'సీమ'కు గండికోట జలాశయంతో నీటి భద్రత

ప్రస్తుత అవసరాలను తీర్చే పథకంగా కాకుండా, రాబోయే 30 సంవత్సరాల గ్రామీణ తాగునీటి అవసరాలను దృష్టిలో ఉంచుకుని జల జీవన్ మిషన్–అమరజీవి జలధార రూపొందించామని ముఖ్యమంత్రి నారా చంద్రబాబు చెప్పారు. నీటి వనరుల లభ్యత, నీటి శుద్ధి, నిల్వ, పంపిణీ, పైప్‌లైన్ వ్యవస్థలను సమగ్రంగా అభివృద్ధి చేసి భవిష్యత్ తరాలకు కూడా తాగునీటి భద్రత కల్పించేలా ప్రణాళిక రూపొందించామని ఆయన చెప్పారు.

"27.36 లక్షల ఇంటింటి కుళాయి కనెక్షన్లు ఏర్పాటు చేయనున్నారు. రాష్ట్రంలో మిగిలిన పనులను పూర్తి చేసి ప్రతి గ్రామీణ కుటుంబానికి కుళాయి కనెక్షన్ అందించేందుకు కార్యాచరణ రూపొందించగా, కేంద్ర ప్రభుత్వం కూడా స్పందించి పనులను పూర్తి చేసేందుకు 2028 డిసెంబర్ వరకు గడువు కల్పించింది" అని సీఎం చంద్రబాబు వెల్లడించారు. రాష్ట్రంలో 32 సమగ్ర తాగునీటి సరఫరా పథకాలు, 50,283 ఏక గ్రామ తాగునీటి సరఫరా పథకాలు చేపట్టడం ద్వారా సుమారు 3.27 కోట్ల గ్రామీణ ప్రజలకు ప్రయోజనం కలుగుతుందని సీఎం చంద్రబాబు తెలిపారు. ఈ కార్యక్రమంలో భాగంగా 1,426 ఎంఎల్‌డీ సామర్థ్యంతో నీటిశుద్ధి కేంద్రాలు, 14,995 నీటి నిల్వ నిర్మాణాలు, 77,243 కిలోమీటర్ల పైప్‌లైన్లు, 27.36 లక్షల ఇంటింటి కుళాయి కనెక్షన్లు ఏర్పాటు చేయనున్నారు. ఈ సభలో ముఖ్యమంత్రి నారా చంద్రబాబుతో పాటు డిప్యూటీ సీఎం పవన్ కల్యాణ్, బీజేపీ రాష్ట్ర అధ్యక్షుడు పీవీఎన్. మాధవ్ మాట్లాడారు.

గండికోట జలాశయాన్ని ప్రధాన నీటి వనరుగా వినియోగిస్తూ మదనపల్లి విభాగంలో సమగ్ర రక్షిత తాగునీటి సరఫరా పథకం రెండో దశను చేపట్టనున్నారు. ఈ పథకం ద్వారా మూడు మండలాల్లోని 642 ఆవాసాలకు తాగునీటి భద్రత కల్పించడంతో పాటు సుమారు 5.35 లక్షల మంది ప్రజలకు సురక్షితమైన నీరు అందుబాటులోకి రానుంది.