AI ప్రభావం: భారత్‌లో మ్యాక్‌బుక్, ఐప్యాడ్ ఖరీదు భారీగా పెంపు

మెమరీ చిప్‌ల ధరలు అనూహ్యంగా పెరగడంతో ఆపిల్ సంస్థ భారత్‌తో పాటు ప్రపంచవ్యాప్తంగా ఎంపిక చేసిన మ్యాక్‌బుక్, ఐప్యాడ్ మోడళ్ల ధరలను భారీగా పెంచింది. కొన్ని ఉత్పత్తులపై 20 శాతం నుంచి 42 శాతం వరకు ధరలు పెరిగాయి. AI డేటా సెంటర్ల వల్ల మెమరీ చిప్‌లకు డిమాండ్ పెరగడమే దీనికి ప్రధాన కారణమని కంపెనీ తెలిపింది.

ఏ మోడళ్ల ధరలు పెరిగాయి?

ఆపిల్ ఇండియా వెబ్‌సైట్ ప్రకారం.. M5 Pro చిప్‌తో కూడిన 14 అంగుళాల మ్యాక్‌బుక్ ప్రో ధర రూ.2,49,900 నుంచి రూ.2,99,900కు పెరిగింది. అంటే సుమారు 20 శాతం పెరుగుదల నమోదైంది.

అదే విధంగా 13 అంగుళాల ఐప్యాడ్ ఎయిర్ ధర రూ.84,900 నుంచి రూ.1,19,900కు పెరిగింది. ఇది 41 శాతానికి పైగా పెరుగుదలగా నిలిచింది.

ధరల పెంపునకు కారణం ?

AI డేటా సెంటర్ల విస్తరణతో మెమరీ, స్టోరేజ్ చిప్‌లకు ప్రపంచవ్యాప్తంగా భారీ డిమాండ్ ఏర్పడింది. దీంతో DRAM, NAND వంటి మెమరీ చిప్‌ల ధరలు రికార్డు స్థాయికి చేరాయి. చిప్ తయారీ సంస్థలు తమ ఉత్పత్తిలో ఎక్కువ భాగాన్ని AI రంగానికి కేటాయిస్తుండటంతో కన్స్యూమర్ ఎలక్ట్రానిక్స్ రంగంలో సరఫరా తగ్గింది.

ఆపిల్ చెబుతున్నదేంటి?

ఇప్పటివరకు పెరిగిన వ్యయాన్ని తామే భరించామని, కానీ ఇప్పుడు ధరలు పెంచడం తప్ప మరో మార్గం లేదని ఆపిల్ తెలిపింది. వినియోగదారులకు ఇది ఇబ్బందికరమైన నిర్ణయమే అయినా, పరిస్థితిని ఎదుర్కొనేందుకు ప్రయత్నిస్తున్నామని పేర్కొంది.

నిపుణుల అభిప్రాయం..

మార్కెట్ విశ్లేషకుల ప్రకారం.. సెమీకండక్టర్ ధరల పెరుగుదల వల్ల కంప్యూటర్లు, టాబ్లెట్లు, ఇతర ఎలక్ట్రానిక్ ఉత్పత్తుల తయారీ వ్యయం గణనీయంగా పెరిగింది. గత రెండు త్రైమాసికాలుగా ఆపిల్ ధరలు పెంచకుండా అదనపు ఖర్చును భరించినప్పటికీ, ఇప్పుడు వినియోగదారులపై ఆ భారం మోపాల్సిన పరిస్థితి ఏర్పడింది.

నిపుణుల అంచనా ప్రకారం, AI మౌలిక సదుపాయాల కోసం చిప్‌లకు ఉన్న భారీ డిమాండ్ మరో రెండేళ్ల వరకు కొనసాగొచ్చు. దీంతో ప్రీమియం ఎలక్ట్రానిక్ పరికరాల ధరలు సమీప భవిష్యత్తులో తగ్గే అవకాశాలు తక్కువగా కనిపిస్తున్నాయి.