అయ్యో.. ఆ చిన్నారి ఆచూకీ తెలియకుండానే పెంపుడు కుక్క చనిపోయిందే!

ఆ చిన్నారి పెంపుడు జంతువూ కన్నుమూసింది. మాటరాని ఆ మూగజీవి తన ఫ్రెండ్ జాడ చెప్పకుండానే చచ్చిపోయింది. 5 రోజులుగా అన్నం, నీళ్లు లేవు. కడుపు నిండా ఆకలి, ఒళ్లంతా నీరసం. అయినా సరే, తన చిట్టి యజమానురాలిని వెతికేందుకు ఆ పెంపుడు శునకం శ్వాస ఉన్నంతవరకు పోరాడింది.

ఒంటిపై పోలీసులు అమర్చిన జీపీఎస్ ట్రాకర్‌ను మోస్తూ... ఎండనక, అలసటనక 80 నిమిషాల పాటు, దాదాపు 8 కిలోమీటర్ల మేర చెట్లు, చేమలు, సందుల వెంబడి పరుగెత్తింది. "ఇదిగో ఇక్కడే.. ఇక్కడే నా చిన్నారి ఉంది!" అని సైగలు చేస్తున్నట్టుగా తిరిగి తిరిగి మళ్లీ ఇంటికే చేరుకుంది. కానీ, అంతే... ఆ ఆశల దీపం ఒక్కసారిగా కుప్పకూలింది. అలసిపోయిన ఆ మూగజీవి ప్రాణాలు గాల్లో కలిసిపోయాయి. చిన్నారి ఆచూకీ చెబుతుందనుకున్న ఒకే ఒక్క "సాక్షి" శాశ్వతంగా కన్నుమూసింది.

కాకినాడ జిల్లా తుని మండలం దొండవాక పంచాయతీ సీహెచ్‌ అగ్రహారంలో శనివారం జరిగిన ఈ ఘటన స్థానికులను కన్నీళ్లతో ముంచెత్తింది.

గత శనివారం... అప్పటివరకు ఇంట్లో నవ్వులు పూయించిన రెండేళ్ల చిన్నారి జ్ఞానేశ్వరి ఒక్కసారిగా మాయమైంది. బాలికతో పాటే ఆ ఇంట్లోని పెంపుడు కుక్క కూడా అదృశ్యమైంది. చిన్నారి కోసం తల్లిదండ్రులు తల్లడిల్లిపోతుండగా, మరుసటి రోజు ఆ కుక్క తోటలోని మకాం వద్దకు తిరిగొచ్చింది. అయితే, అక్కడ గుమిగూడిన పోలీసులు, అపరిచిత వ్యక్తులను చూసి భయపడిందో ఏమో... మళ్లీ తోక ఊపుకుంటూ ఎటో పారిపోయింది.

చిన్నారి ఆచూకీ దొరకాలంటే ఈ కుక్కే మనకున్న ఏకైక మార్గమని పోలీసులు భావించారు. ఐదు రోజుల సుదీర్ఘ నిరీక్షణ తర్వాత, ఉత్తర్‌ప్రదేశ్‌కు చెందిన కొందరు యువకులు చాకచక్యంగా ఆ శునకాన్ని పట్టుకున్నారు. పోలీసులు వెంటనే దాని మెడకు ఒక జీపీఎస్ ట్రాకర్‌ను అమర్చారు. "వెళ్లు.. నీ చిన్న స్నేహితురాలు ఎక్కడుందో మాకు చూపించు" అన్నట్టుగా దాన్ని వదిలిపెట్టారు.

మెడలోని ట్రాకర్ ఆధారంగా పోలీసులు దాని వెంటే వెళ్లారు. ఆకలితో నకనకలాడుతున్నా, ఆ మూగజీవి చిన్నారిని వెతకాలనే తపనతో గాల్లో వాసన పీలుస్తూ పరుగెత్తింది. దాదాపు 80 నిమిషాల పాటు ఎగుడుదిగుడు దారుల్లో, పొలాల గట్ల వెంబడి 8 కిలోమీటర్లు తిరిగింది. నిన్నటి నుంచి నోట్లోకి ఒక్క మెతుకు కూడా వెళ్లకపోవడంతో, ఆ పరుగులోనే దాని గుండె వేగం పెరిగింది. అలసట తారాస్థాయికి చేరింది. ఆఖరి ప్రయత్నంగా తిరిగి ఇంటి గడప తొక్కిన ఆ నమ్మకమైన జీవి, ఒక్కసారిగా నేలపై ఒరిగిపోయింది. చూస్తుండగానే ప్రాణాలు విడిచింది.

విశ్వాసానికి నిలువెత్తు రూపంగా నిలిచిన ఆ పెంపుడు కుక్క మరణంతో దొండవాక గ్రామంలో విషాద ఛాయలు అలముకున్నాయి. చిన్నారి ఆచూకీ లభిస్తుందని ఆశగా ఎదురుచూసిన పోలీసులకు, కుటుంబ సభ్యులకు ఈ ఘటన కోలుకోలేని దెబ్బ తీసింది. ఒక కీలకమైన ఆరాధాన్ని దర్యాప్తు బృందం కోల్పోయింది.

మరోవైపు, చిన్నారి జ్ఞానేశ్వరి కోసం గాలింపు చర్యలను పోలీసులు మరింత ముమ్మరం చేశారు. డ్రోన్లు, ప్రత్యేక బృందాలతో గాలిస్తున్నారు. అయితే, సామాజిక మాధ్యమాల్లో ఈ కేసు గురించి వస్తున్న రకరకాల వదంతులు, కథనాలపై తుని గ్రామీణ సీఐ చెన్నకేశవరావు తీవ్రంగా స్పందించారు.

"చిన్నారి అదృశ్యం కేసులో సోషల్ మీడియా వేదికగా ఎలాంటి ఊహాగానాలను, అసత్య ప్రచారాలను నమ్మవద్దు. గందరగోళం సృష్టించడం వల్ల దర్యాప్తునకు ఆటంకం కలుగుతుంది. పోలీసులు అన్ని కోణాల్లోనూ నిష్పక్షపాతంగా దర్యాప్తు చేస్తున్నారు. త్వరలోనే చిన్నారి ఆచూకీ కనిపెడతాం." అని ఆయన స్పష్టం చేశారు.

ఆ పెంపుడు జీవి ప్రాణాలు పణంగా పెట్టి వెతికిన ఆ చిన్నారి క్షేమంగా తిరిగి రావాలని, ఆ తల్లి ఒడిలో చేరాలని ఇప్పుడు దొండవాక గ్రామస్తులంతా దేవుడిని ప్రార్థిస్తున్నారు.