ఓటింగ్ పెరుగుదల..S.I.R ప్రభావమేనా?

తమిళనాడు, పశ్చిమ బెంగాల్ అసెంబ్లీ ఎన్నికల్లో ఈసారి రికార్డు స్థాయిలో ఓటింగ్ నమోదైంది. అయితే ఈ సంఖ్యలను పైపైన చూసి అంచనాలు వేయడం సరైంది కాదని ‘ది ఫెడరల్’ ఎడిటర్ ఇన్ చీఫ్ ఎస్. శ్రీనివాసన్ పేర్కొన్నారు. ‘టాకింగ్ సెన్స్ విత్ శ్రీని’ కార్యక్రమంలో ఆయన మాట్లాడుతూ.. ఈ అధిక పోలింగ్ వెనుక గణితపర, రాజకీయ కారణాలు రెండూ ఉన్నాయని వివరించారు.

S.I.R ప్రభావం: గణాంకాల్లో మార్పు..

2021తో పోలిస్తే తమిళనాడులో సుమారు 56 లక్షల ఓటర్లు తగ్గగా, పశ్చిమ బెంగాల్‌లో 91 లక్షలకు పైగా ఓటర్ల పేర్లను తొలగించారు. “మొత్తం ఓటర్ల సంఖ్య తగ్గితే, పోలింగ్ శాతం సహజంగానే పెరుగుతుంది” అని శ్రీనివాసన్ స్పష్టం చేశారు. అందువల్ల, ఈసారి నమోదైన అధిక శాతం పూర్తిగా ఓటర్ల ఉత్సాహానికి మాత్రమే సంకేతం కాదని ఆయన అన్నారు.

వివాదంలో S.I.R ప్రక్రియ..

స్పెషల్ ఇంటెన్సివ్ రివిజన్ (SIR) ప్రక్రియ తీవ్ర వివాదాస్పదంగా మారింది. ముఖ్యంగా పశ్చిమ బెంగాల్‌లో మైనారిటీ ప్రాంతాలే లక్ష్యంగా ఓటర్ల తొలగింపులు జరిగాయని ప్రతిపక్షాలు ఆరోపించాయి. ఇంకా లక్షలాది పేర్లు పరిశీలనలో ఉండటం కూడా సందేహాలను పెంచుతోంది.

రాజకీయ కారణాలూ కీలకం..

గణితానికి అతీతంగా, రాజకీయ పరిస్థితులు కూడా పోలింగ్ పెరుగుదలలో పాత్ర పోషించాయి. పశ్చిమ బెంగాల్‌లో పౌరసత్వ అంశాలపై ఉన్న భయం, ముఖ్యంగా మహిళలను పోలింగ్ కేంద్రాలకు రప్పించిందని ఆయన అభిప్రాయపడ్డారు. ఇక తమిళనాడులో నటుడు విజయ్ రాజకీయ ప్రవేశం పట్టణ యువతను, ముఖ్యంగా యువ మహిళలను ఆకర్షించినట్లు కనిపించిందన్నారు.

ఉత్సాహం ఓట్లుగా మారుతాయా?

అధిక పోలింగ్ ఉన్నంత మాత్రాన ఫలితాలు అదేరీతిలో వస్తాయని చెప్పలేమని శ్రీనివాసన్ స్పష్టం చేశారు. “ఫస్ట్-పాస్ట్-ది-పోస్ట్ విధానంలో ఉత్సాహం ఓట్లుగా మారాలి. అది సంక్లిష్ట ప్రక్రియ” అని ఆయన అన్నారు.

మొత్తం మీద S.I.R ప్రభావం, పౌరసత్వ అంశంపై భయం, రాజకీయ సమీకరణ.. అన్నీ కలిసి ఈ అంకెల వెనుక ఉన్న వాస్తవాన్ని అర్థం చేసుకోవడం ముఖ్యమని” శ్రీనివాసన్ స్పష్టం చేశారు.