోటీసులు జారీ చేసింది. ఈ అంశంపై ఎందుకు ధిక్కార చర్యలు ప్రారంభించకూడదో వివరణ ఇవ్వాలని ఆదేశించింది. అలాగే ఆ పాఠ్యపుస్తకాన్ని తక్షణమే నిలిపివేయాలని, దాని డిజిటల్ కాపీలను అన్ని ప్లాట్‌ఫామ్‌ల నుంచి తొలగించాలని కూడా కోర్టు సూచించింది. విచారణ సందర్భంగా భారత ప్రధాన న్యాయమూర్తి సూర్యకాంత్ NCERT ఇచ్చిన మునుపటి వివరణపై అసంతృప్తి వ్యక్తం చేశారు. కేవలం విచారం వ్యక్తం చేయడం సరిపోదని, బాధ్యులపై చర్యలు అవసరమని వ్యాఖ్యానించారు.

NCERT ప్రకటన..

మంగళవారం విడుదల చేసిన ప్రకటనలో NCERT డైరెక్టర్, సంబంధిత అధికారులు వివాదాస్పద అధ్యాయం ప్రచురణపై “బేషరతుగా, ఎలాంటి అర్హతలు లేకుండా క్షమాపణలు కోరుతున్నామని” తెలిపారు. అలాగే ఆ అధ్యాయం ఉన్న మొత్తం పాఠ్యపుస్తకాన్ని ఉపసంహరించుకున్నామని, ఇకపై అది అందుబాటులో ఉండదని స్పష్టం చేశారు.

బుధవారం విచారణ..

ఈ పరిణామాల నేపథ్యంలో కేసును బుధవారం సుప్రీంకోర్టు విచారించనుంది. NCERT క్షమాపణలు, పుస్తకాన్ని ఉపసంహరించుకున్న నిర్ణయాన్ని కోర్టు పరిశీలించే అవకాశం ఉంది.