సీజేపీ వ్యవస్థాపకుడు అభిజిత్ దీప్కేపై ఫిర్యాదు..

తివారీ తెలిపిన వివరాల ప్రకారం, అభిజిత్ దీప్కే తండ్రి భగవాన్‌రావు దీప్కే మహారాష్ట్ర ఇండస్ట్రియల్ డెవలప్‌మెంట్ కార్పొరేషన్ (MIDC)లో జూనియర్ ఇంజనీర్‌గా పనిచేశారని, ఆయన నెలకు సుమారు రూ.60 వేల నుంచి రూ.65 వేల వరకు జీతం పొందేవారని చెప్పారు. అలాంటి ఆదాయంతో అమెరికాలో కుమారుడి చదువులకు నిధులు ఎలా సమకూర్చారనే అంశంపై దర్యాప్తు జరపాలని, ఆదాయానికి మించిన ఆస్తుల కేసుగా తేలితే తగిన చర్యలు తీసుకోవాలని ప్రభుత్వాన్ని కోరినట్లు వెల్లడించారు.

ఇదే సమయంలో సీజేపీ నిధుల సేకరణ అంశంపైనా తివారీ ప్రశ్నలు లేవనెత్తారు. ఢిల్లీలో జూలై 20న జరిగిన నిరసనలకు సంబంధించిన కేసులను ఎదుర్కొంటున్న సీజేపీ కార్యకర్తల న్యాయపరమైన రక్షణ కోసం సీనియర్ న్యాయవాది, రాజ్యసభ సభ్యుడు కపిల్ సిబల్ రూ.1 కోటి విరాళం అందిస్తానని ప్రకటించిన నేపథ్యంలో, ఈ విరాళాన్ని సీజేపీ స్వీకరించే అర్హత ఉందా అనే అంశాన్ని పరిశీలించాలని ఎన్నికల సంఘానికి లేఖ రాసినట్లు తెలిపారు.

సీజేపీ ఎన్నికల సంఘంలో ప్రజా ప్రాతినిధ్య చట్టం-1951లోని సెక్షన్ 29ఏ కింద నమోదైందా లేదా అన్న విషయాన్ని ధృవీకరించాలని ఆయన కోరారు. ఒకవేళ నమోదు కాలేదని తేలితే, రాజకీయ పార్టీ పేరుతో నిధుల సేకరణ, కార్యకలాపాలపై విచారణ జరపాల్సిన అవసరం ఉందని అభిప్రాయపడ్డారు.

అలాగే, సిబల్ ప్రకటించిన రూ.1 కోటి న్యాయ రక్షణ నిధిపై 18 శాతం జీఎస్టీ వర్తిస్తుందా లేదా అన్న అంశాన్ని కూడా సెంట్రల్ బోర్డ్ ఆఫ్ ఇన్‌డైరెక్ట్ టాక్సెస్ అండ్ కస్టమ్స్ (CBIC) పరిశీలించాలని తివారీ కోరినట్లు తెలిపారు.

నీట్ పేపర్ లీక్ వ్యవహారంపై ప్రారంభమైన సీజేపీ ఉద్యమం తర్వాత కొందరు నిరసనకారులు ప్రధాని నరేంద్ర మోదీతో పాటు ఆయన దివంగత తల్లిపై అనుచిత వ్యాఖ్యలు చేశారని తివారీ ఆరోపించారు. ఈ వ్యాఖ్యలపై కూడా సంబంధిత అధికారులకు ఫిర్యాదు చేసినట్లు ఆయన వెల్లడించారు.