వీరవల్లి టోల్‌గేట్ వద్ద ఘోర ప్రమాదం

బాధితులు ఏలూరు నుంచి రాజమహేంద్రవరం వైపు కారులో ప్రయాణిస్తుండగా ఈ ఘోరం జరిగింది. వీరవల్లి టోల్‌గేట్‌కు మరో 500 మీటర్ల దూరం ఉందనగా, కారు అదుపుతప్పి ఇనుప సూచిక బోర్డు స్తంభాన్ని ఢీకొట్టింది. ప్రమాద ధాటికి కారు ముందు భాగం పూర్తిగా నుజ్జునుజ్జయ్యింది. కారులో ఉన్న నలుగురిలో ముగ్గురు అక్కడికక్కడే మృతి చెందగా, మరో వ్యక్తి తీవ్ర గాయాలతో బయటపడ్డారు. ప్రస్తుతం ఆయన పరిస్థితి విషమంగా ఉన్నట్లు తెలుస్తోంది.

సమాచారం అందిన వెంటనే పోలీసులు ఘటన స్థలానికి చేరుకుని సహాయక చర్యలు చేపట్టారు. మృతదేహాలను కారులో నుంచి వెలికితీసి, పోస్టుమార్టం నిమిత్తం గోపాలపురం ప్రభుత్వ ఆస్పత్రికి తరలించారు. క్షతగాత్రుడిని అత్యవసర చికిత్స కోసం ఆస్పత్రికి తరలించి, మెరుగైన వైద్యం అందిస్తున్నారు. మరో వైపు ప్రమాదానికి గల కారణాలపై పోలీసులు విచారణ ప్రారంభించారు. డ్రైవర్ నిద్రమత్తులోకి జారుకోవడం వల్లే ఈ ప్రమాదం జరిగిందా? లేక వాహనం ఏదైనా సాంకేతిక లోపానికి గురైందా? అనే కోణంలో దర్యాప్తు చేస్తున్నారు. కేసు నమోదు చేసిన పోలీసులు, బాధితుల వివరాలను సేకరించి వారి కుటుంబ సభ్యులకు సమాచారం అందించారు.