ఆ అమ్మాయికి పెళ్లయింది, అమ్మా, నేనెళ్లిపోతున్నా!

తిరుపతిలో హృదయ విదారక ఘటన చోటుచేసుకుంది. ప్రేమ వైఫల్యంతో తీవ్ర మనస్తాపానికి గురైన ఓ విద్యార్థి, “అమ్మా… నేనెళ్లిపోతున్నా” అంటూ చివరి సందేశం పంపి ఆత్మహత్యకు పాల్పడటం కలకలం రేపింది. ఈ ఘటన కుటుంబ సభ్యులను, స్నేహితులను విషాదంలో ముంచేసింది.

చిత్తూరు జిల్లా గంగవరం మండలం వేములపల్లి గ్రామానికి చెందిన జయచంద్ర, రాధమ్మ దంపతుల కుమారుడు మహేంద్ర (20) తిరుపతిలోని ఓ ప్రైవేట్ కళాశాలలో బీకాం మూడో సంవత్సరం చదువుతున్నాడు. నగరంలోని వెంకటరమణ లేఅవుట్‌లో గది అద్దెకు తీసుకుని ఇతర విద్యార్థులతో కలిసి నివసిస్తున్నాడు.

కొంతకాలంగా మహేంద్ర ఒక యువతిని ప్రేమిస్తున్నాడు. ఈ విషయం కుటుంబ సభ్యులకు తెలిసిన తర్వాత వారు అతనిని మందలించి, చదువులపై దృష్టి పెట్టాలని సూచించారు. అయితే, వారం రోజుల క్రితం ఆ యువతికి పెళ్లి కావడంతో మహేంద్ర తీవ్రంగా కలత చెందాడు. ఈ సంఘటన అతనిపై మానసికంగా తీవ్ర ప్రభావం చూపినట్లు తెలుస్తోంది.

ఈ నేపథ్యంలో శుక్రవారం అర్ధరాత్రి సుమారు 1.45 గంటల సమయంలో మహేంద్ర తన చిన్నాన్నకు, చెల్లెలికి మొబైల్ ఫోన్ ద్వారా హృదయ విదారక సందేశం పంపాడు. “బాబాయ్, ఈ పని చేస్తున్నందుకు క్షమించండి… అమ్మంటే నాకు చాలా ఇష్టం… ఆమెను బాగా చూసుకోండి” అని పేర్కొన్నాడు. అదే సమయంలో “అమ్మా… నేనెళ్లిపోతున్నా” అంటూ తన ఆఖరి భావోద్వేగాన్ని వ్యక్తం చేశాడు.

సమాచారం అందుకున్న పోలీసులు ఘటనాస్థలికి చేరుకుని మృతదేహాన్ని పోస్టుమార్టం నిమిత్తం తిరుపతిలోని SVRR Government General Hospital (RUYA) కు తరలించారు. తండ్రి ఫిర్యాదు మేరకు కేసు నమోదు చేసి దర్యాప్తు ప్రారంభించినట్లు తిరుపతి పడమర పోలీస్ స్టేషన్ సీఐ రామకృష్ణ తెలిపారు.

ఈ ఘటనతో గ్రామంలో విషాద వాతావరణం నెలకొంది. ప్రేమ విఫలం, ఒత్తిడులు, ఒంటరితనం యువతలో ఎంతటి తీవ్ర పరిణామాలకు దారి తీస్తాయో ఈ ఘటన మరోసారి గుర్తు చేసింది. కుటుంబ సభ్యులు, స్నేహితులు సమయానికి భావోద్వేగ మద్దతు ఇవ్వడం ఎంత అవసరమో ఈ విషాదం తెలియజేస్తోంది.

గమనిక-ఇలాంటి పరిస్థితుల్లో సహాయం అవసరమైతే, ఆత్మహత్యల నివారణ కోసం పనిచేస్తున్న రోహిణి హెల్ప్‌లైన్ను సంప్రదించవచ్చు: +91 40 6620 2000. మనసులో బాధను ఒంటరిగా మోసుకోకుండా, నమ్మకమైన వ్యక్తులతో లేదా నిపుణులతో మాట్లాడడం ఎంతో అవసరం.