ఎన్నికల సంఘం వైఖరి మార్చుకోవాలి: కాంగ్రెస్
తిప్పికొట్టిన బీజేపీ, ఈసీకి నోటీసులు జారీ చేసిన సుప్రీంకోర్టు
ప్రధాన ఎన్నికల కమిషనర్ జ్ఞానేశ్ కుమార్ ఇతర ఎన్నికల కమిషనర్ల అనుమతి లేకుండా కీలక నిర్ణయాలు తీసుకున్నారన్న వివాదం మరోసారి రాజకీయంగా వేడెక్కింది. ఈ వ్యవహారంపై దాఖలైన పిటిషన్‌ను విచారించిన సుప్రీంకోర్టు.. ఎన్నికల సంఘానికి నోటీసులు జారీ చేసింది. అయితే కేవలం పత్రికల్లో వచ్చిన కథనాల ఆధారంగా తుది నిర్ణయానికి రాలేమని, పూర్తి స్థాయి విచారణ తర్వాతే వాస్తవాలు స్పష్టమవుతాయని కోర్టు పేర్కొంది.
ఈ పరిణామంపై కాంగ్రెస్, బీజేపీ మధ్య మాటల యుద్ధం మొదలైంది. సుప్రీంకోర్టు జోక్యంతోనైనా కేంద్ర ప్రభుత్వం, ఎన్నికల సంఘం తమ వైఖరిని మార్చుకోవాలని కాంగ్రెస్ కోరింది. మరోవైపు, కాంగ్రెస్ అనుబంధ విభాగం ఎన్‌ఎస్‌యూఐ ఢిల్లీలో తన నిరసనలను కొనసాగిస్తోంది.
సుప్రీంకోర్టులో విచారణ
పాట్నాకు చెందిన రాకేశ్ కుమార్ సింగ్ దాఖలు చేసిన ప్రజా ప్రయోజన వ్యాజ్యంపై సీజేఐ సూర్యకాంత్, జస్టిస్ జోయ్‌మాల్య బాగ్చి, జస్టిస్ వి. మోహనా నేతృత్వంలోని ధర్మాసనం విచారణ చేపట్టింది. ఎన్నికల సంఘం నిర్ణయాలు సాధారణంగా ఏకగ్రీవంగా లేదా మెజారిటీతో తీసుకోవాల్సి ఉంటుందని కోర్టు పేర్కొంది.
ఈ నేపథ్యంలో ప్రధాన ఎన్నికల కమిషనర్ స్వతంత్రంగా నిర్ణయాలు తీసుకున్నారా, లేక మొత్తం కమిషన్ ఆమోదంతోనే నిర్ణయాలు జరిగాయా అనే విషయాన్ని సంబంధిత రికార్డుల ఆధారంగా పరిశీలించనుంది.
అయితే జ్ఞానేశ్ కుమార్‌ను తక్షణం సస్పెండ్ చేయాలన్న పిటిషనర్ల అభ్యర్థనను కోర్టు ప్రస్తుతానికి తిరస్కరించింది. చట్టబద్ధమైన విధానాలను పాటించకుండా నిర్ణయాలు తీసుకున్నట్లు విచారణలో తేలితే వాటిని పునఃపరిశీలించే లేదా రద్దు చేసే అవకాశం ఉంటుందని కోర్టు స్పష్టం చేసింది.
కాంగ్రెస్ ఆరోపణలు
సుప్రీంకోర్టు విచారణ నేపథ్యంలో కాంగ్రెస్ జ్ఞానేశ్ కుమార్‌పై తీవ్ర ఆరోపణలు చేసింది. ఫారమ్-6లో మార్పులను ఆయన ఏకపక్షంగా, చట్టవిరుద్ధంగా చేశారని రాహుల్ గాంధీ ఆరోపించారు. ఈ వ్యవహారంలో బాధ్యులైన వారందరినీ జవాబుదారీగా నిలబెడతామని ఆయన పేర్కొన్నారు.
కాంగ్రెస్ ప్రధాన కార్యదర్శి జైరాం రమేశ్ కూడా సుప్రీంకోర్టు జోక్యంతో ఎన్నికల సంఘంపై ప్రజల్లో నమ్మకాన్ని పునరుద్ధరించే అవకాశం ఏర్పడిందని అన్నారు. ఎస్‌ఐఆర్ ప్రక్రియ, ఓటర్ల జాబితాలో మార్పులు, ఫారమ్-6కు సంబంధించిన అంశాలపై ఆయన పలు ఆరోపణలు చేశారు.
అయితే ఎన్నికల సంఘం మాత్రం కమిషన్‌లో భిన్నాభిప్రాయాలు ఉండటం సంస్థాగత చర్చల్లో సహజమేనని, తన నిర్ణయాలు చట్టబద్ధమైన విధానాల ప్రకారమే తీసుకున్నామని ఇప్పటికే స్పష్టం చేసింది.
బీజేపీ కౌంటర్
కాంగ్రెస్ ఆరోపణలను బీజేపీ తోసిపుచ్చింది. సుప్రీంకోర్టులో పిటిషన్ దాఖలు కావడం, దానిపై విచారణ జరగడం, ఎన్నికల సంఘానికి నోటీసులు జారీ కావడం వంటివి దేశ ప్రజాస్వామ్య వ్యవస్థలు సక్రమంగా పనిచేస్తున్నాయనడానికి నిదర్శనమని బీజేపీ అధికార ప్రతినిధి సంబిత్ పాత్ర అన్నారు.
ఇద్దరు ఎన్నికల కమిషనర్లు ఎస్‌ఐఆర్‌పై అభ్యంతరాలు వ్యక్తం చేయడాన్ని కూడా ఆయన ప్రజాస్వామ్య వ్యవస్థలో సహజమైన చర్చగా అభివర్ణించారు.
ఢిల్లీలో ఎన్‌ఎస్‌యూఐ నిరసనలు
మరోవైపు, ఢిల్లీలో ఎన్‌ఎస్‌యూఐ కార్యకర్తల ఆందోళన కొనసాగుతోంది. జ్ఞానేశ్ కుమార్ రాజీనామా, అరెస్టు చేయాలంటూ వారు నిరసన చేపట్టారు. రైసినా రోడ్‌లోని ఎన్‌ఎస్‌యూఐ కార్యాలయం సమీపంలో జరిగిన ఈ ఆందోళనలో కొందరు కార్యకర్తలను ఢిల్లీ పోలీసులు అదుపులోకి తీసుకున్నట్లు ఎన్‌ఎస్‌యూఐ తెలిపింది.
ఓటర్ల హక్కులు, ఎన్నికల ప్రక్రియపై ప్రశ్నలు లేవనెత్తుతున్న తమను అణచివేస్తున్నారని ఆ సంస్థ ఆరోపించింది.
ప్రస్తుతం సుప్రీంకోర్టు కోరిన సమాధానాలు, సంబంధిత రికార్డులు కీలకంగా మారాయి. వీటిని పరిశీలించిన తర్వాతే తదుపరి చర్యలపై కోర్టు నిర్ణయం తీసుకునే అవకాశం ఉంది.
