రాహుల్ స్పీచ్ లో ఏముందీ? ఎందుకంతలా చర్చిస్తున్నారు?

డీలిమిటేషన్ పై లోక్‌సభలో రాహుల్ గాంధీ చేసిన ప్రసంగం చతురోక్తులు, పిట్టకథలు, పొడుపు కథలతో సాగింది. తనకు, మోదీకి భార్య లేదనే చలోక్తి మొదలు తాను ఐదేళ్లలో చేయని పనిని నా చెల్లి ప్రియాంక 5 నిమిషాల్లో చేసి అమిత్ షా ను నవ్వించిందన్న వ్యాఖ్యలు సభలో నవ్వులు పూయించాయి. చివర్లో ఆయన చెప్పిన 16వ నెంబరు పొడుపు కథ సభతో పాటు దేశ ప్రజల్నీ ఆలోచనలో పడేసింది.

"స్పీకర్ సర్, చాలా ముఖ్యమైన అంశంపై మాట్లాడేందుకు అవకాశం ఇచ్చినందుకు ధన్యవాదాలు. మన జాతీయ ఆలోచనా విధానంలో మహిళలు ఒక కేంద్ర శక్తి, ఒక చోదక శక్తి. ఈ సభలో ఉన్న ప్రతి ఒక్కరం మన జీవితాల్లోని మహిళల నుంచి- తల్లులు, సోదరీమణులు, భార్యల నుంచి ఎంతో నేర్చుకున్నాం, ప్రభావితమయ్యాం. రిజిజు చెప్పినట్లు, ప్రధానమంత్రికి, నాకు ఆ భార్య అనే విషయం (input) లేదు, కానీ మాకు తల్లులు, సోదరీమణులు ఉన్నారు. నిన్న నా సోదరి (ప్రియాంక గాంధీ) పార్లమెంటులో ప్రసంగిస్తుంటే చూశాను. నా 20 ఏళ్ల రాజకీయ జీవితంలో నేను చేయలేని పనిని ఆమె 5 నిమిషాల్లో చేసింది... అదేంటంటే అమిత్ షా ముఖంలో చిరునవ్వు తెప్పించడం. అది నేను కూడా నేర్చుకోవాలి. ఒక అన్నగా ఆమె ప్రసంగం చూసి గర్వపడ్డాను."

"నేను చిన్నప్పుడు చీకటి అంటే చాలా భయపడేవాడిని. మా ఇంట్లో ఒక పెద్ద కుక్క ఉండేది, అది ఎప్పుడూ నాపైన, నా చెల్లిపైన ఎగబడేది. రాత్రిపూట గార్డెన్‌లోకి వెళ్లాలంటే వణుకు పుట్టేది. ఒకరోజు మా నానమ్మ (ఇందిరా గాంధీ)కి ఈ విషయం తెలిసింది. నా జీవితంలో ఒక మహిళ నేర్పిన అతిపెద్ద పాఠం అది. ఆమె నా చేయి పట్టుకుని చీకటిగా ఉన్న గార్డెన్‌లోకి తీసుకెళ్లి, అక్కడ నన్ను ఒంటరిగా వదిలేసి వెళ్లిపోయింది. నేను భయంతో వణికిపోయాను. దెయ్యాలు, పాములు, ఆ కుక్క వస్తుందని ఊహించుకున్నాను.

కొద్దిసేపటి తర్వాత ఆమె తిరిగి వచ్చి 'దేనికి భయపడుతున్నావు?' అని అడిగింది. నేను కుక్క, పాములు, చీకటి గురించి చెప్పాను. అప్పుడు ఆమె అంది.. 'రాహుల్, నువ్వు వాటికేటికీ భయపడటం లేదు. నువ్వు కేవలం నీ మనసుకి, నీ ఊహలకే భయపడుతున్నావు.' చీకటికి భయపడవద్దని, ఎందుకంటే నిజం ఎప్పుడూ చీకట్లోనే దాగి ఉంటుందని ఆమె చెప్పింది. నీ భయాన్ని ఎదుర్కొనే ధైర్యం లేకపోతే, నువ్వు నిజాన్ని అర్థం చేసుకోలేవు, నిజం కోసం పోరాడలేవు."

