స్వర్ణకారుడిపై దాడి..కిలో బంగారం దోపిడీ

పల్నాడు జిల్లా మాచర్ల నియోజకవర్గం కారంపూడి పట్టణంలో సోమవారం పట్టపగలే భారీ దోపిడీ కలకలం రేపింది. వినుకొండకు చెందిన ఓ స్వర్ణకారుడు ఆర్డర్లపై బంగారు నగలు తయారు చేసి, వివిధ ప్రాంతాల్లోని దుకాణాలకు పంపిణీ చేస్తుంటాడు. ఈ క్రమంలో సోమవారం నాడు తాను తయారు చేసిన ఆభరణాలను కారంపూడిలోని దుకాణదారులకు అప్పగించేందుకు వెళ్తుండగా, మాటు వేసిన దుండగులు అతడిపై మెరుపుదాడి చేశారు. సినీ ఫక్కీలో జరిగిన ఈ ఘటనలో దుండగులు బాధితుడిని అడ్డుకుని, తీవ్రంగా దాడి చేసి అతడి వద్ద ఉన్న బ్యాగును లాక్కొని పరారయ్యారు.