ఆస్తులు దానం చేసింది నేను కాదు, కడప దంపతులే: సీపీఐ నారాయణ

సీపీఐ జాతీయ కంట్రోల్ కమిషన్ ఛైర్మన్ డాక్టర్ కె. నారాయణ తన ఆస్తులన్నింటినీ దానం చేసేశారంటూ కొన్ని రోజులుగా సోషల్ మీడియాలో ఒక వార్త విపరీతంగా వైరల్ అవుతోంది. అయితే, ఈ వార్త వెనుక ఉన్న అసలు నిజం వేరు. అది నారాయణ చేసిన దానం కాదు.. కడపకు చెందిన దంపతుల జీవితకాలపు త్యాగం! ఆ దంపతుల దాతృత్వాన్ని కొందరు సోషల్ మీడియాలో మార్ఫింగ్ చేసి నారాయణకి ఆపాదించడంతో ఈ వివాదం చెలరేగింది.

అసలు కథ కడప జిల్లాలో మొదలైంది. కడపకు చెందిన మాచిరెడ్డి సంజీవమ్మ, ఆమె భర్త మాచిరెడ్డి సమాజ సేవ కోసం ఒక అద్భుతమైన నిర్ణయం తీసుకున్నారు. వారు తమ జీవితకాలపు కష్టార్జితం, సంపాదన అయిన దాదాపు రూ. 3 కోట్ల విలువైన ఆస్తులను సమాజ సేవకు అంకితం చేయాలని సంకల్పించారు.

ఇల్లు అమ్మి ఆశ్రమ నిర్మాణం: ఇందుకోసం వారు నివసిస్తున్న సొంత ఇల్లు, 25 సెంట్ల భూమిని కూడా విక్రయించారు. ఆ డబ్బుతో కడపలోని బాకరాపేట రోడ్డులో 3 ఎకరాల స్థలాన్ని కొనుగోలు చేసి, వృద్ధుల ఆశ్రయం కోసం "జీవనీ వృద్ధాశ్రమాన్ని" (Jeevani Old Age Home) నిర్మించారు.

CR ఫౌండేషన్‌కు అప్పగింత: వయోభారం రీత్యా భవిష్యత్తులో ఈ ఆశ్రమాన్ని నిరాటంకంగా, నిరంతరాయంగా నిర్వహించడం తమ వల్ల కాకపోవచ్చని భావించిన ఈ దంపతులు.. ఈ 3 ఎకరాల స్థలాన్ని, వృద్ధాశ్రమాన్ని, దానికి సంబంధించిన మొత్తం ఆస్తిని అధికారికంగా "చండ్ర రాజేశ్వరరావు (CR) ఫౌండేషన్‌"కు అప్పగించారు.

ఈ సందర్భంగా ఏర్పాటు చేసిన ప్రెస్ మీట్‌లో దాత సంజీవమ్మ గారు మాట్లాడారు. సి.ఆర్. ఫౌండేషన్ ప్రతినిధిగా నారాయణ ఆమె పక్కనే కూర్చుని, ఈ దంపతుల అపార దాతృత్వాన్ని కొనియాడారు.

ఈ ప్రెస్ మీట్ తాలూకు విజువల్స్ ఆధారంగా కొందరు సోషల్ మీడియాలో ఒక తప్పుడు ప్రచారానికి తెరలేపారు. ప్రెస్ మీట్‌లో నారాయణ పక్కన కూర్చున్న దాత సంజీవమ్మ గారి ఫోటోను గ్రాఫిక్స్/మార్ఫింగ్ ద్వారా తొలగించారు. ఆ స్థానంలో.. నాలుగేళ్ల క్రితమే మరణించిన నారాయణ భార్య వసుంధర ఫోటోను అతికించారు.

"సీపీఐ నేత నారాయణ దంపతులు తమ కోట్లాది రూపాయల విలువైన ఆస్తులను సమాజానికి రాసిచ్చేశారు" అంటూ ఒక ఫేక్ పోస్ట్‌ను సృష్టించి వైరల్ చేయడంతో రాష్ట్రవ్యాప్తంగా గందరగోళం నెలకొంది. అనేక మంది ఫోన్లు చేసి నారాయణను అభినందించడం మొదలు పెట్టారు. అసలు ఇదేమిటో అర్థం కాక ఆయన తలపట్టుకుని విషయం తెలిసి వివరణ ఇచ్చారు.

"నాపై అతిప్రేమతో చనిపోయిన నా భార్య ఫోటో మార్ఫింగ్ చేశారు" అని నారాయణ ఆవేదన వ్యక్తం చేశారు. ఈ తప్పుడు ప్రచారం తన దృష్టికి రావడంతో డాక్టర్ కె. నారాయణ తీవ్రంగా స్పందించారు. "నిజం గడప దాటకముందే అబద్ధం ఎల్లలు దాటుతుంది" అని గుర్తు చేస్తూ ఆయన ఒక ప్రకటన విడుదల చేశారు.

కానీ, నాపై మరీ అతిప్రేమ వలకపోస్తూ.. 4 సంవత్సరాల క్రితం చనిపోయిన మా ఆవిడ ఫోటో పెట్టి, సంజీవమ్మ గారి ఫోటోను తొలగించి మార్ఫింగ్ చేసి వైరల్ చేస్తున్నారు. ఇదీ అసలు వాస్తవం."

మాచిరెడ్డి, సంజీవమ్మ దంపతులు రూ. 3 కోట్ల ఆస్తిని, తాము కట్టుకున్న వృద్ధాశ్రమాన్ని దానం చేయడం సమాజంలో ఎందరికో ఆదర్శం. అలాంటి గొప్ప దాతల త్యాగాన్ని గుర్తించాల్సింది పోయి.. ఒక రాజకీయ నేతపై ఉన్న ఉత్సాహం లేదా 'అతి ప్రేమ' కొద్దీ, ఏకంగా ఆయన మరణించిన భార్య ఫోటోను మార్ఫింగ్ చేసి వాడుకోవడం సామాజిక మాధ్యమాల దుర్వినియోగానికి అద్దం పడుతోంది. నారాయణ ఇచ్చిన స్పష్టతతో కడప దంపతుల అసలు దాతృత్వం బాహ్య ప్రపంచానికి తెలిసింది, ఫేక్ ప్రచారానికి తెరపడింది.