ఇకపై ప్రతి శుక్రవారం కలెక్టర్ల నియోజకవర్గ నిద్ర!

అమరావతిలో జరిగిన జిల్లా కలెక్టర్ల 7వ కాన్ఫరెన్స్‌లో ముఖ్యమంత్రి నారా చంద్రబాబు నాయుడు పాలనను ప్రజలకు మరింత చేరువ చేసేలా సంచలన నిర్ణయాలు తీసుకున్నారు. "ప్రభుత్వం అంటే ఫైళ్లు కాదు.. ప్రజల సంతృప్తి" అనే నినాదంతో కొత్త మార్గదర్శకాలను జారీ చేశారు.

ఆంధ్రప్రదేశ్ పునర్నిర్మాణంలో భాగంగా క్షేత్రస్థాయిలో పాలనను పరుగులు పెట్టించేందుకు ముఖ్యమంత్రి చంద్రబాబు నాయుడు సరికొత్త ప్రయోగానికి శ్రీకారం చుట్టారు. కేవలం కార్యాలయాలకే పరిమితం కాకుండా, ప్రజల కష్టసుఖాలను నేరుగా తెలుసుకోవాలని అధికారులకు దిశానిర్దేశం చేశారు.

పాలనలో జవాబుదారీతనం పెంచేందుకు కలెక్టర్లు ప్రతి శుక్రవారం ఒక నియోజకవర్గంలో బస చేయాలని సీఎం ఆదేశించారు. ఆ నియోజకవర్గంలోని గ్రామాల్లో రాత్రి బస చేసి, స్థానిక సమస్యలను నేరుగా పర్యవేక్షించాలి. ముందుగానే ఆ నియోజకవర్గ ఎమ్మెల్యేకి చెప్పాలి. ఇలా ఆయా జిల్లాలోని ప్రతి నియోజకవర్గాన్ని కలెక్టర్లు సందర్శించి ప్రజా సమస్యలను పరిష్కరిస్తారు. ఒక్కో నియోజకవర్గానికి ఒక నెల కేటాయిస్తారు. ఆ విధంగా సమస్యలను పరిష్కరిస్తారు.

జిల్లా కలెక్టర్లు ఎప్పుడేం చేయాలో జీఎడీ అధికారికంగా ఉత్తర్వులు జారీ చేస్తుంది.

సంక్షేమ పథకాలు ఎలా అందుతున్నాయి? మౌలిక సదుపాయాల పరిస్థితి ఏంటి? అన్నది ప్రజల నుంచే తెలుసుకోవాలి. గతంలో జిల్లాల పునర్విభజన వల్ల కలెక్టర్ల పరిధి 21 నియోజకవర్గాల నుండి 7కి తగ్గిందని, కాబట్టి ప్రతి నియోజకవర్గంపై పూర్తి పట్టు సాధించడం ఇప్పుడు సులభమని సీఎం గుర్తుచేశారు.

గతంలో ఉన్న 'గ్రీవెన్స్ సెల్'ను మరింత పకడ్బందీగా అమలు చేస్తూ, ప్రతి సోమవారం ప్రజా సమస్యల పరిష్కార వేదికను నిర్వహించాలని నిర్ణయించారు. జిల్లా కలెక్టరేట్లతో పాటు మండల, మున్సిపల్ స్థాయిల్లోనూ అధికారులు వినతులను స్వీకరిస్తారు. సమస్య పరిష్కారం ఏ దశలో ఉందో తెలుసుకునేలా ఆన్‌లైన్ ట్రాకింగ్ సౌకర్యం కల్పించారు.

ఆర్థికేతర సమస్యలను (Non-financial complaints) వెంటనే పరిష్కరించాలని, జాప్యం జరిగితే ఉపేక్షించేది లేదని హెచ్చరించారు.

కొత్త విధానం ప్రకారం వారంలో ఏదో ఒక రోజు మాత్రమే వీడియో కాన్ఫరెన్సులు ఉంటాయని, ఒక రోజు జిల్లా కలెక్టర్లు తమ ఇష్టం వచ్చిన గ్రామాన్ని సందర్శించవచ్చునని, ప్రతి శుక్రవారం నియోజకవర్గ నిద్ర ఉంటుందని సీఎం చంద్రబాబు తెలిపారు.

పాలనలో వినూత్న మార్పుల కోసం సింగపూర్ నమూనాను ఒక జిల్లాలో పైలట్ ప్రాజెక్ట్‌గా చేపట్టాలని సీఎం సూచించారు. ఇందుకోసం 90 రోజుల ప్రత్యేక కార్యాచరణ ప్రణాళికను సిద్ధం చేయాలని అధికారులను ఆదేశించారు. టెక్నాలజీని వాడుకుని 90% పైగా ప్రజల సంతృప్తిని సాధించడమే లక్ష్యంగా పెట్టుకోవాలన్నారు.

"అభివృద్ధి అనేది ఉమ్మడి బాధ్యత. అందుకే ఇకపై నేను (I) అనే పదాన్ని వదిలి మనం (We) అనే పదాన్ని వాడతాను" అని చంద్రబాబు ప్రకటించారు. కలెక్టర్ల మధ్య పోటీ తత్వం ఉండాలని, ఉత్తమ పనితీరు కనబరిచిన వారికి గుర్తింపు ఉంటుందని స్పష్టం చేశారు.

రెవెన్యూ రికార్డుల క్లెన్సింగ్: మార్చి 2027 నాటికి 'జీరో ఎర్రర్'తో భూ రికార్డుల ఆధునీకరణ పూర్తి కావాలి.

పెట్టుబడుల వెల్లువ: గత 23 నెలల్లో ₹23 లక్షల కోట్ల పెట్టుబడులకు సంబంధించిన ఒప్పందాలు జరిగాయని, వీటిని త్వరితగతిన కార్యరూపంలోకి తేవాలని కలెక్టర్లకు సూచించారు.

ర్యాంకింగ్ సిస్టమ్: మంత్రులు, కలెక్టర్ల పనితీరు ఆధారంగా వారికి రేటింగ్ ఇస్తామని సీఎం వెల్లడించారు.

ముఖ్యమంత్రి తీసుకున్న ఈ నిర్ణయాలతో ఆంధ్రప్రదేశ్ రాష్ట్ర యంత్రాంగం ఇకపై మరింత క్రియాశీలంగా మారనుంది. ముఖ్యంగా "శుక్రవారం నియోజకవర్గ నిద్ర" నిర్ణయం క్షేత్రస్థాయిలో పెను మార్పులకు దారితీస్తుందని విశ్లేషకులు భావిస్తున్నారు.