గవర్నర్ తో విజయ్ ఘర్షణాత్మక వైఖరిని అవలంభించబోతున్నారా?

ఎన్నికల తర్వాత మొదట్లో నెలకొన్న జాగ్రత్తతో కూడిన సహకారం కనుమరుగై, దాని స్థానంలో రాజకీయ ఆరోపణలతో కూడిన అస్థిర వాతావరణం నెలకొంది. ప్రభుత్వ వ్యవహరాల్లో లోక్ భవన్ జోక్యం చేసుకుంటోందని టీవీకే ఆరోపిస్తోంది.

అయితే రాజకీయ కక్ష సాధింపు చర్యలు తీసుకుంటున్నారని, కరూర్ తొక్కిసలాట బాధితులతో గవర్నర్ చర్యలు రెండు పక్షాల మధ్య అగాధానికి కారణమైంది. ఇటీవల మదురైలో రాష్ట్ర ప్రభుత్వ అధికారులతో ఆర్లేకర్ సమీక్షలు నిర్వహించి, వైగై నది పునరుద్ధరణలో ప్రభుత్వం విఫలమైతే జోక్యం చేసుకుంటామని హెచ్చరించడంతో ఉద్రిక్తతలు చెలరేగాయి. అంతేకాకుండా, ప్రజల ఫిర్యాదులను నేరుగా లోక్‌భవన్‌కు ఆహ్వానించారు. డిఎంకె, ఏఐఏడిఎంకె, బిజెపి నాయకులు గవర్నర్‌ను విడివిడిగా కలిసి, టివికె ఎమ్మెల్యేలను కొనుగోలు చేస్తుందని ఆరోపించాయి.

41 మంది మరణానికి కారణమైన సెప్టెంబర్ 2025 నాటి కరూర్ తొక్కిసలాట కేసులో సిబిఐ విచారణ ముమ్మరమైంది. 'కీలక సాక్షి' విజయ్‌ను గతంలో ఢిల్లీలో పలుమార్లు ప్రశ్నించారు. ఈ కేసులో ముగ్గురు టివికె మంత్రులపై ఆరోపణలు ఉన్నాయి.

ముఖ్య విషయం ఏమిటంటే, బిజెపి తన వైఖరిని మార్చుకుంది. మొదట్లో ఈ విషాదానికి డిఎంకె నాయకుడు వి. సెంథిల్ బాలాజీని నిందించిన రాష్ట్ర బిజెపి అధ్యక్షుడు నైనార్ నాగేంద్రన్, ఇప్పుడు విజయ్ మధ్యాహ్నం కరూర్ ర్యాలీకి రావాల్సి ఉండగా, సాయంత్రం 7 గంటలకు చేరుకున్నారని వాదిస్తున్నారు.

అందువల్ల ఈ విషాదానికి విజయ్‌కు కొంత బాధ్యత ఉందని ఆయన సూచిస్తున్నారు. గవర్నర్ నేతృత్వంలో కొనసాగుతున్న ఘర్షణల మధ్య, విజయ్, అతని కొత్త ప్రభుత్వంపై మరింత ఒత్తిడి పెంచేందుకు ఈ యూ-టర్న్ ఒక పథకం ప్రకారం వేసిన ఎత్తుగడగా విస్తృతంగా భావిస్తున్నారు.

మరోవైపు, విజయ్, అతని ప్రభుత్వం బీజేపీకి 'పరోక్ష ప్రతినిధి'గా పనిచేస్తున్నారన్న ఆరోపణలను డీఎంకే కొనసాగిస్తోంది. విజయ్ - బీజేపీ నాయకత్వం మధ్య ఒక అవగాహన ఉందనడానికి సాక్ష్యంగా పార్టీ నాయకులు అనేక కీలక సంఘటనలను ఉదహరిస్తున్నారు.

టీవీకే-బీజేపీల మధ్య ఉన్న స్నేహానికి 'సాక్ష్యంగా' వారు సమర్పించిన ఆరోపణల జాబితా ఈ విధంగా ఉంది.

1) పార్టీ రిజిస్ట్రేషన్, పేరు, ఎన్నికల గుర్తు కోసం టీవీకేకు వేగంగా ఆమోదం లభించడం.

2) పార్టీ ప్రారంభమైన వెంటనే విజయ్‌కు వై-కేటగిరీ భద్రత లభించడం, ఒక కొత్త ప్రాంతీయ నాయకుడికి ఇంత త్వరగా అరుదుగా లభించే సౌకర్యం ఇది.

3) విజయ్ ఎంతో ఆసక్తి చూపిన, అందరూ ఎంతగానో కోరుకునే విజిల్ గుర్తును టీవీకే పొందడం.

4) స్పష్టమైన మెజారిటీకి చేరుకోకపోయినా, సంఖ్యాబలాన్ని నిరూపించుకోవడంలో అనేక అడ్డంకులను ఎదుర్కొన్నప్పటికీ, సంకీర్ణ ప్రభుత్వాన్ని ఏర్పాటు చేసేందుకు గవర్నర్ నుంచి టీవీకేకు అవకాశం లభించడం.

5) కొత్త రాష్ట్ర ప్రభుత్వం తొలి అసెంబ్లీ సమావేశాల్లో రెండుసార్లు జాతీయ గీతాన్ని ఆలపించడం, దీనిని గవర్నర్ 'చారిత్రాత్మకం' అని ప్రశంసించారు. దీనికోసం రాష్ట్ర గీతానికి అగౌరవం జరిగిందని డీఎంకే అంటోంది.

