23మందిని బలిగొన్న ఈ బాణాసంచా ఫ్యాక్టరీ ఎవరిదంటే...

ఆకాశంలో రంగులు చిమ్మాల్సిన బాణసంచా.. ఆ పేదల జీవితాల్లో చీకట్లు నింపింది. పండగ వెలుగులు పంచాల్సిన మందుగుండు.. వారి ప్రాణాలనే బలితీసుకుంది. కాకినాడ జిల్లా సామర్లకోట మండలం వేట్లపాలెంలో శనివారం మధ్యాహ్నం సంభవించిన పెను ప్రమాదం ఒక గ్రామాన్నే కాక, యావత్ జిల్లాను కన్నీటి సముద్రంలో ముంచెత్తింది.

శనివారం ఉదయం 7 గంటలు.. ఎప్పటిలాగే సూర్యశ్రీ ఫైర్‌ వర్క్స్‌లోకి 75 మంది కార్మికులు వెళ్లారు. "సాయంత్రం ఇంటికి వెళ్లేటప్పుడు పిల్లలకు ఏదో ఒకటి తీసుకువెళ్లాలి" అనుకుంటూ రెక్కలు ముక్కలు చేసుకుంటున్నారంతా. మధ్యాహ్నం 2 గంటల సమయం.. ఒక్కసారిగా భూమి కంపించింది. ఐదు కిలోమీటర్ల మేర వినిపించిన ఆ భీకర శబ్దం మృత్యుఘోషను మోసుకొచ్చింది. చూస్తుండగానే దట్టమైన పొగ, ఎగిసిపడుతున్న మంటలు ఆ ప్రాంతాన్ని నరకప్రాయంగా మార్చేశాయి.

ఈ ప్రమాదంలో 23 మంది ప్రాణాలు కోల్పోయారని ఇప్పటికి అందిన ప్రాధమిక సమాచారం. మృతుల్లో అత్యధికులు మహిళలే కావడం అత్యంత విషాదకరం. ఆ ఇంటికి దీపాలుగా ఉండాల్సిన వారు, నేడు కాలి బూడిదయ్యారు. కాకినాడ ప్రభుత్వ ఆసుపత్రిలో మరో 30 మంది ప్రాణాలతో పోరాడుతున్నారు. వారిలో 70 శాతం పైగా కాలిన గాయాలతో ఉన్నారనే వార్త వారి కుటుంబ సభ్యుల గుండెల్ని పిండేస్తోంది.

ఈ ఫ్యాక్టరీని అడబాల అర్జున్ నిర్వహిస్తున్నారు. అయితే విధి ఎంత విచిత్రమైనదంటే.. ఈ ప్రమాదంలో అర్జున్ తండ్రి శ్రీను కూడా ప్రాణాలు కోల్పోయినట్లు తెలుస్తోంది. ఇతరులకు ఉపాధి కల్పించే క్రమంలో తమ ఇంట్లోనే విషాదం అలుముకోవడం గమనార్హం.

ప్రస్తుతం ఆస్పత్రిలో చికిత్స పొందుతున్న పెద్దాపురానికి చెందిన మోర్తా శ్రీను, వేట్లపాలెంకు చెందిన సప్ప సత్యవేణి వంటి వారు మృత్యువుతో పోరాడుతున్నారు. ఆరుగురిని ఇప్పటికే గుర్తించినప్పటికీ, మిగిలిన వారి పరిస్థితి వర్ణనాతీతం. కన్నవారి కోసం, కట్టుకున్న వారి కోసం ఆస్పత్రి బయట వేచి చూస్తున్న బంధువుల ఆర్తనాదాలతో కాకినాడ జీజీహెచ్ ప్రాంగణం దద్దరిల్లుతోంది.

విజయనగరం పర్యటనలో ఉన్న ముఖ్యమంత్రి చంద్రబాబు నాయుడు ఈ వార్త వినగానే తీవ్ర దిగ్భ్రాంతికి గురయ్యారు. తక్షణం సహాయక చర్యలు చేపట్టాలని, క్షతగాత్రులకు మెరుగైన వైద్యం అందించాలని ఆదేశించారు. సీఎం ఆదేశాల మేరకు హోం మంత్రి వంగలపూడి అనిత ఇప్పటికే ఘటనాస్థలికి బయలుదేరారు. జిల్లా కలెక్టర్, ఎస్పీలు సంఘటనా స్థలంలోనే ఉండి పరిస్థితిని సమీక్షిస్తున్నారు.

బాణసంచా ఫ్యాక్టరీల్లో ప్రమాదాలు జరిగినప్పుడు నిబంధనల గురించి మాట్లాడుకుంటాం.. కానీ ఆ మంటల్లో కాలిపోయిన ఆశల గురించి, అనాథలైన పిల్లల గురించి ఎంత చెప్పుకున్నా తక్కువే. వేట్లపాలెం వీధుల్లో ఇప్పుడు వినిపిస్తున్నది కేవలం ఏడుపులే కాదు.. పేదరికం మిగిల్చిన తీరని వ్యధ.