నీ భర్తను ఇచ్చేయ్..లేదంటే రేప్ కేసు పెడతా

నరసరావుపేట పట్టణానికి చెందిన కర్లకుంట కృష్ణదీప్తి, తన భర్త కాళీ, ముగ్గురు సంతానంతో ఎంతో సంతోషంగా గడుపుతున్న వేళ, మల్లవరపు అభినయ సింధూర రూపంలో వారి జీవితంలోకి ఒక తుపాను ప్రవేశించింది. టీడీపీలో క్రియాశీలకంగా ఉంటూ, తనకు రాజకీయంగా పెద్దల అండదండలు ఉన్నాయని చెప్పుకునే సింధూర.. తాను ఏకంగా ఎమ్మెల్యే కూతురునని, మాజీ మంత్రి ప్రత్తిపాటి పుల్లారావు తనకు మావయ్య అవుతారని చెబుతూ కృష్ణదీప్తి భర్తకు దగ్గరైంది. కేవలం పరిచయంతో మొదలైన ఈ బంధం, పది నెలల కాలంలోనే ఒక నిండు సంసారాన్ని ముక్కలు చేసే స్థాయికి చేరింది. సింధూర మాయలో పడిన భర్త తన కన్నబిడ్డలను, భార్యను వదిలేసి ఇంటికి రావడం మానేయడమే కాకుండా, తన ఉనికినే మరిచిపోయేలా ఆమె తన రాజకీయ పలుకుబడితో అతడిని కట్టడి చేస్తోందని బాధితురాలు ఆవేదన వ్యక్తం చేస్తోంది. పచ్చని సంసారంలో నిప్పులు పోయడమే కాకుండా, ప్రశ్నిస్తే అధికార గర్వంతో బెదిరింపులకు దిగడం ఇప్పుడు పల్నాడు జిల్లాలో చర్చనీయాంశంగా మారింది.

బాధితురాలు కృష్ణదీప్తి తన ఫిర్యాదులో సింధూర ప్రవర్తనను ఒక పథకం ప్రకారం సాగే హనీట్రాప్ ఉదంతంగా అభివర్ణించడం సంచలనం రేపుతోంది. కేవలం తన భర్తను వలలో వేసుకోవడమే కాకుండా, వారి కుటుంబ ఆర్థిక మూలాలను దెబ్బతీసి, ఇప్పుడు ఏకంగా ఆ కాపురాన్నే తుత్తునియలు చేయాలని సింధూర చూస్తోందని ఆమె ఆరోపిస్తోంది. ఈ క్రమంలో సింధూర ఉపయోగిస్తున్న ఆయుధాలు అత్యంత భయంకరమైనవి. నా మాట వినకపోతే నీ భర్తను అక్రమ కేసుల్లో ఇరికిస్తా.. ఒకవేళ నన్ను కాదని నీ దగ్గరకు వస్తే, ఏకంగా నీ భర్తపైనే రేప్ కేసు పెట్టి జీవితాంతం జైలు పాలు చేస్తా అంటూ ఆమె చేస్తున్న హెచ్చరికలు వింటుంటే.. అధికార పార్టీ అండతో ఆమె ఎంతటి తెగింపునకు ఒడిగట్టిందో అర్థమవుతోంది. ఒక పక్క భర్తను దూరం చేయడం, మరోపక్క విడాకులు ఇవ్వాలంటూ ప్రాణహాని తలపెట్టేలా బెదిరించడం చూస్తుంటే, ఇది కేవలం వివాహేతర సంబంధం మాత్రమే కాదు, ఒక సామాన్య కుటుంబాన్ని బలితీసుకునే భారీ కుట్రగా కనిపిస్తోందని బాధితురాలు కన్నీటి పర్యంతమవుతోంది.

ఈ వ్యవహారం ఇప్పటికే పోలీసుల గడప తొక్కినప్పటికీ, అధికార పార్టీ నేత సింధూర ప్రవర్తనలో ఏమాత్రం మార్పు రాకపోవడం గమనార్హం. గతంలోనే బాధితురాలు నరసరావుపేట టూటౌన్ పోలీస్ స్టేషన్‌లో ఫిర్యాదు చేయగా, సీఐ ప్రభాకర్ ఇరువర్గాలకు కౌన్సెలింగ్ ఇచ్చారు. పోలీసుల హెచ్చరికలతో దారిలోకి వచ్చిన భర్త, తన భార్యాపిల్లల కోసం ఇంటికి తిరిగి వచ్చాడు. అయితే, అక్కడే అసలు డ్రామా మొదలైంది. పోలీసులు మందలించినా సరే, తన రాజకీయ ప్రాబల్యాన్ని అడ్డుపెట్టుకుని సింధూర మళ్ళీ వేధింపులు ప్రారంభించింది. నీ భార్యను వదిలి రాకపోతే ఆత్మహత్య చేసుకుంటా" అంటూ ఆమె ఆడుతున్న 'ఎమోషనల్ బ్లాక్ మెయిల్' డ్రామాలు కృష్ణదీప్తి భర్తకు నరకం చూపిస్తున్నాయి. చట్టం తన పని తాను చేస్తున్నట్లు కనిపిస్తున్నా, తెర వెనుక సింధూర చేస్తున్న బెదిరింపుల ముందు పోలీసుల కౌన్సెలింగ్ కూడా నిష్ఫలమైందని బాధితురాలు ఆవేదన వ్యక్తం చేస్తోంది.

ఇప్పటికే ఆర్థిక కష్టాలతో అప్పుల ఊబిలో కూరుకుపోయిన కృష్ణదీప్తి కుటుంబానికి, సింధూర రూపంలో వచ్చిన ఈ రాజకీయ వేధింపులు పిడుగులా మారాయి. అధికార పార్టీ నేతల అండదండలు చూసుకుని ఆమె రెచ్చిపోతుంటే, మాలాంటి సామాన్యులు ఎవరికి చెప్పుకోవాలి? అని బాధితురాలు ప్రశ్నిస్తున్న తీరు గుండెల్ని పిండేస్తోంది. ప్రాణాలకు రక్షణ లేని స్థితిలో, ముగ్గురు చిన్న బిడ్డలను పట్టుకుని ఆమె నేరుగా ఎస్పీ కార్యాలయానికి వచ్చిందంటే పరిస్థితి ఎంత తీవ్రంగా ఉందో అర్థం చేసుకోవచ్చు. న్యాయం జరగని పక్షంలో పిల్లలతో కలిసి ఆత్మహత్యే తమకు మిగిలిన మార్గమని ఆమె చేస్తున్న హెచ్చరికలు ఇప్పుడు అధికారుల గుండెల్లో రైళ్లు పరిగెత్తిస్తున్నాయి. ఈ కేసులో అధికార పార్టీకి చెందిన పెద్దల పేర్లు వినిపిస్తుండటంతో, పోలీసులు ఎంతవరకు నిష్పక్షపాతంగా విచారణ జరుపుతారు? బాధితురాలికి ఆ గండం నుంచి విముక్తి కలిగిస్తారా? అన్నది ఇప్పుడు పల్నాడు జిల్లాలో మిలియన్ డాలర్ల ప్రశ్నగా మారింది.