"అప్పుడు అది నాకు కేవలం ఒక పాఠంలా అనిపించింది, కానీ ఇప్పుడు తెలుస్తోంది అది ఒక గొప్ప తత్వమున్న పాఠమని. ఆమె నాకు 'సత్యం శివం సుందరం' గురించి వివరిస్తోంది. చీకట్లోకి వెళ్లి నిజాన్ని చూడమని ఆమె చెప్పింది. శివుని ప్రధాన సూత్రం కూడా అదే—చీకటిని, భయాన్ని ఎదుర్కోవడం. ఆమె నాకు సత్యాన్ని, అహింసను పరిచయం చేసింది."

"ఇప్పుడు కొన్ని నిజాలు ఈ సభలో చెప్పాలి. మొదటి నిజం- ఇది మహిళల బిల్లు కాదు. ఇది మహిళా సాధికారతకు సంబంధించింది కాదు. మహిళల రిజర్వేషన్ బిల్లు 2023లోనే పాస్ అయ్యింది. కానీ నా బీజేపీ మిత్రులు దీనిని అమలు చేయడానికి 10 ఏళ్లు పడుతుందని అంటున్నారు. ఇది కేవలం భారతదేశ ఎన్నికల ముఖచిత్రాన్ని మార్చే ప్రయత్నం. మహిళల పేరుతో రాజకీయాలు చేస్తున్నారు. నిజంగా మీకు మహిళలకు రిజర్వేషన్ ఇవ్వాలని ఉంటే, పాత బిల్లును ఇప్పుడే తీసుకురండి, మేము మద్దతు ఇస్తాం. ఈ సెకను నుంచే అమలు చేద్దాం."

"మరో చేదు నిజం ఏమిటంటే.. ఈ దేశంలో OBCలు, దళితులు, మైనారిటీలు, మహిళల పట్ల జరుగుతున్న క్రూరమైన ప్రవర్తన. ఇది చారిత్రక వాస్తవం. కుల గణన (Caste Census) గురించి అమిత్ షా మాట్లాడుతున్నారు. కానీ అసలు ప్రశ్న అది కాదు- కుల గణనను పార్లమెంటు, అసెంబ్లీ ప్రాతినిధ్యం కోసం ఉపయోగిస్తారా లేదా? మీరు దానిని మరో 10-15 ఏళ్లు వాయిదా వేయాలని చూస్తున్నారు.

కార్పొరేట్ ఇండియాలో, బ్యూరోక్రసీలో, జుడిషియరీలో, ప్రైవేట్ సెక్టార్‌లో OBCలు, దళితులు ఎక్కడ ఉన్నారు? మీరు వారిని హిందువులని పిలుస్తారు, కానీ అధికార నిర్మాణంలో వారికి చోటు ఇవ్వరు. మీరు పబ్లిక్ సెక్టార్‌ను నాశనం చేసి మీ స్నేహితులకు అప్పగించారు, దానివల్ల దళితులు, OBCలు తమ అవకాశాలను కోల్పోయారు."

(ఇక్కడ స్పీకర్ వారించినా, రాహుల్ ఒక కథ చెప్పారు)

"మేము చిన్నప్పుడు ఒక మ్యాజిక్ షోకి వెళ్లాం. ఆ మాంత్రికుడు ఎర్రటి టోపీ వేసుకుని అందులోంచే కుందేలును తీశాడు. బంతుల్ని గజిబిజిగా పైకి ఎగరేసి పట్టుకుంటాడు. పిల్లలందరూ చప్పట్లు కొట్టారు. చివరగా అతను తనను తాను గొలుసులతో బంధించుకుని, తాళాలు వేయించుకుని, ఒక పెట్టెలోకి వెళ్ళాడు. 3 నిమిషాల్లో బయటకు రావాలి. కానీ అతను రాలేకపోయాడు. తాళాలు అలాగే ఉండిపోయాయి, అతను లోపల ఇరుక్కుపోయాడు. పిల్లలందరూ నవ్వడం మొదలుపెట్టారు. ఆ తర్వాత అతను ఏ మ్యాజిక్ చేసినా ఎవరూ నమ్మలేదు. ఆ మాంత్రికుడికి ఏదో అనారోగ్యం ఉంది, ఒత్తిడిలో ఒక తప్పు చేశాడు, దాంతో అతని మ్యాజిక్ పనైపోయింది.

