మెటాపై కేంద్రం దర్యాప్తు వేగవంతం
ప్రధాని మోదీ వీడియో తొలగింపు వ్యవహారం..
ప్రధానమంత్రి నరేంద్ర మోదీ సోషల్ మీడియాలో పోస్ట్ చేసిన సెల్ఫీ వీడియోను ఇన్స్టాగ్రామ్ తాత్కాలికంగా తొలగించిన ఘటనపై కేంద్ర ప్రభుత్వం తన విచారణను మరింత ముమ్మరం చేసింది. ఈ అంశంపై మెటా గ్లోబల్ పబ్లిక్ పాలసీ హెడ్ జోయెల్ కాప్లాన్ను వారం రోజుల్లో రెండోసారి వివరణ ఇవ్వాలని కేంద్రం కోరినట్లు సమాచారం. బుధవారం (ఆగస్టు 5) ప్రభుత్వ అధికారులతో ఆయన సమావేశం కానున్నట్లు తెలుస్తోంది.
ఈ సమావేశానికి ఇన్స్టాగ్రామ్ సాంకేతిక బృందానికి చెందిన అధికారులను కూడా హాజరు కావాలని సూచించినట్లు సమాచారం. ప్రభుత్వాన్ని విమర్శించే పోస్టులకు మెటా ప్లాట్ఫామ్లలో అధిక ప్రాధాన్యం లభిస్తోందంటూ కేంద్రానికి పలు ఫిర్యాదులు అందిన నేపథ్యంలో, సంస్థ అల్గారిథమ్ ఎలా పనిచేస్తుందనే అంశంపై కూడా అధికారులు వివరణ కోరే అవకాశం ఉన్నట్లు నివేదికలు పేర్కొన్నాయి.
ప్రధాని మోదీ వీడియో తొలగింపుపై గత వారం ఎలక్ట్రానిక్స్, సమాచార సాంకేతిక మంత్రిత్వ శాఖ మెటాకు సమన్లు జారీ చేసింది. ఇప్పుడు అదే వ్యవహారంలో మరోసారి వివరణ కోరడంతో పాటు, వీడియో తొలగింపుకు కారణమైనట్లు మెటా పేర్కొన్న "సాంకేతిక లోపం"పై లిఖితపూర్వక వివరణ ఇవ్వాలని కేంద్రం కోరే అవకాశం ఉంది. అలాగే, ఈ ఘటనపై అధికారిక క్షమాపణను కూడా ప్రభుత్వం కోరవచ్చని సమాచారం.
ఇదిలా ఉండగా, సోమవారం జరిగిన పార్లమెంటరీ సమాచార సాంకేతిక స్థాయి సంఘం సమావేశంలో కూడా మెటా ప్రతినిధులు ప్రశ్నలకు సమాధానాలు ఇచ్చారు. ప్రధానమంత్రి వీడియో తొలగింపుకు దారితీసిన సాంకేతిక లోపంపై వారు క్షమాపణలు తెలిపారు.
జూలై 23న ప్రధాని మోదీ తన ఇన్స్టాగ్రామ్ ఖాతాలో ఈ వీడియోను పోస్ట్ చేశారు. అందులో జెన్-జెడ్ యువతను ఉద్దేశించి మాట్లాడుతూ, పేపర్ లీక్లపై కఠిన చర్యలు తీసుకుంటామని హామీ ఇచ్చారు. ఈ వీడియో సీజేపీ ఆధ్వర్యంలో జరిగిన విద్యార్థుల నిరసనల సమయంలో ప్రచురించబడింది. ఈ సమావేశానికి గూగుల్, యూట్యూబ్, హోం వ్యవహారాల మంత్రిత్వ శాఖ, ఎలక్ట్రానిక్స్ అండ్ ఇన్ఫర్మేషన్ టెక్నాలజీ మంత్రిత్వ శాఖల సీనియర్ అధికారులు కూడా హాజరయ్యారు.
సమావేశం అనంతరం పార్లమెంటరీ సమాచార సాంకేతిక కమిటీ ఛైర్మన్, బీజేపీ ఎంపీ నిషికాంత్ దుబే స్పందిస్తూ.. ప్రధాని మోదీ వీడియోను తొలగించిన ఘటనపై మెటా అధినేత మార్క్ జుకర్బర్గ్ స్వయంగా క్షమాపణ చెప్పాలని డిమాండ్ చేశారు. అలా చేయకపోతే పలు చట్టపరమైన వ్యవహారాల్లో మెటాకు లభిస్తున్న 'సేఫ్ హార్బర్' రక్షణపై కూడా ప్రభావం పడే అవకాశం ఉందని ఆయన హెచ్చరించారు.
కమిటీ సభ్యులు ఈ అంశం కేవలం క్షమాపణతో ముగిసే విషయం కాదని స్పష్టం చేసినట్లు సమాచారం. బాధ్యత నిర్ధారించిన తర్వాత అవసరమైన చట్టపరమైన చర్యలు తీసుకోవాలని వారు అభిప్రాయపడ్డారు. ప్రధానమంత్రి వీడియోనే ఎలాంటి ముందస్తు సమాచారం లేకుండా తొలగిస్తే, సాధారణ సోషల్ మీడియా వినియోగదారుల పరిస్థితి ఏమిటనే ప్రశ్నను కూడా సభ్యులు లేవనెత్తినట్లు నివేదిక పేర్కొంది.
గత వారం జరిగిన తొలి సమావేశం అనంతరం ప్రధానమంత్రి అధికారిక ఖాతా నుంచి వచ్చే పోస్టులపై అదనపు రక్షణ చర్యలు తీసుకుంటామని మెటా కేంద్ర ప్రభుత్వానికి హామీ ఇచ్చినట్లు సమాచారం. ప్రముఖ ఖాతాలకు సంబంధించిన మోడరేషన్ నిర్ణయాలను సీనియర్ అధికారులే సమీక్షించే విధానం అమలు చేస్తామని, అలాంటి పోస్టులపై చర్య తీసుకునే ముందు కనీసం ఇద్దరు సీనియర్ అధికారుల ఆమోదం తప్పనిసరిగా ఉంటుందని మెటా వెల్లడించినట్లు నివేదిక పేర్కొంది.
