‘బొద్దింకల లాంటి యువకులు వ్యవస్థపై దాడి చేస్తున్నారు’..

భారత ప్రధాన న్యాయమూర్తి (సీజేఐ) సూర్యకాంత్ శుక్రవారం చేసిన వ్యాఖ్యలు దేశవ్యాప్తంగా చర్చకు దారితీశాయి. కొంతమంది నిరుద్యోగ యువకులు మీడియా, సోషల్ మీడియా, ఆర్టీఐ కార్యకర్తల రూపంలో వ్యవస్థపై దాడి చేస్తున్నారని ఆయన తీవ్రంగా వ్యాఖ్యానించారు. వారిని “బొద్దింకల లాంటి వారు” అంటూ పోల్చడం సంచలనంగా మారింది.

ఈ వ్యాఖ్యలు సుప్రీంకోర్టులో ఒక న్యాయవాది సీనియర్ అడ్వకేట్ హోదా కోరుతూ దాఖలు చేసిన పిటిషన్ విచారణ సందర్భంగా వచ్చాయి.

సీనియర్ అడ్వకేట్ హోదాపై విచారణ..

సీజేఐ సూర్యకాంత్, జస్టిస్ జయమల్య బాగ్చీతో కూడిన ధర్మాసనం ఈ కేసును విచారించింది. విచారణలో పిటిషన్ దాఖలు చేసిన న్యాయవాది ప్రవర్తనపై కోర్టు తీవ్ర అసంతృప్తి వ్యక్తం చేసింది. “సీనియర్ అడ్వకేట్ కావడానికి ప్రపంచంలో చాలా మంది అర్హులు. కానీ మీరు మాత్రం అర్హులు కారు,” అని ధర్మాసనం వ్యాఖ్యానించింది.

‘వ్యవస్థపై దాడి చేసే పరాన్నజీవులు’

విచారణ సందర్భంగా సీజేఐ తీవ్ర ఆవేదన వ్యక్తం చేశారు. ఇప్పటికే సమాజంలో వ్యవస్థపై దాడి చేసే “పరాన్నజీవులు” ఉన్నారని, వారితో మీరూ కలవాలనుకుంటున్నారా? అని పిటిషనర్‌ను ప్రశ్నించారు.

“కొంతమంది యువకులకు ఉపాధి దొరకదు. ఏ పని చేతకాదు. అప్పుడు వాళ్లు మీడియా, సోషల్ మీడియా, ఆర్టీఐ కార్యకర్తలుగా మారి అందరిపై దాడి చేయడం ప్రారంభిస్తారు,” అని ఆయన అన్నారు. ఈ వ్యాఖ్యలు ప్రస్తుతం సోషల్ మీడియాలో విస్తృత చర్చకు దారితీశాయి.

ఫేస్‌బుక్ పోస్టులపై కోర్టు ఆగ్రహం..

పిటిషనర్ సోషల్ మీడియాలో, ముఖ్యంగా ఫేస్‌బుక్‌లో వాడిన భాషపై కూడా ధర్మాసనం అసంతృప్తి వ్యక్తం చేసింది. సీనియర్ అడ్వకేట్ హోదా కోరుకునే వ్యక్తి ప్రవర్తన ఇలా ఉండకూడదని కోర్టు స్పష్టం చేసింది. సీనియర్ హోదా అనేది గౌరవప్రద గుర్తింపు మాత్రమేనని, దాని కోసం లాబీయింగ్ చేయడం సరైన పద్ధతి కాదని తెలిపింది. “సీనియర్ హోదా కేవలం అలంకారంగా ధరించుకునే గుర్తు కాదు,” అని ధర్మాసనం వ్యాఖ్యానించింది.

న్యాయవాదుల డిగ్రీలపై అనుమానాలు..

విచారణలో మరో కీలక వ్యాఖ్య కూడా వచ్చింది. నల్ల కోటు ధరించిన కొందరు న్యాయవాదుల డిగ్రీల ప్రామాణికతపై తీవ్రమైన అనుమానాలు ఉన్నాయని సీజేఐ అన్నారు. అయితే, బార్ కౌన్సిల్ ఆఫ్ ఇండియా ఈ విషయంలో చర్యలు తీసుకోదని కూడా వ్యాఖ్యానించారు. “వారికి ఓట్లు అవసరం కాబట్టి చర్యలు తీసుకోరు,” అని ధర్మాసనం పేర్కొంది.

చివరికి పిటిషన్ ఉపసంహరణ..

కోర్టు తీవ్ర వ్యాఖ్యల తర్వాత పిటిషనర్ ధర్మాసనానికి క్షమాపణ చెప్పారు. అనంతరం తన పిటిషన్‌ను ఉపసంహరించుకోవడానికి అనుమతి కోరారు. దీనికి సుప్రీంకోర్టు అనుమతి ఇచ్చింది.