నేను ఎందుకు చెబుతున్నానంటే.. ఈ మాంత్రికుడికి, ఒక బిజినెస్‌మెన్‌కి మధ్య భాగస్వామ్యం ఉంది. (స్పీకర్ అభ్యంతరం వ్యక్తం చేశారు). ఆ మాంత్రికుడికి సంబంధించిన ప్రతి విషయం తెలిసిన ఒక రహస్య శక్తి వెనుక ఉంది."

సభలో గొడవ జరుగుతుంది. మేజీషియన్ అనే పదం అన్ పార్లమెంటరీ అని రూలు బుక్ చూపించారు. పలువురు మంత్రులు అభ్యంతరం చెప్పారు. అది ప్రధానమంత్రి నరేంద్ర మోదీకి, రిలయెన్స్ యజమానికి సంబంధించిన లింకుగా ఉందనే అభిప్రాయం ఉందనేలా కొందరు వ్యాఖ్యానాలు చెప్పారు. దీంతో రాహుల్ గాంధీ తన ప్రసంగాన్ని ముగింపునకు తీసుకువచ్చారు. ఈ ప్రసంగంలో రాహుల్ గాంధీ వాడిన 'మేజీషియన్' (మాంత్రికుడు) పదాన్ని ప్రధానిని ఉద్దేశించి అన్నారని స్పీకర్ ఓం బిర్లా రికార్డుల నుండి తొలగించాలని సూచించారు. అలాగే '16' నంబర్ గురించి ఆయన చేసిన వ్యాఖ్యలు రాజకీయ వర్గాల్లో పెద్ద చర్చకు దారితీశాయి.)

ఆ 16 నెంబరు ఏమిటీ..

"బిజెపికి ఒక భ్రమ ఉంది.. తామే భారత ప్రజలమని, తామే సాయుధ దళాలని వారు అనుకుంటున్నారు. కానీ మీరు ఒక రాజకీయ సంస్థ మాత్రమే. మేము మిమ్మల్ని విమర్శిస్తున్నాం, దేశాన్ని కాదు.

చివరగా ఒక పజిల్ (పొడుపు కథ) ఇస్తాను. నిన్న (ఏప్రిల్ 16వ తేదీ) నేను ప్రధానమంత్రి ప్రసంగం చూశాను. చాలా తక్కువ ఎనర్జీతో, విసిగిపోయినట్లుగా ఆయన మాట్లాడుతున్నారు. . ఈ '16' అనే నంబర్‌లోనే అన్ని సమాధానాలు ఉన్నాయి. మీ సమస్యలన్నింటికీ పరిష్కారం, జరగబోయేది అంతా ఆ 16 నంబర్‌లోనే ఉంది. భారతీయులు ఆ పజిల్‌ను పరిష్కరిస్తారని ఆశిస్తున్నాను. ధన్యవాదాలు." అని ముగించారు.

రాహుల్ గాంధీ తన ప్రసంగంలో ప్రస్తావించిన "సత్యం, శివం, సుందరం" అనే భావన భారతీయ తత్వశాస్త్రంలో అత్యంత లోతైనది. దీనిని ఆయన తన నానమ్మ (ఇందిరా గాంధీ) నేర్పిన జీవిత పాఠంతో ముడిపెట్టి వివరించారు. ఆయన ఈ మూడు పదాలను రాజకీయాలకు ఎలా అన్వయించారంటే..

సత్యం: దేశంలోని వాస్తవ పరిస్థితి (OBC, దళితుల స్థితిగతులు).

శివం: ఆ వాస్తవాలను ధైర్యంగా ఎదుర్కొని పోరాడే శక్తి.

సుందరం: ఆ పోరాటం ద్వారా వచ్చే మార్పు లేదా న్యాయం.

చీకటిలోకి (కష్టాల్లోకి/భయాల్లోకి) వెళ్లే ధైర్యం ఉన్నప్పుడే సత్యం తెలుస్తుంది. ఆ సత్యాన్ని ధైర్యంగా ఎదుర్కోవడమే శివత్వం. ఆ సత్యం వైపు నిలబడటమే నిజమైన అందం (సుందరం).