మన్యంలో గాలివాన బీభత్సం: స్తంభించిన జనజీవనం

మన్యం ప్రాంతంలో ఒక్కసారిగా వాతావరణం మారిపోయింది. మిట్టమధ్యాహ్నం మబ్బులు కమ్ముకువచ్చి గాలి దుమారం చెలరేగింది. పెనుగాలులకు ప్రకృతి ఒక్కసారిగా ప్రకోపించింది. ఒక్కసారిగా ఆకాశం మేఘావృతమై, ఉరుములు మెరుపులతో కూడిన భారీ వర్షం కురిసింది. పెను గాలుల ధాటికి మన్యం అల్లకల్లోలమైంది. గాలివాన ధాటికి భారీ వృక్షాలు, విద్యుత్ స్తంభాలు నేలకొరగడంతో గిరిజన ప్రాంతాల్లో జనజీవనం పూర్తిగా స్తంభించిపోయింది. నిన్న సాయంత్రం నుంచి రాత్రి పది గంటలకు వరకు ఈ పరిస్థితి నెలకొంది.

గోకవరం నుండి రంపచోడవరం వరకు ప్రధాన రహదారిపై పెద్ద పెద్ద మానులు (వృక్షాలు) అడ్డంగా పడిపోవడంతో రాకపోకలు పూర్తిగా నిలిచిపోయాయి. రహదారికి ఇరువైపులా కిలోమీటర్ల మేర వాహనాలు నిలిచిపోయాయి. ప్రయాణికులు, నిత్యావసర సరుకులతో వెళ్తున్న వాహనదారులు అడవి మార్గంలోనే చిక్కుకుపోయారు. ఒక్కసారిగా వచ్చిన వానకు ఆశ్రయం పొందే వీలులేక బాటసారులు, ద్విచక్ర వాహనదారులు వానలో తడిసి ముద్దయ్యారు.

రోడ్డుపై భారీ వృక్షాలు పడిపోవడంతో వాటిని తొలగించడం అధికారులకు సవాలుగా మారింది. ఈ క్రమంలో రంపచోడవరం మార్గంలో ఉన్న ఓ కాంట్రాక్టర్ ఆనంద్ మానవత్వంతో స్పందించారు. తన పొలాల్లో పనుల కోసం ఉన్న జేసీబీ (JCB) యంత్రాలను వెంటనే రోడ్డుపైకి రప్పించారు. గంటల తరబడి కష్టపడి భారీ మానులను పక్కకు తొలగించి, ట్రాఫిక్‌ను క్లియర్ చేసేందుకు కృషి చేశారు.

చెట్లు కూలి వైర్లు తెగిపోవడంతో రంపచోడవరం ఏజెన్సీ ప్రాంతాలకు విద్యుత్ సరఫరా నిలిచిపోయింది. చాలా గ్రామాల్లో కమ్యూనికేషన్ వ్యవస్థ కూడా దెబ్బతిన్నది. రంపచోడవరం వైపు వెళ్లే ప్రధాన రహదారి కట్ కావడంతో ప్రయాణికులు తీవ్ర ఇబ్బందులు ఎదుర్కొన్నారు. అర్ధరాత్రి వరకు సహాయక చర్యలు కొనసాగుతూనే ఉన్నాయి.

మన్యం ప్రాంతంలో ప్రయాణించే వారు వాతావరణ పరిస్థితులను గమనించి, అప్రమత్తంగా ఉండాలని అధికారులు సూచిస్తున్నారు.