అన్నమయ్య జిల్లా: చెలరేగిన 'స్థానిక హింస'.. గాలిలోకి పోలీసుల కాల్పులు

ఏపీలో స్థానిక సంస్థల ఎన్నికల నామినేషన్ల ప్రక్రియ అలర్లతో ప్రారంభమైంది. ఉమ్మడి చిత్తూరు జిల్లా (అన్నమయ్య జిల్లా)లో టీడీపీ, వైసీపీ శ్రేణుల మధ్య శుక్రవారం ఉదయం పరస్పర దాడులు జరిగాయి. రాయచోటి పట్టణ ఎన్ఎస్. కాలనీలో వాహనాలకు నిప్పంటించారు. పుంగనూరులో రాజంపేట ఎంపీ పెద్దిరెడ్డి మిథున్ రెడ్డి, గన్ మన్, టీడీపీ నేతలు గాయపడ్డారు. పరిస్థితిని అదుపులోకి తీసుకుని రావడానికి పోలీసులు గాలిలోకి కాల్పులు జరిపారు.

పుంగనూరు మున్సిపల్ స్థానం నుంచి చైర్మన్, కౌన్సిలర్ అభ్యర్థులతో నామినేషన్లు దాఖలు చేయించడానికి కాన్వాయ్ తో రాజంపేట ఎంపీ పెద్దిరెడ్డి వెంకట మిథున్ రెడ్డి బయలుదేరారు. అదే సమయంలో టీడీపీ శ్రేణులు కూడా మున్సిపల్ కార్యాలయం, పట్టణంలో భారీగా చేరుకున్నట్లు సమాచారం.

"తనను అంతమొందించడానికి ఈ దాడులకు పాల్పడ్డారు" అని ఎంపీ మిథున్ రెడ్డి ఆరోపించారు. రాళ్ల దాడిలో ఎంపీ మిథున్ తోపాటు ఆయన గన్ మన్ కూడా తీవ్రంగా గాయపడ్డారు. తెలుగుదేశం పార్టీ నేత మధు కూడా గాయపడిన సంఘటనతో తీవ్ర ఉద్రిక్త పరిస్థితి ఏర్పడింది. రంగంలోకి దిగిన పోలీసులు గాలిలోకి కాల్పులు జరపడం ద్వారా పరిస్థితిని అదుపులోకి తీసుకునే వచ్చే ప్రయత్నం చేశారు.