6) విజయ్ చివరి చిత్రం 'జన నాయగన్' సెన్సార్ బోర్డు నుంచి అనేక అడ్డంకులను ఎదుర్కొని ఇంకా విడుదల కానప్పటికీ, ఆయన ఈ విషయంలో బీజేపీని నేరుగా సవాలు చేయలేదు.

7) గుర్రపు బేరసారాలకు సంబంధించిన తీవ్రమైన ఆరోపణలు, కరూర్ తొక్కిసలాటపై సీబీఐ విచారణ కొనసాగుతున్నప్పటికీ, కేంద్ర ఏజెన్సీలు గానీ, గవర్నర్ గానీ విజయ్, టీవీకేపై కఠిన చర్యలు తీసుకోలేదు.

ఇప్పుడు టీవీకే ప్రభుత్వానికి హనీమూన్ కాలం ముగిసిపోతుండటంతో, టీవీకే ప్రభుత్వం లోక్‌భవన్ వల్ల కొన్ని ఇబ్బందులను ఎదుర్కొంటోంది. కేరళ గవర్నర్‌గా, తమిళనాడు అదనపు బాధ్యతలతో ఉన్నప్పుడు, అర్లేకర్ గతంలో తిరువనంతపురంలో ఎక్కువ సమయం గడిపేవారు. అయితే ఇప్పుడు, ఆయన తమిళనాడులో ఎక్కువ సమయం గడుపుతున్నట్లు కనిపిస్తోంది, ఇది మరో వివాదానికి కారణమైంది.

వివిధ సమస్యలపై బీజేపీకి వ్యతిరేకంగా గట్టి వైఖరి తీసుకోవడానికి టీవీకే కనబరుస్తున్న మౌనం, అయిష్టత దాని సొంత కూటమి భాగస్వాములలో కూడా స్పష్టమైన అసంతృప్తిని సృష్టించడం ప్రారంభించింది. సీపీఐ రాష్ట్ర కార్యదర్శి ఎం. వీరపాండియన్ బహిరంగంగా నిరాశ వ్యక్తం చేస్తూ, "బీజేపీని వ్యతిరేకించడంలో డీఎంకే వలె టీవీకే అంత దృఢంగా లేదు" అని పేర్కొన్నారు. విజయ్ పార్టీ నుంచి స్పష్టమైన, బలమైన బీజేపీ వ్యతిరేక వైఖరి మాత్రమే తమిళనాడుకు నిజంగా ప్రయోజనం చేకూరుస్తుందని ఆయన హెచ్చరించారు.

బీజేపీని వ్యతిరేకిస్తామని నిర్దిష్ట హామీలు పొందిన తర్వాతే వామపక్ష పార్టీలు టీవీకే ప్రభుత్వానికి మద్దతు ఇచ్చాయని, కాషాయ పార్టీకి వ్యతిరేకంగా దృఢమైన సైద్ధాంతిక నిబద్ధత ఉంటేనే వారి మద్దతు షరతులతో కూడుకున్నదని ఆయన నొక్కి చెప్పారు.

గవర్నర్‌తో జరుగుతున్న ఈ సమాఖ్య ఒత్తిడిని విజయ్ ఎలా నిర్వహిస్తారనేది కీలక ప్రశ్నగా మిగిలింది. రాజకీయ పరిశీలకులు ఆయన సహజమైన మౌనాన్ని గమనిస్తున్నారు. ఆయన సాధారణంగా అప్పటికప్పుడు మీడియా సమావేశాలకు దూరంగా ఉంటారు. తన ప్రధాన అభిమానులను, కార్యకర్తలుగా మారిన వారిని లక్ష్యంగా చేసుకుని సిద్ధం చేసుకున్న ప్రకటనలపై ఆధారపడతారు.

అయితే, ఈ పరిస్థితికి స్పష్టత అవసరం. తమిళనాడు అభివృద్ధి, పెట్టుబడులు, వృద్ధికి ప్రాధాన్యతనిస్తూ, కేంద్రంతో 'గుడ్డి ఘర్షణ'కు దిగబోనని విజయ్ పదేపదే సంకేతాలు ఇచ్చారు. ఆయన బీజేపీ సిద్ధాంతాన్ని వ్యతిరేకిస్తారు కానీ క్రియాత్మక సహకారాన్ని కోరుకుంటారు.

విజయ్ మద్దతుదారులు ఒక ధైర్యమైన వైఖరి కోసం ఎదురుచూస్తున్నారు, కానీ అతని గత చరిత్ర మాత్రం వ్యూహాత్మక ఎత్తుగడలను సూచిస్తోంది. 2029కి ముందు విశ్వసనీయతను పెంచుకోవడానికి ఫలితాలపై, అవినీతి నిరోధంపై, సంక్షేమంపై దృష్టి పెట్టడం, అదే సమయంలో పాలనను పట్టాలు తప్పకుండా కేంద్ర-రాష్ట్ర ఘర్షణను ఉపయోగించుకుని బీజేపీ వ్యతిరేక సెంటిమెంట్‌ను సమీకరించడం.

తన సమాఖ్య స్వయంప్రతిపత్తిని దీర్ఘకాలంగా కాపాడుకుంటున్న రాష్ట్రంలో పాతుకుపోయిన అధికార పోరాటాలను విజయ్ 'నూతన రాజకీయాలు' అధిగమించగలవా లేదా అనే విషయాన్ని రాష్ట్ర బడ్జెట్ సమావేశానికి ముందున్న వారాలు పరీక్షించనున్నాయి.